32
Jordan tavo nisi mang i cheng theaungchi
(Leu 3:12-22)
1 Ruben theaung hawi Kad theaung ly tawnbawi khri pa-rei nawi nai ne. Jaze pri hawi Kilead pri y sui tlaira meingtym kahawichi awm nai pany nai khala,
2 nichi ly Mosi, Eleaza hawi khumi mipuichi ai lu sa nai keungchi teng y chei u iy,
3-4 “Areng my sabawm nai deaungkho y Israela chengchi my peang vui nai Ataroth mary, Dibon mary, Jaze mary, Nimrah mary, Hesabon mary, Elealeh mary, Sibmah mary, Nibo mary hawi Beon mary meingtymchi ly sui tlaira meingtym kahawichi ne. Kaichi ly tawnbawi kanghu neangneang awm.
5 Hunai deaungkho y huni meingtymchira y kaichi awm ai nai pei kyh. Kaichi ai Jordan tavo angpeang hai iy hu y awm hai moh kyh ba,” nanai takeng u.
6 Naibaly Mosi my, “Nangchi nupaichi tavai thau u nai thym khala, nangchi ly hini meingtym y awm u jo ai ngai nai sai a?
7 Israela chengchi ly Jordan tavo angpeang iy, Areng my pei ai nai pri y kun ai nai molam, nangchi ly ati mana nai y, nichi ai atho si hai lawh mo?
8 Kai ly nangchi i amsi pajochi ai huni pri khen paviu hai ai nai Kadesa Barnea meingtym dengdairei kang pato nai thym khala, nichi ly khumichi ai atho si hai reng bo.Ref 32:8-9 Kati 13:17-33
9 Nichi ly Esakola leaunghawi mang y khrairei chei u iy, huni pri niu chum baly vawi u ali teang nai khala, Areng my pei ai nai pri y kun ai nai molam mipuichi ai nichi my atho si hai u lawh.
10 Huna nai khala Areng ly huni kani y kado theu i, Ref 32:10-13 Kati 14:26-35
11 ‘Nichi ly kai i leu tangai u y nai deaungkho y, Aikupta pri i theu naichi theung i saneng apomrei hawi leng, neampacho ami py Abraham, Isaka, Jakobchi teng y kaimy adeu nai pri y kun ai ny y,’ nanai tau iy leu pei yb bo.
12 Huna nai pajengra pei naichi theung y Kenizi cheng Jephonneh i chapo Kaleb hawi Nun i chapo Josua nini ly abawi y leang. Nini ly Areng i ka-ym awm nai khumi ne.
13 Areng ly Israela chengchi ai kado theu hai nai deaungkho y, mymy ai ka-awi sa nai kangpreangchi ai dei hai be ai nai pa-rei, nichi ai daichi ka-vym theung y saneng vui palyhrei amki hai nai ne.
14 Amsi pajochi i kamngolai y, vai nangchi py kamngo sa nai kangpreangchi lawm u bo. Hunai deaungkho y nangchi ly Areng i khri pa-rei kado theu naira ly Israela chengchi i tlang tleaung y tym hai bi ai nai sa u nai bo.
15 Ruben hawi Kad theaung nangchi ly Areng i nithun abang ai nai akhi u baly, mymy ly Israela cheng bawibawichi ai daichi ka-vym y ang khai su bi ai. Hunaibaly nangchi i molam y nichi bawibawi py phra naira tym u ai,” nanai pathang bo.
16 Naibaly nichi ly Mosi sahawi y chei u iy, “Kaichi i beramchi khai ai nai lengseaung apaichi py, kaichi teng y abyh nai khumichi awm ai nai khaw parai nai apai awm nai marychi sa ai nai py pei kyh.
17 Naibaly kaichi ly amychi cheng my amtym ai nai pri y saleaung khuteng sa nai pa-rei, nichi ai lu sa iy tavai thau ai. Huni thym khala kaichi teng y abyh naichi ly khaw nai marychi theung y awm thai ai i, hini pri y awm nai paleung ka-echi kiu i nai chymme naira nga ai.
18 Takhra Israela bawibawichi ly mymychi awm ai nai pri y amtym y ryrei ly kaichi ly amy i yhm y vawi teang y leang bo.
19 Jordan tavo nisi mang y kaichi i vui khu ka-peang phy pi yb nai deaungkho y, nidym ngan mang i khu ka-peang ai ly paleung no bi y leang bo,” nanai thui pi u nai ne.
