17
1 Tako kajei cha iy paleung savairu naimy awm nai ly ajo athui nai yhm i cha nei pawi puira y, abawi nai tleaung y hawi keh.
2 Lulip pany thai nai miseaung ly my i yhmkeung i tahm by y nai chapo ai, leu pei pajau; yhmtheaung phyrei ai py amtym pajau nai ne.
3 Muku hawi tangka ai mai hawi cham; khumi i paleung ai ly Areng my cham nai ne.
4 Khumi hawi y naichi ly hawi y nai leu tangai u reng. Tapawp reng nai khumichi ly ka-chawi leu tangai u reng nai ne.
5 Khumi kamawnchi ai panui pachem hai nai khumi ly nichi ai sa nai keung Tameuh ai thui tamawn nai ne. Amichi i khym taham kasi avum nai khala, amo theu reng nai khumi ly kamngo pajeng naira avum ai.
6 Cho chanauchi ly ampo i molam y amlyh u reng nai kamta, amsi pajochi py katu chanauchi i molam y amlyh u reng teang.
7 Tahm awm nai khumichi ly ka-chawi leu thui vai y. Khumi ka-khumchi ly leu kahawi katheu vai y leang.
8 Un langseaung ly mei amhyp patei pi nai kamta, eaung naira pei reng, nanai khumi phyreichi athang khai u. Un langseaung ly ati mora py sa hai pajau, nanai ym u nai ne.
9 Amichi i kamngo pahen pi nai khumi ly aly ai ngai nai khumi ne. Kamngo tapheaung nai ly ka-lyra phra hai pajau.
10 Tau cheng naira awm nai khumi i, thui parip nai tleirei avum nai ly khumi ka-khum i tlen chungvairei pakhau naira avum nai tleaung y, amtiura nga nai ne.
11 Dei areng ly pahyp y naimy ana reng nai savai kamta, ajo athui ai nai avawrei kachyh reng nai khumi hawi y naichi teng y tym ai.
12 Chochi tama nai tavymnu hawi avum nai ly hawi y nai kalop sa nai khumi ka-khum hawi avum nai tleaung y hawi keh.
13 Hawi naira ai hawi y naira hawi, patlai teang reng nai khumi i yhm ly hawi naira awm ai ny y.
14 Leu ka-ei i kamteaung ly tui kathang leaung fau angchei nai hawi atawm nai deaungkho y, huni ai anawn ai nabaly anawn hai ba.
15 Kamngo by y nai khumichi ai pajeng nai ai py, khumi hawi y naichi ai pajeng y naimy lawi hai vui nai ai py, Areng ly niu ngai y nai ne.
16 Khumi ka-khum ly cheng naira by y nai deaungkho y, pasa tangka hawi cheng naira hau thai y leang.
17 Ahawi ka-dawichi ly avawrei atamen u reng nai ne. Patang naira avum nai khala, asabawm leungtang vai y nai amjo amnauchi ly ati hawira awm ai mo?
18 Tau cheng naira by y nai khumi naini ami i vui, kalum kalaichi kham pi ai nai adeu reng.
19 Kamngo ai khrei nai khumi ly ka-jo ka-thui ngai nai ne. Avawrei leu ali len nai khumi ly patang naira hau nai khumi ne.
20 Hawi y nai ai adawn pasym reng nai khumi ly hawi naira ati sai py athang khai pajau y. Patang naira naini athang khai pajau.
21 Hawi y naira sa reng nai khumi i ampo ly paleung bi paleung mawnra naini avum reng nai ne.
22 Paleung amo theu nai ly noso aho hai reng. Avawrei meimai takhuisui nai ly deira y ang vum hai dudu nai ne.
23 Sa nai sai teng y nai ai tara chih nai keungchi ly kangviu y pei nai un langseaungchi talam u reng. Hunai deaungkho y, kateng lam tara chih pi thai y.
24 Tau cheng naira awm nai khumi ly cheng naira ai mo patheung reng; na i py khumi ka-khum i mei ly meingtym tleirei y khen aki prei reng nai ne.
25 Akhum nai cho chanau ly ampo ai paleung bi hai reng; amhm ai py paleung si hai reng nai ne.
26 Kamngo by y nai khumi ai tangka peh hai nai ly tara lam ny y. Khumi kahawichi ai pajeng nai ly tara lam ai athli hai puipa nai ne.
27 Pany naira kawi angym nai khumi ly leu peung ryry vai y. Awm pypy reng nai khumi ly pany thai praw nai khumi ne.
28 Labeaung amkyn iy awm pypy reng nai khumi ka-khum ai malawn py, tau awm nai khumi hawi cheng nai khumi, nanai athang khai pajau nai ne.