31
Midian khumichi ai tamyh nai tavai
1 Areng my Mosi teng y,
2 “Israela chengchi i vui Midian chengchi ai vawitheung tha. Huni kalop sa pajau nai bo y nang ly dei ai,” napi.
3 Hunai deaungkho y Mosi ly Israela chengchi teng y, “Midian chengchi ly Areng i tlang tleaung y sa tamang nai deaungkho y, nichi ai tiu ai nai angvei u rym.
4 Tavai atiu ai nai Israela cheng theaung theung i, theaung harei y khumi leaung sangrei thau ai nai tla,” napi.
5 Hunai deaungkho y tavai thau ai nai Israela cheng theaung theung i khumi leaung sangrei, bawibawi ly leaung 12,000 reichi ai vawi takhra u bo.
6 Naibaly Mosi ly pathyp pi nai keung Eleaza i chapo Phineha ai Israela tavaimi kamkawm ai lu sa hai bo. Ni hawi vanrei Tabynako i vui ateaung alangchi hawi, tavai pachyh nai bawchi py syn u bo.
7 Areng my Mosi teng y leu pei nai kamta, nichi ly Midian chengchi ai tiu u i,
8 Midian samrang leaung pangreichi Evi, Rekem, Zura, Hura hawi Rebachi raurei, neampacho bawibawichi ai tleh pawn nai ne. Beora i chapo Balam ai py tleh vui bo.
9 Israela chengchi ly Midian neampachychi hawi deaungdichi ai patiu iy nichi i si, beram, tawnbawichi hawi vanrei, yhmtheaung katui ngiereichi ai la pi pawn bo.
10 Naibaly nichi i mary hawi tai naira ngiereichi ai py, mai leng iy taphra pi pawn nai ne.
11 Nichi ly tavai tiura i nga nai vawnchi, langheng y hawi naichi hawi tawnbawichi py,
12 Jeriko mary kangka Jordan tavo peang i Moba adym y tai nai Mosi, Eleaza hawi Israela chengchi teng y syn pi u bo.
Tavaimichi vawi ali teang nai
13 Mosi, Eleaza hawi khumi mipuichi ai lu sa nai bawibawichi ly tai angam mang y theu u iy, tavaimichi ai lamchung u bo.
14 Na i py Mosi ly tavai keung i vawi nai tavailu areng, tavailu hawi miteaung kehchi ai kado theu hai nai ne.
15 Ni ly nichi teng y, “Nangchi ly ati mana nai ly neampachy bawibawichi ai kangheng khai u lawh mo?
16 Hini neampachychi ly Balam my tau pei nai kamta, Peor meingtym y awm nai thym khala Areng ai ym y ai nai Israela neampachochi ai taphra nai ly pany u. Huna nai kamngo sa nai molam y, Areng i khumichi ai no kanghawi tym hai nai ne.Ref 31:16 Kati 25:1-9
17 Hunai deaungkho y neampacho deaungdichi hawi neampachochi hawi apha reng nai neampachy ngiereichi ai ly tleh u pawn.
18 Na i py neampachy deaungdichi hawi anglochi ai ly nangmychi i vui kangheng khai u.
19 Nangchi theung y khumi ai padei nai hawi khumi kadei ai nam nai khumi bawibawichi ly tai naira angam mang y kani saryhrei awm u ai nai tla. Pa-thom kani hawi saryh kani khala, nangchi hawi nangmychi my patiu nai neampachychi i vui reita leaungsai y kachai sa pi ai nai tla.
20 Nangchi i baichu ateaung alangchi hawi mawi peih, mi-i mui, ti y baly dengkeaung hawi sa nai atiti ngiereichi py pachai u ai nai tla,” napi.
21 Pathyp pi nai keung Eleaza my py, tavai keung i vawi nai tavai michi teng y, “Areng my Mosi teng y pei nai reitachi ly
22-23 muku, tangka, kheupaja, tamo, sawn, kima napi nai mai kang thai y nai vawn ngiereichi ai ly mai y pachai ai nai tla. Takhra tamo ngan ateaungchi ai ly kachai sa nai tui hawi pachai ai nai tla.
24 Saryh kani y ly nangchi i baichu ateaung alangchi pasiu ai nai tla. Huni bo y nangchi ly reita y chai u ai i, tai naira theung y kun u ali teang ai nai nga u bo,” napi.
