30
Vaineng sa nai reitachi
1 Mosi ly vaineng abeu nai i vui y hini reitachi, Israela cheng theaung lu sa naichi teng y thui pi nai ne.
2 Khumi ami mo leaungrei ly Areng teng y ati mo ha harei talam ai nai adeu nai py ne sy, ati mo sai sairei amkyn ai nai vaineng abeu nai py ne sy, huni vaineng taphra ai nai tlo y. Vaineng abeu nai kamta takhawi y pa-rei sa takengkei ai nai tla.Ref 30:2 Leu 23:21-23. Mt 5:33
3 Ampo i kry nai anui y awm nai anglo leaungrei ly Areng teng y ati mo ha harei talam ai nai leu adeu nai py ne sy, ati mo sai sairei amkyn ai nai vaineng abeu nai py ne sy,
4 ampo my pany iy paka y lawh baly, ni ly vaineng abeu nai kamta khyp sa takengkei ai nai tla.
5 Na i py ampo pany iy kam lawh baly, ni ly vaineng abeu nai kamta sa ai nai tlo y. Ampo my kam nai molam y vaineng phra nai ne i py Areng my pahen pi ai nai ne.
6 Deaung nang y rai nai neampachy leaungrei ly pany nai tlang tleaung y py ne sy, athang khailai y naimy py ne sy, sai sairei amkyn ai, nanai vaineng abeu nai bo y yhmtheaung sa lawh baly, ni i juvo my pany iy paka y baly,
7 ni ly vaineng abeu nai kamta khyp sa takengkei ai nai tla.
8 Juvo pany iy kam lawh baly, ni i vaineng abeu nai kamta sa ai nai aly ngai y, Areng ly ni ai pahen pi ai nai ne.
9 Neampachy lumai py ne sy, juvo ka-khai neampachy py ne sy, amy i vaineng abeu nai ly sa khyp ai nai tla.
10 Juvo awm nai neampachy ly ati mo sai sairei amkyn ai nai vaineng abeu i, ni i juvo my pany iy paka y baly,
11 ni ly my i vaineng abeu nai ly sa khyp ai nai tla.
12 Na i py ni i juvo my pany iy kam lawh baly, ni ly vaineng abeu nai kamta sa ai nai aly ngai y leang, juvo my paka nai molam y vaineng phra i py, Areng my pahen pi ai nai ne.
13 Ni i juvo ly my i vaineng abeu nai ai, vaineng lawi ai nai mo, lawi hai y ai nai mo, sa pi pajau nai ne.
14 Na i py juvo ly aju i vaineng abeu nai satang thai nai kani y kam y lawh baly, aju ly my i vaineng abeu nai sa khyp ai nai tla. Juvo my pany nai kani y paka y nai deaungkho y ngai hai nai tla.
15 Ni ly kanirei nai bo khala, aju i vaineng abeu nai taphra lawh baly, vaineng phra nai molam y pajengra avum ai.
16 Hini reitachi ly ampo i yhm tleaung y awm nai chaniu anglo hawi yhmtheaung sa nai neampachychi i vui y Areng my Mosi teng y pei nai reitachi ne.