36
Deaung nang nai neampachychi amtym ai nai yhmtheaung
1 Josepha i katu pa-nyh, Manase i katu, Makhira i chapo Kilead nupai theung i yhm dengtheung luchi ly Mosi hawi takhra lu sa nai keungchi teng y chei u iy,
2 nichi my, “Areng i leu pei nai kamta nangmychi my tambe va iy Israela khumichi teng y Kanan pri paji pi bo. Mymy ly achi i amjo amnau Zelopheh i chaniuchi ai py khaileaung amtym ai nai nangchi teng y leu pei nai ne.Ref 36:2 Kati 27:7
3 Na i py huni neampachychi ly takhra theaung neampachochi hawi apom lawh baly, nichi i amtym nai khaileaung ly huni neampacho i theaung kiu y tym vui ai i, kaichi i phy pi nai khu ka-peang ly theang dudu ai.
4 Jo vui chum nai vawn bawibawichi pei ali teang nai Jubila saneng tym nai khala, Zelophehad chaniuchi i khaileaung ly nichi hawi apom nai theaung khumichi kiu y tym jojo ai i, kaichi theaung i vui ly sum nai ne,” napi u.
5 Hunai deaungkho y Mosi ly Areng my leu pei nai kamta, Israela khumichi teng y thui pi nai ne. Mymy ly “Manase theaungchi i thui nai ly teng i,
6 Areng my, ‘Zelophehad i chaniuchi ly mymychi kangai mani neampacho hawi py apom pajau; na i py huni neampacho ly amychi i cheng theaung kypkyp ne ai nai tla,’ napi.
7 Israela chengchi i amtym nai khaileaung ly amychi cheng theaung ny y naimy, takhra cheng theungchi i kiu y pei vui ai nai avo y.
8 Israela cheng theaung theung y khaileaung amtym ai nai nga nai neampachy luteng ly amy cheng theaung neampacho hawi naini apom ai nai tla. Hina nai kamta Israela chengchi ly amsi pajochi i khaileaung amtym ai nai nga nai deaungkho y,
9 khaileaung ly theaung harei kiu i nai takhra theaung harei i kiu y tym vui ai ny y. Cheng theaung tleirei ly amy i khaileaung amtym jojo ai ,” napi.
10-11 Hunai deaungkho y Zelophehad i chaniu napi nai Mahlah, Tirzah, Hokalah, Milkah hawi Noahchi ly Areng my Mosi teng y leu pei nai kamta, mymychi i nupai neampachochi hawi apom u nai ne.
12 Nichi ly Josepha i chapo Manase theaungchi hawi apom u nai deaungkho y, nichi i amtym nai khaileaung ly ampo i cheng theaung theung y awm jojo bo.
13 Hini reita leu pei naichi ly Jeriko mary kangka Jordan tavo peang Moba adym y Areng my Mosi dengdairei Israela chengchi i vui y pei pi nai reitachi ne.