Tavai keung i nga nai vawnchi aphy nai
25 Areng my Mosi teng y,
26 “Nang hawi Eleaza ly khumi mipuichi ai lu sa nai keungchi hawi vanrei, langheng y hawi naichi hawi tawnbawichi raurei, tavai keung y nga nai vawnsai bawibawichi ai py kati ai nai tla.
27 Huni vawnsaichi ai kangngeng riri phy nyhrei phy iy, phyrei ly tavaimichi ai paji pi ly takhra phyrei nai ai ly khumi humchi ai phy pi ai nai tla.
28 Tavaimichi i vui phy pi nai theung i, langheng y hawi nai khumi leaung chungvai pangrei y leaungrei, hunai kamta teang sichi, keaungngo kano kasauchi, beramchi, mi-ichi py phy pi ly Areng i vui akeu palawn iy pakhaw ai nai tla.
29 Areng teng y talam ai nai khai takhra nai phy ai ly pathyp pi nai keung Eleaza teng y au ai nai tla.
30 Khumi mipuichi i vui phy pi nai theung i, langheng y hawi nai khumi leaung vui pangrei y leaungrei, hunai kamta teang sichi, keaungngo kano kasauchi, beramchi, mi-ichi py phy pi ly Areng i Tabynako kry nai Levi theaungchi teng y pei pi ai nai tla,” napi.
31 Mosi hawi Eleaza nini ly Areng i leu pei nai kamta sa hawi bo.
32-35 Tavaimi mychi i nga kym nai vawnsaichi bo y, tavai keung y nga nai khumi hawi tawnbawichi i vuikanai ly hijirei ne. Beram hawi mi-i vuikanai ly 675,000rei, si ly 72,000rei, keaungngo kano kasau ly 61,000rei, anglo ka-cheang vuikanai ly 32,000rei ne.
36-40 Tavai michi nga nai phy ka-hyhrei ly beram hawi mi-i 337,500rei ne; huni theung i Areng i vui akeu palawn iy talam ai nai vuikanai ly 675rei ne; tava michi i vui phy pi nai si ly 36,000rei ne. Huni theung i Areng i vui akeu palawn iy talam ai nai vuikanai ly 72rei ne; tavaimichi i vui phy pi nai keaungngo kano kasau vuikanai ly 30,500rei ne. Huni theung i Areng i vui akeu palawn iy talam ai nai vuikanai ly 61rei ne. Tavaimichi i vui phy pi nai anglo vuikanai ly leaung 16,000rei ne. Huni theung i nai Areng i vui akeu palawn iy talam ai nai vuikanai ly leaung 32rei ne.
41 Hunai deaungkho y Areng my leu pei nai kamta, Mosi ly Areng teng y talam ai nai khai patyp nai phy ai ly Mosi my Eleaza teng y au pi nai ne.
42-46 Khumi mipuichi i vui phy pi nai py, tavaimichi i vui phy pi nai kamta ne teang: beram hawi mi-i 337,500rei, si ly 36,000rei, keaungngo kano kasau ly 30,500rei, anglo vuikanai ly 16,000rei ne.
47 Mosi ly huni phy nga nai theung i langheng hawi nai hawi tawnbawichi ai phy vui pangrei y phyrei la iy, Areng my leu pei nai kamta Areng i Tabynako ai kry nai Levi theaungchi ai pei pi nai ne.
48 Naibaly tavailu arengchi ly Mosi teng y chei u iy,
49 satang thai hai nai ly “Kaichi i leu anui y awm nai tavaimichi ai kaichi my kati nai khala, leaungrei py chau y nai ne.
50 Hunai deaungkho y kaichi leaung leaungrei nga nai muku ateaung alang, akawi ka-si, ka-si, kiusabyh, kano amcho hawi chaivawn leangchi ai nang teng y kang syn pi bawibawi bo. Areng my kaichi ai deira i tleaung hai nai deaungkho y, huni ateaung alangchi kang talam pi bo. Huna nai y mymy ly kaichi ai ama hai ai,” nanai thui pi u.
51 Mosi hawi Eleaza nini ly huni muku ateaung alangchi ai talam hawi bo.
52 Tavailu arengchi my au nai ateaung alang bawibawichi i kaji ly sie chungvai tariurei tahm awm nai ne.
53 Tavailu ny y nai risachi ly mymychi i nga nai vawnsaichi ai nga u kym bo.
54 Areng ly Israela chengchi ai ama hai ai nai Mosi hawi Eleaza nini ly mukuchi ai Tabynako mang y syn hawi bo.