OBADIA
I AMO LEU
1
1 Hini Obadia i amo leu ly Edom pri molam y Obadia teng y, sa thai naira angym nai Areng my leu thui pi nai ne.Ref Oba:1-14 Is 34:5-17, 63:1-6; Jer 49:7-22; Ezek 212-14, 35:1-15; Amo 1:11-12; Mal 1:2-5
Areng my Edom pri pajeng ai nai satang
Areng ly khumi cheng cheaungkhangchi teng y, mymy i savai pato.
“Angvei u rym! Edom pri y achi tavai tiu u sina,” nanai
raawi kaichi thai u bo!
2 Areng ly Edom pri teng y,
“Kai ly nang ai atho di hai ai;
khumi bawibawichi ly nang ai mei aniu y nai sa ai.
3 Nang i paleung len nai ly nangmy ai ang tapawp bo.
Nang i mary pui ly lengseaung hawi sa nai khaw parai nai mary ne i,
nang i awm naira ly asang parai nai mawi salo y ne nai deaungkho y,
‘kai ai ami my atheu kathiu pajau ai mo?’ nanai
nangmy tlairei katheu reng nai ne.
4 Nang ly ahmtlau i tabu kamta
asang naira y awm nai deaungkho y,
ka-si taukichi sala y awm nai ne teu i py,
nang ai kaimy atheu kathiu ai.
5 “Kangviuchi ly vum y ang jeu lawh baly,
mymychi i ngai nai vawnsaichi ryrei la u nai ne.
Kreip athai jaw ai nai jeu naichi py,
kreip athai maidenrei khai mai reng nai ne.
Na i py nang i paleung ka-echi ly nang i vawnsaichi la pi pawn bo.
6 Esaw i katu chanauchi awi, nangchi i yhmtheaung katuichi ang lawm pi pawn veng bo.
7 Nangchi i amsawi amnai asa naichi ly ang tapawp iy,
nangchi ai nangmychi pri i dengdairei ang patheu pawn bo.
Nangchi hawi vanrei tlamsa naimy awm nai khumichi my vai, nangchi ai peang vui bo.
Nangchi hawi vanrei cha nei u nai ahawichi ly nangchi i vui deaung pateung u bo.
Nichi ly nangchi i molam y, hini khumichi i tau cheng nai ly ma mang y tym pawn mo? nanai thui u nai ne.
8 “Kai ly Edom pri y pajeng nai thym khala,
ni i khumi kachengchi ai tamyh iy,
cheng nai ngiereichi ai taphra vui ai.
9 Tavai ateaung syn nai Teman mary i khumichi ly jei hyn u ai.
Edom pri i tavaimi risa bawibawichi ly dei u ai.
Edom pri y pajeng ai nai leaungsaichi
10 “Nang ly nangmy i amjo amnauchinote 1:10\xk amjo amnauchi: Edomchi i amsi pajo, Esaw i amjo amnau, Jakob i kangpreang Israela chengchi ne.\x*napi nai
Jakob i katu chanauchi ai lawm iy padei nai deaungkho y, taphra nai avum ai.
Deungtasarei kangji nga ai.
11 Paleung ka-echi ly huni khumichi i mary apai katheu taphra nai thym khala,
nang ly sahawi mang angdo nai ne.
Nang ly Jerusalem mary i yhmtheaung katuichi la vui iy
mychi tengtawi phy apaji nai
cheng takhrachi kamta, hawi y nai khumi ne.
12 Nang ly Juda pri i nangmy i amjo amnauchi,
taham kasi avum nai ai paleung ateng hai ai nai avo y.
Nichi phra nai kani y amo theu ai nai avo y.
Nichi paleung bi u nai thym khala
nang ly amlyh ai nai avo y.
13 Nang ly kai i khumichi ngari kamtang avum nai ai paleung ateng hai iy
nichi ka-jeira avum nai thym khala
nichi i mary theung y kun ai nai avo y.
Nichi i vawnsaichi la pi vui ai nai avo y.
14 Nang ly preang ai nai atho sa nai khumichi ai patiu ai nai
lam sangumchira y angdo ai nai avo y.
Nichi ka-jeira avum nai thym khala
nichi ai paleung ka-echi kiu y au ai nai avo y.
Areng my khumi cheng cheaungkhangchi ai tara chih ai nai satang
15 “Kai, Areng my khumi cheng cheaungkhangchi ai
tara chih ai nai neng kani tym hai ai.
Aw Edom pri awi, amichi ai nangmy i sa nai kamta
amichi my nang ai ang sa u teang ai.
Nang ly nangmy i pei nai kamta nga teang ai.
16 Kai i khumichi ly kai i mawi kachai salo y
kai i kho nai pajeng nai khau nei u bo.
Tengpang sahawi i khumi cheng cheaungkhangchi py
huni tleaung y kho keh nai pajeng nai khau nei u ai.
Nichi ly huni ai nei pyn chum baly, tama u pawn ai.
Israela chengchi i eaung nai sai
17 “Na i py Zion mawi salo y tleaung nai khumi phyrei awm ai;
hini mawi ly meingtym kachai lawm ai.
Jakob i kangpreangchi ly mymychi i vui amtym ai nai nga ai.
Pri amtym ai nai nga u ai.
18 Jakob i kangpreangchi hawi Josepha i kangpreangchi ly mai hawi atawm ai.
Mai ly anyn angso ai kang hai nai kamta,
nichi ly Esaw i kangpreangchi ai taphra u ai.
Esaw i katu chanau leaung leaungrei py, dei y naimy awm ai ny y.
Hini ly kai, Areng my kang thui pi nai leu ne.
19 “Juda pri tokalawi ngan mang i khumichi ly Edom pri ai py,
nidym mawi kheutangchi mang i khumichi ly Philistia pri ai py peang vui ai.
Israela chengchi ly Ephraim hawi Samari khu ka-peangchi peang u ai i,
Benjamin khumichi my Kilead pri peang ai.
20 Israela pri tosyh mang i, pri pala nai avum nai khumichi i tavaimichi ly vawi teang iy,
tosyh mang Zarephath mary khrairei,
Phoenisa pri peang u vui ai.
Jerusalem mary i pri palara avum iy, Saradi mary y tym nai khumichi ly
Juda pri tokalawi ngan mang i marychi peang u ai.
21 Eaung pawi nga nai Jerusalem mary i khumichi ly
Edom pri y tiu i peang u ai.
Huna nai khala Areng mymy kypkyp ly huni pri y samrang lawm ai.”