JONA
I AMO LEU
Jona cha-iu ly baibul cha-iu theung y awm nai takhra amo cha-iuchi hawi atawm y. Ati mana nai mo na baly hini cha-iu theung y ly Tameuh i leu pei nai tangai y nai amo i avum nai saichi ai vam parai naimy, achih kamta tajiu pi nai deaungkho y ne. Tameuh ly Jona teng y Israela chengchi tlang tleaung y paleung ka-e khai nai Asuria empara samrang i mary pui Ninevi mary y chei ai nai leu pei nai ne. Na i py Tameuh ly huni mary y pajeng ai, nanai leu pei nai kamta so y ai, nanai pany nai deaungkho y Jona ly mymy i leu pei nai thai hai ai nai, huni mary y chei ai nai ngai y nai ne. Ni ly paleung apei ai hawi nai atitichi hawi avum chum baly, Tameuh i leu pei nai paleung apei y naimy tangai bo. Na i py kangkhym y ly my i thai hai nai kamta, Ninevi mary i khumichi ai pajeng y nai khala, ni ly pangaw nai ne.
Hini cha-iu theung y Tameuh ly mymy i sa nai ngiereichi ai peang angchi khyp nai keung ne, nanai amteng hai bo. Hini cha-iu theung y Tameuh ly tamen nai hawi pahen nai keung ne, nanai hawihai palai pany thai ai nai amteng hai bo. Mymy i vawi takhra nai Israela chengchi i paleung ka-echi ai phra hai ai nai tleaung y ly kamngo pahen pi iy atleu nai keung ne.
1
Areng i leu pei nai tangai y nai Jona
1 Kanirei nai khala y Amittai i chapo Jona teng y Areng my leu pei nai ne.Ref 1:1 2 Areng 14:25
2 Mymy ly “Nang ly Ninevi mary pui y chei iy, pany hai ba. Huni mary i khumichi ly khri pa-rei aso y, nanai kai pany,” napi.
3 Na i py Jona ly Areng teng i dengdairei preang vui ai nai Joppa sampho tuivum y chei. Joppa mary y tym baly Spain pri mang y chei ryp ai nai sampho apeh khyp. Jona ly sampho atang nai vang pei iy, Areng hawi palo nai Spain mary mang y, sampho i khumichi hawi vanrei abang ai nai, sampho atang bo.
4 Na i py sampho ly pangli theung y tym nai khala, Areng ly ali kamchai pui aho hai. Huni ali kamchai pui ly khri pa-rei ho nai deaungkho y, sampho ly phra vi na bo.
5 Sampho i khumichi ly jei hyn nai deaungkho y, amymy i ym nai tameuhchi teng y mymychi ai sabawm ai nai chiu sa u. Naibaly sampho vawn jang ai nai vawnsaichi tui theung y aphi u. Huna nai thym khala y Jona ly sampho taku theung y satla iy i vui nai ne.
6 Naibaly samphora y lu sa nai miteaung keh ly chei i ni teng y, “Nang ly ati mana nai y i ngym vui lawh mo? Angthau ly nangmy i tameuh teng y achi ai atleu ai nai chiu so bei. Mymy ly achi ai pahen iy atleu tan atleu lym ai,” napi.
7 Naibaly sampho i khumichi my, “Achi hinai kamta patangra avum nai ly amimi i kamngo molam y tym nai mo, nanai pany ai nai tambe va u sina, nanai mychi tengtawi arum u. Nichi ly tambe va i, Jona i amyn avah khyp bo.
8 Hunai deaungkho y nichi my, “Hina nai patangra tym nai ly ami i kamngo mo? Kaichi teng y thui pi. Nang ly ati aly y hini sampho tleaung y tym nai mo? Mani pri i jeu nai mo? Mani cheng khumi mo?,” nanai Jona teng y deng u bo.
9 Jona my, “Kai ly Hebrai khumi ne; kacheng hawi pangli ai sa nai keung, kani pri tavailuchi i Areng Tameuh ai chiu nai khumi ne,” nanai pathang.
10 Hunaibaly Jona my, mymy ly Areng teng i dengdairei preang vui nai khumi ne, nanai py huni khumichi teng y thui pi.
Sampho i khumichi ly jei hyn naimy ni teng y, “Nang i sa nai kalop ly ka-jei hawi parai na ly!” napi u.
11 Huna nai thym khala ali kamchai ly aho tleaung aho ra bo. Hunai deaungkho y sampho i khumichi my ni teng y, “Ali kamchai anawn hai ai nai, kaichi ly nang i tlang tleaung y ati mana sa ai nai avo mo?,” nanai deng u.
12 Jona my, “Kai ai pangli theung y aphi u; naibaly ali kamchai ly aham ryp ai mang. Nangchi ali kamchai avum nai ly kai i kamngo nai y ne, nanai kai pany bo,” nanai pathang.
13 Na i py sampho i khumichi ly Jona ai pangli theung y aphi vui ai nai tleaung y ly sampho ai tui peang mang y tym ai nai, khri pa-rei atho sa nai hai u bo. Na i py ali kamchai ly aho tleaung ahora nai deaungkho y, nichi ly ati sai py so u thai y.
14 Hunaibaly sampho i khumichi my Areng teng y, “Aw Areng, hini khumi i dei nai molam y, kaichi ai dei ai nai pa-rei pajeng y ai nai kang takeng. AwAreng, hini kalop ly nangmy i ngai nai kamta sa nai kalop ne,” nanai chiu sa u bo.
15 Naibaly nichi ly Jona ai tapawm iy, pangli theung y aphi u. Huna nai khala ali py vaimy aham ryp bo.
16 Huna nai aham nai khala y sampho i khumichi ly Areng ai khri pa-rei jei u nai deaungkho y, apathyp u chum baly mymy ai chiu ai nai vaineng adeu u nai ne.
17 Naibaly Areng my leu pei nai deaungkho y, ngo kalen pui amairei ly Jona ai pajawn vui bo. Jona py ngo taku theung y kani thomrei, vum thomrei aeung ai nai tla bo.