20 Naibaly Mosi my, “Nangchi i thui nai kamta sa khyp ai na baly, tavai thau ai nai Areng i mo y angvei u rym.
21 Nangchi i tavaimi bawibawichi ly Jordan tavo angpeang u iy, Areng i leu tangai naimy, achi i paleung ka-echi ai tiu nai eaung hai y ryrei ly
22 pri peang vui ai nai pa-rei tiu jojo ai nai tla. Hunaibaly nangchi ly Areng hawi amy chengchi i vui sa pi pajau nai deaungkho y, hi y vawi ali teang pajau bo. Huna nai khala Jordan tavo nisi mang i hini pri ly nangchi i phy ne, nanai Areng my pany pi ai.
23 Na i py nangchi ly leu adeu nai taphra baly, Areng i tlang tleaung y sa tamang nai lawm ai. Huna nai khala nangchi ly pajeng naira avum takengkei ai. Hini molam y tamang u moh.
24 Hunai deaungkho y nangchi ly marychi hawi beram haichi so u; na i py nangmychi i leu ka-deu ly taphra u moh!” napi.
25 Huna nai khala Kad theaung hawi Ruben theungchi my, “Nang i leu pei nai kamta kaichi sa khyp ai mang.
26 Kaimychi i ajuchi hawi cho chanauchi, sichi hawi beramchi ly hini kilead marychi theung y khai jo ai.
27 Na i py kaichi bawibawi ly Areng i leu pei nai tangai iy, tavai thau ai nai kangvei u rym bo. Nang i leu pei nai kamta kaichi ly Jordan tavo angpeang iy paleung ka-echi ai tiu ai,” nanai Mosi teng y adeu u bo.
28 Hunai deaungkho y Mosi my Eleaza, Josua hawi takhra Israela lu sa nai keungchi teng y,
29 “Kad theaung hawi Ruben theaungchi ly Areng i leu pei nai kamta Jordan tavo angpeang iy tavai thau i py, nangchi ly nichi my sabawm nai saho y, huni pri ai eaung lawh teu i py, Kilead pri ly nichi amtym ai nai pei pi.
30 Na i py nichi ly nangchi hawi Jordan tavo angpeang u y iy, nangchi hawi vanrei tavai thau u y lawh baly, nangmychi kamta Kanan pri theung y naini, nichi ai phy pi ai nai tla,” napi.
31 Kad theaung hawi Ruben theaungchi my, “Kaichi ly Areng i leu pei nai kamta sa ai.
32 Kaichi ly Jordan nisi mang i pri amtym ai nai Areng my leu pei nai kamta tangai iy, Kanan pri mang y angpeang naimy tavai thau u ai,” nanai pathang u bo.Ref 32:28-32 Josua 1:12-15
33 Hunai deaungkho y Mosi ly Amori samrang Sihon hawi Bashan samrang Oka nini i peang nai khu ka-peang raurei, tengpang sahawi i marychi ai Kad theaung, Ruben theaung hawi Manase theaung ka-hyhreichi teng y jyh pi nai ne.
34 Kad theaungchi ly Dibon mary, Ataroth mary, Aroer mary,
35 Ataroth Sophan mary, Jaza mary, Jokbeha mary,
36 Benimrah mary hawi Beth Haran mary napi nai marychi ai apai kakhaw palum u teang bo.
37 Ruben theaung my, Hesabon mary, Elealeh mary, Kiriathaim mary,
38 Nebo mary, Bala Meon mary (Huni ly amyn palai vui bo) hawi Sibmah marychi ai palum u teang bo. Nichi i palum teang nai marychi ai amyn kangtha pathi u teang nai ne.
39 Manase i chapo Makhira nupaichi ly Kilead pri ai tiu chum baly, huni pri y awm nai Amori chengchi ai patheu iy pri peang vui bo.
40 Hunai deaungkho y Mosi ly Makhira nupaichi ai Kilead pri pei pi i, nichi ly huni pri y awm u nai ne.
41 Manase theaung i Ja-ira ly avang phyrei ai tiu nai pajau i, “Ja-ira i avangchi,” nanai amyn pathi bo.
42 Noba ly Kenath mary hawi sahawi i avangchi ai tiu nai pajau vui i, my i amyn Noba mary, nanai amyn pathi nai ne.