9
Areng i tara chih naichi
1 Kai ly maicham sahawi y angdo nai Areng ai niu bo. Mymy i leu pei nai ly “Achura yhm verei ahyn kanangkang na pa-rei ahyn hai ai nai Achura yhm i yhmmawm meaung pakhau peu. Hunichi ai pakhau peu iy khumichi i lu tleaung y tlo hai. Huni bo i khumichi ai ly tavai keung y kapadei ai. Ami py tleaung ai ny y, mani khumi py law tleaung pajau y ai.
2 Khaileaung y angawm tai iy tavau pri y aheu teu i py, kai ly nichi ai ngo y nai nga pa-rei patiu ai. Kani mang y lyn kalau teu i py, nichi ai atheu kathiu ai.
3 Nichi ly Karamela mawi salo y aheu u teu i py, nichi ai hau iy patiu ai. Kai teng i nai tleaung ai nai pangli paichi theung y aheu lawh baly, nichi ai pajawn ai nai pangli naka ai leu pei ai.
4 Paleung ka-echi my patiu vui i py, nichi ai padei ai nai kaimy leu pei ai. Kai ly nichi ai sabawm y naimy, taphra vui ai nai leu pacheang veng bo,” napi.
5 Kani pri tavailuchi i Areng ly khaileaung y abi nai deaungkho y,
kaleih pui theu bo;
khaileaung y awm nai bawibawichi py vo ai.
Khaileaung pri verei ly Aikupta pri i Naing tavo kamta, anem lawh, asang lawh ai.
1
6 Areng ly kani mang y mymy i yhm sa nai ne.
Khaileaung salo y alumkum nai kani khusang ai khai bo.
Pangli tuichi ai palau iy
khaileaung salo y leih bo.
7 Areng my, “Aw Israela khumichi awi, kai ly nangchi ai Ethiopia khumichi tleaung y aly len nai kang palawn bo. Kai ly nangchi ai Aikupta pri i dengdairei kang pahawi nai kamta, Philistia khumichi ai Karete tlawn i dengdairei py, Suria khumichi ai Kira pri i dengdairei py, kang pahawi nai ne.
8 Sa thai naira angym nai kai, Areng ly kamngo nawi parai nai, hini Israela pri ai kakhen patyp bo. Hini pri ai khaileaung i nai tama vui na pa-rei taphra ai. Na i py kai ly Jakob i kangpreang bawibawi ai taphra ai ny y,” napi.
9 “Paho tleaung y chohnei alai nai kamta, kai i leu hawi Israela khumichi ai alai vui ai. Khumi cheng cheaungkhang theung y alai chum baly, ataing y nai khumi ngiereichi ai ly kaimy charyh vui ai.
10 Kai i khumichi theung i, ‘Tameuh ly achi ai kamtang pei ai ny y,’ nanai thui nai kamngo awm nai ngiereichi ly tavai keung y dei u ai.”
Mo mang neng y Israela pri ai palum teang nai
11 Areng my, “Anawi nai yhm hlau kamta lawm nai Davida i pri ai, kaimy palum teang nai neng kani tym ai. Ako nai lengseaung apaichi ai kaimy palum teang ai. Jangni i awm nai kamta, kaimy palum teang ai. Ref 9:11-12 Amtaw 15:16-18
12 Hunai deaungkho y Israela chengchi ly awm jo rai nai Edom pri ai py, vaichi khala y kaimy peang nai pri tleirei ai py, peang ali teang ai nai nga ai,” nanai tym hai ai nai Areng my ang thui pi bo.
13 Areng my,
“Choh tyn ai nai apho y na pa-rei, choh keung keu hawi nai neng hawi,
kreip hang nip leila y na pa-rei, kreip athai pasu nai kanichi tym ai.
Mawi katheang kalenchi mang i dengdairei,
kreip hang katui leaung nai neng tym ai.
14 Kai ly kaimy i khumichi ai, mychi i pri y kapahawi ali teang ai.
Nichi ly phra nai marychi sa teang iy, huni marychira y awm ai nai nga u teang ai.
Kreip akhochi sa iy kreip hang nei ai nai nga u ai.
Akho baichi sa u iy amy i pati nai amti amjangchi ai amychi my cha ai nai nga u ai.
15 Kai ly kaimy i khumichi ai, kaimy pei nai pri y kaimy awm hai ai;
ami py nichi ai taphra naira avum hai bi y ai,” napi.
Hini ly nangchi i Areng Tameuh my leu pei nai ne.