35
Levi theaungchi ai vui pi nai marychi
1 Jeriko mary kangka Jordan tavo vai y awm nai Moba adymra Areng my Mosi teng y,Ref 35:1-8 Josua 21:1-42
2 “Israela chengchi ly mymychi nga nai khu ka-peang theung i, phyrei marychi hawi tengpang y awm nai sui tlaira meingtymchi ai Levi theaungchi teng pei pi ai nai tla.
3 Huni marychi ly Levi theaungchi i vui ne iy, nichi ly huni marychira y awm u ai nai tla. Sui tlaira khaileaungchi ly nichi i si hawi tawnbawichi i vui ne.
4 Sui tlaira khaileaung ly mary apai phei palyhrei dengdai angam mang y lam 250rei kau ai nai tla.
5 Teng ka-ki sui tlaira khaileaung ly huni mary ai sangum khai iy, jeng, ka lam 500rei awm riri ai nai tla.
6 Nangchi ly athang khai y naimy khumi ai padei vui lawh baly, abyh ai nai mary tariurei Levi theangchi teng y pei pi ai nai tla; huni bo y takhra mary 42rei py pei pi ai nai tla.
7 Hunai deaungkho y sui tlaira khaileaung meingtym raurei baly, mary bawibawi 48rei nichi teng y pei pi ai nai tla.
8 Israela cheng theaung bawibawichi i peang nai khaileaung khu ka-peang katheang kalen ka-lyp, Levi theaungchi i vui marychi phy pi ai nai tla,” napi.
Abyhra marychi
(Leu 19:1-13, Jos 20:1-9)
9 Areng my Mosi teng y,
10 Israela chengchi i vui leu pei nai ly “Nangchi ly Jordan tavo angpeang iy Kanan pri theung y kun nai khala y,Ref 35:9-29 Leu 19:2-4, Jos 20:1-9
11 athang khai y naimy khumi leaungrei ai padei lawh baly, preang iy abyh thai ai nai marychi vawi takhra ai nai tla.
12 Ni ai ly huni marychira y dei nai khumi hawi amtawn abi nai khumi my vawitheung tha pajau y ai nai ne. Padei nai khumi ai khumi mipuichi i mo y tara chih y naimy padei teang ai nai avo y.
13 Mary tariurei vawi takhra ai nai tla;
14 mary thomrei nai ly Jordan tavo nisi mang y khai iy mary thomrei nai ly Kanan pri theung y khai ai nai tla.
15 Huni marychi ly Israela chengchi i vui py, ka-kan py ne sy, tanarei py ne sy, awm nai cheng takhrachi i vui py, abyh nai marychi lawm ai nai tla. Athang khai y naimy khumi leaungrei ai padei nai keung ly huni marychi theung i mary ha harei y abyh pajau nai ne.
16-18 “Na i py tamo, lengseaung, thengbeang, ha harei hawi khumi leaungrei ai padei keung ly khumi ai padei nai deaungkho y ni ai ly padei teang ai nai tla.
19 Dei nai khumi hawi abi keh nai keungko ly padei nai keung ai avum baly padei teang ai nai tla.
20 “Khumi leaungrei ai niu ngai y nai deaungkho y nui praw nai py ne sy, sai sairei hawi aphi nai py ne sy,
21 kiu hawi tapheu nai py ne sy, padei nai keung ly khumi ai padei nai deaungkho y, padei teang ai nai tla. Dei nai khumi hawi abi keh nai keungko ly padei nai keung ai avum baly padei ai nai tla.
22 “Na i py khumi leaungrei ai niu ngai y nai ny y naimy nui praw nai py ne sy, sai sairei hawi aphi nai py ne sy, athang khai y naimy dei vui lawh baly,
23 paleung ka-e ny y nai khumi ai no ngai hai ai nai paleung ka-dawn by y naimy lengseaung hawi athang khai y naimy aphi nai deaungkho y, huni khumi dei lawh baly,
24 khumi mipuichi my padei nai keung hawi dei nai khumi i abi keh naichi sala y Tara lam hawi ka-vo chih pi ai nai tla.
25 Khumi mipuichi ly khumi padei nai keung ai dei nai khumi hawi abi keh naichi my, padei y ai nai ama hai iy huni khumi abyh nai mary y tha ai nai tla. Ni ly huni thym khala kalop sa nai pathyp pi nai keung kalen keh heng nai ryrei, huni mary y awm ai nai tla.
26 Khumi ai padei nai keung ly abyh nai mary angam mang y theu nai deaungkho y,
27 dei nai khumi hawi amtawn abi nai khumi my niu iy, ni ai vawitheung tha nai padei teang lawh baly, huni vawitheung tha padei nai ly khumi ai padei nai tlo y.
28 Na i py khumi ai padei nai keung ly huni thym khala kalop sa nai pathyp pi nai keung kalen keh heng nai ryrei ly ni i abyh nai mary theung y awm jo ai nai tla. Pathyp pi nai keung kalen keh dei chum bo y naini, ni ly amy i saleaung y vawi teang pajau nai ne.
29 Nangchi ly mani meingtym y awm i py ne sy, huni reitachi ai nangmychi deungrei teaung patawm jojo ai nai tla.
30 “Khumi ai padei, nanai neng hai nai keung ai, pany nai keung leaung nyhrei, ti y baly leaung nyhrei bo y pany nai keung awm khala naini padei teang pajau nai ne. Pany nai keung leaungrei i neng hai nai hawi ly huni khumi ai padei ai nai avo y. Ref 35:30 Leu 17:6, 19:15
31 Khumi ai padei nai keung ai ly padei teang ai nai tla. Ni ly tlang ai atleu nai tangka pei iy dei ai naira i law tleaung vui ai nai avo y.
32 Ni ly law tleaungra nga ai nai abyhra mary mang y angpreng vui baly, pathyp pi nai keung kalen keh dei y rai khala, my i saleaung y vawi ai nai molam tangka pei baly talam ai nai tlo y.
33 Tangka talam lawh baly nangchi i awm nai pri y chai y naira tym ai. Khumi ai padei nai ly pri y chai hai y nai ne. Hunai deaungkho y pri y khumi leaungrei ai padei lawh baly, padei nai keung ai padei teang iy naini, huni pri y chai hai teang thai nai ne.
34 Kai ly Areng ne iy, Israela khumichi theung y kaawm hai nai ne; hunai deaungkho y nangmychi i pri ai amneaung hai moh,” napi.