19
1 Khumi kamawn ne iy neaung hawi nai khumi lawm nai ly li-tapawp reng nai khumi ka-khum lawm nai tleaung y hawi keh.
2 Tau cheng naira by y pui naimy, paleung apei parai nai ly ati sai py ny y. Sa tamangtang nai khumi ly tamang reng nai ne.
3 Phyrei khumichi ly mychi i hawi y nai molam y phra u nai khala, Areng ai thui tamawn u bo.
4 Nang chawn nai khumichi ly ahawi kangthachi avum reng. Na i py khumi kamawnchi ai ly ahawichi my khai su reng nai ne.
5 Tara jeung y ka-chawi thui nai khumi ly pajeng naira avum ai; pajengra i nai tleaung ai ny y.
6 Khumi luteng ly aly len nai khumichi teng i, meimai nga ai nai atho sa u reng. Khumi luteng ly paleung kangleng naimy pei nai khumichi hawi, ahawi kamrawi asa reng nai ne.
7 Khumi kamawn i amjo amnauchi molam py, ni hawi amkawm ai nai ngai u y; huna nai y ni teng y ahawi ka-dawi by y nai ly lyh ai nai by y. Ni ly khri pa-rei atho sa iy, ahawi kamrawi asa teu i py, ahawi leaungrei py ngo y .
8 Cheng naira amtiu nai khumi ly amy ai tamen. Cheng naira ai dawn pany jo nai khumi ly hawi naira avum ai.
9 Teng y nai pany hai nai ly pajeng naira avum ai, ni ly sum naira py avum ai.
10 Khumi ka-khumchi ly tlamsa naimy awm ai nai amlau y. Miseaungchi py tahm awm nai khumichi ai peang ai nai avo y.
11 Pany thai naira awm nai khumi ly my i kado theu nai amkyn ai. Ami my kado theu hai nai ai dawndan pi y nai ly khumi kahawi i kaja ne.
12 Samrang i kado theu nai ly khrangsi i hang nai hawi atawm. Na i py ni i mo y meimai nga nai ly aly ngai nai neng khala nai pi nai kanitui hawi atawm nai ne.
13 Chapo ka-khum ly ampo ai taham si hai pajau. Josei ham nai aju ly avawrei leaungdau leaungdau nai, kachie tui hawi atawm.
14 Khumi ly yhm hawi yhmtheaung katui ai, amhm ampo teng i amtym pajau. Na i py cheng naira awm nai aju ai Areng my vui pi khala naini, nga pajau nai ne.
15 Napjang nai y, i ryry nai khumi ly biu takang avum ai.
16 Tameuh i leu pei naichi tangai nai khumi ly heng sau ai. Hunichi ai dawndan y nai khumi ly deung dawi ai.
17 Khumi kamawnchi ai sabawm nai khumi ly Areng teng y piu paseng nai khumi ne i, Areng my ni ai heung pi ali teang ai.
18 Cho chanauchi tleaungri acheang y rai nai, thui parip ai nga nai neng khala parip ba. Huna nai so y baly nichi ly phra naira tym ai.
19 Kado theu len nai khumi ly pajeng naira avum sy. Ni ai patang naira i nai angchei tlenrei atleu pi baly, atleubi atleubi ai nai tla ai.
20 Tau pei nai tangai iy, cheng naira amtiu ai ngai nai khumi ly kanirei nai khala khumi kacheng lawm ai.
21 Khumichi ly ati cheaungkhang adawn pasym pajau; na i py Areng i kangai naini tym ai.
22 Ngaiphi ala nai ly kaji ai hawi. Khumi kamawn nai ly ka-chawi thui nai khumi tleaung y hawi keh.
23 Areng ai jei kaji nai khumi ly heng sau ai. Amtheaung nai ryrei awm thai ai i, patang naira avum ai ny y.
24 Phyrei khumichi ly napjang ala nai deaungkho y, teicha teinei ai my i kiu hawi la iy, labeaung y atui vai y.
25 Paleung len nai khumi ai ly khyh pakhau iy parip ba. Huna khala naini, tau padi nai khumi ly pany thai ai. Tau cheng nai khumi ly parip naira avum nai khala, cheng naira nga ai.
26 Ampo ai ana nai chapo, ti y baly amhm ai yhm i dengdairei paryh praw nai chapo ly kaji ai hawi nai khumi ne.
27 Deang awi, nang ly cheng naira amtiu nai anawn vui lawh baly, nangmy i pany yb naichi malawn py tami pawn ai.
28 Khumichi rai naira avum hai ai nai katheu nai, pany hai nai keung abawi nai tara leu ly tara leu pacheang pajau y. Khumi hawi y naichi ly hawi y naira ai ngai u lawh nai ne.
29 Paleung asang nai khumi ka-khum ly vuiha beang hawi pajeaung nai avum takengkei ai.