16
1 Khumi ly amy i paleung y dawn tau naichi sa pajau; na i py kangkhym y ly Tameuh i kangai naini lawm ai nai tla.
2 Khumi ly amy i sa nai ngiereichi ly teng, nanai dawn reng; na i py Areng ly khumi i patyp naichi ai chih pi nai ne.
3 Nang i dawn tau naichi amtheaung hai ai nai, Areng teng y hnei. Naibaly nang i dawn tau naichi ly eaung ai mang.
4 Areng i sa nai ati cheaungkhangchi i vui ly paran yb nai awm. Khumi hawi y naichi i vui malawn py, patang naira avum hai ai nai paran yb nai awm.
5 Areng ly paleung len nai khumi ngiereichi ai ly niu ngai y. Nichi ly mana khala py, kamngo pajeng naira i nai lawi hai ai ny y.
6 Ka-ymra leu meitang ai tahm khai nai khumi ly kamngo pahenra nga ai. Areng ai jei kaji nai khumi ly hawi y nai ai en vui reng nai ne.
7 Areng my kawn hai ai nai asa nai khumi ly my i paleung ka-e ai malawn py, ahawi ka-dawi lawm hai pajau ai.
8 Kateng lam hawi paisa tangka maidenreichy hau nga nai ly tau hawi y nai leaungsai hawi tangka neangneang nga nai tleaung y hawi keh.
9 Khumi ly amy i chei ai nai lam pasym yb teu i py, ni i kheulangchi ai, Arengmy sa pi yb nai ne.
10 Samrang ly salo mang i sa thai naira hawimy leu pei nai ne i, ni i sa naichi ly teng jojo.
11 Areng ly takhu teaung, si khyry katengchi ai py, ka-jo ka-van sa naira y pajyh patleh y nai ai py khrei nai ne.
12 Samrangchi ly hawi y sa nai ai niu ngai y; ati mana nai mo nabaly adyh adawi khala naini, peang nai sai khaw ai nai ne.
13 Samrang ly ka-ym leu katheu nai, thai ai nai ngai. Ka-ym leu katheu nai khumichi ai meimai pei nai ne.
14 Samrang i kado theu nai ly dei hai pajau nai deaungkho y, khumi kacheng ly samrang i kado theu nai rym ai nai atho sa reng nai ne.
15 Samrang i mo y meimai nga nai ly tlang heng ai. Pahen naira ly kanipui khala kani nai hai nai khupanymchi kamta ne.
16 Pany thai naira hawi cheng naira nga nai ly muku hawi tangka ko nai tleaung y hawi keh.
17 Khumi kahawichi ly hawi y naira lam mang y tako vai y; na i py amy i tako ai nai lam dawn ryhpatyh nai khumi ly mymy tlang ai akry nai ne.
18 Amlyh am-e parai nai ly phra naira mang py, paleung len naira ly atlym naira mang py, pahawi nai ne.
19 Paleung apanem nai hawi kamawn lawm nai ly paleung len nai khumichi hawi amkawm iy, lawmra i vawnsai phy nga nai khumi leaungrei tleaung y hawi keh.
20 Thui parip nai ai tahm khai reng nai khumi ly eaung naira nga ai. Areng ai ym nai khumi ly taham hawi ai.
21 Tau cheng naira angym nai khumi ly cheng naira awm nai khumi, nanai amthang reng. Ni ly leu tui nai hawimy ami i paleung ai parawi pajau nai ne.
22 Tau cheng naira ly khumi kacheng i vui y, hengra tuino ne; na i py khumi hawi y nai ai thui parip nai ly neng pasum atyhtyh nai ne.
23 Tau cheng naira awm nai khumichi ly leu katheu y rai khala dawn pasym thai. Hunai deaungkho y katheu nai leu ly khumichi i paleung ai parawi pajau nai ne.
24 Pahen reng nai khumichi i leu ly khawi hang kamta tui iy tlumtlang ai noso aho hai reng nai ne.
25 Teng khyp bo, nanai nang i athang khai nai lam ly dei lam ne tang ne lym ai.Ref 16.25: Leu 14.12
26 Kalop sa keung ly cha tarau hawi nai ne. Ati mana nai mo nabaly kajeu kawi pa-rei cha pajau ai nai , kalopra y atho pathau nai deaungkho y ne.
27 Khumi hawi y naichi ly khumi takhrachi ai, patang hai ai nai lam hau u reng. Nichi i katheu nai leuchi malawn py, kang hai nai mai kamta ne.
28 Khumi hawi y naichi ly ka-cheh leuchi ahei hai reng. Nichi ly ka-jo ka-thui kachyh iy, ado y ai nai sa u reng nai ne.
29 Khrukhra hai reng nai khumichi ly mychi i ahawi ka-dawichi ai li-tapawp hyp iy, ka-jeira tym hai reng.
30 Nang ai mei meang hai iy, ho amteng na pa-rei panuiyhm hai nai khumi ly hawi y naira dawn khyh nai ne.
31 Heng sau nai ly khumi kahawichi i, nga reng nai kawn vang ne. Sam pau nai ly tahm awm nai areng lukhym ne.
32 Neaung kham pajau nai khumi ly sa thai naira awm nai khumi tleaung y hawi keh. Amy i paleung ai peang ajau nai khumi ly mary puichi ai peang nai khumi tleaung y hawi keh nai ne.
33 Khumichi ly Tameuh i kangai pany pajau ai nai tambe va iy, khen u reng. na i py pathang pi pajau nai keung ly Tameuh ne.