18
1 Khumi takhrachi hawi ka-ly awm thai y nai khumichi ly amychi hawi ai naini paleung apei reng nai khumichi ne. Nichi ly khumi luteng my teng, nanai ai kawn u y.
2 Khumi ka-khum ly saisairei ra y, my i pany nai pany y nai ai dawndan y leang. Mymy mana tanrei tau cheng mo, nanai ai naini pany hai khyh.
3 Kamngo hawi kangji ly vanrei awm nai ne. Tahm by y nai khumi ly thui tamawn naira avum reng.
4 Khumi i katheu nai leuchi ly cheng nai tui no lawm pajau i, pangli kamta thiu naimy tui leaung nai tavo micheaung kamta, tui pachyn pan nai ne.
5 Tara chih naira y, kamngo awm nai khumi ai asa hai iy, kamngo by y nai khumi ai, tara pasum nai ly tamang nai ne.
6 Leu ka-ei amteaung nai khumi ka-khum ly pakhau nai amteng ai ngai nai khumi ne.
7 Khumi ka-khum i katheu nai leu ly amymy ai sum hai reng. Ni ly my i leu hawimy aman ryp nai ne.
8 Ka-jo pakei nai leu ly tui parai nai teicha teinei kamta ne i, huni ai ly achi my pajawn ai nai ngai reng nai ne.
9 Khumi napjang ly yhmtheaung pasum atyhtyh nai khumi hawi amjo amnau ne.
10 Areng ly khumi kahawichi i abyhra, khaw parai nai lengseaung yhm pui atawm. Hu y khumi kahawichi ly chymme naira nga ai nai chei u pajau nai ne.
11 Na i py nang chawn nai khumichi ly mymychi i yhmtheaung katuichi my, mychi ai khaw parai nai mary apai ka-sang kamta ang kry, nanai athang khai u reng nai ne.
12 Paleung apanem nai khumi naini, khumi takhrachi my tahm khai. Paleung len nai khumichi ly phra nai mang y amhi u nai ne.
13 Pathang y rai khala deng nai leu ai tem pa-rei tangai; hunai kamta so y baly akhum nai hawi khumi mei aniu y nai ne.
14 No nai thym khala y, amy i paleung ai khaw hai pajau nai khumi ly kham pajau nai keung ne. Paleung kham pajau y nai khumi i vui ly athang khai naira by y leang bo.
15 Lulip pany nai khumichi ly paleung apei parai naimy amtiu ai nai angveirym reng nai ne.
16 Miteaung keh leaungrei hawi avum ai ngai nai khumi ly langseaung syn ai nai tla; hunaibaly rai y .
17 Tara jeung y leu amti manme nai khumi i amti nai leu ly teng, nanai athang khai reng. Na i py tara preng my tlau teang nai khala ly tara lam ali vui reng nai ne.
18 Sathai naira awm nai, tara sa nai khumi leaung nyhrei ne lawh baly, tara jeung y nini i tara ai tambe va iy, leu pacheang pi pajau nai ne.
19 Nang i ahawi ka-dawi ai sabawm; naibaly ni ly khaw parai nai mary apai kamta, nang ai ama hai ai. Na i py nang ly ni ai ka-jo hau lawh baly, nang ai katheu akho hai vui ai.
20 Nang ly nangmy i leu katheu nai tamang baly, katamanglai nga ai.
21 Nang i katheu nai leu ly heng hai ai nai, dei hai ai nai sa thai naira awm. Hunai deaungkho y nang ly nangmy i katheu nai leu kamta hawi nai hawi y nai avum ai.
22 Aju nga nai khumi ly taham hawi i, Areng teng i amtheaungra nga ai.
23 Khumi kamawn ly tahm khai iy ahui nai leu katheu reng; na i py khumi kanang ly leusi leukho katheu reng nai ne.
24 Phyrei ahawi ka-dawichi ly kakra amkawm ai nai ngo y. Na i py phyrei ahawi ka-dawichi ly amjo amnau kypkyp tleaung y malawn py, khri pa-rei ka-ym awm nai ne.