29
Saneng kangtha pawi y katalamrachi
(Lev 23:23-25)
1 Nangchi ly saryh lo, angchei i kani y jeu achu iy chiu ai nai tla. Huni kani y ly kalop sa ai nai tlo y. Huni kani y bawchi eng ai nai tla.
2 Areng teng y no-na by y nai si katai beaungjeaung harei, beram katai harei hawi sanengrei awm khyh nai beram katai saryhrei, hunichi ai Areng my kawn pi ai nai mui kahawi palawn iy leng patlum ai nai tla.
3 Leng patlum nai kapathypra hawi vanrei, olive asitui katlen nai tako dei ai teicha teinei katalamra y palawn iy talam ai nai tla. Si katai hawi vanrei tako dei sie saryhrei py, beram katai hawi vanrei tako dei sie pangrei py,
4 beram cho ha harei hawi vanrei tako dei sie thomrei py talam ai nai tla.
5 Huni bo y kamngo pahen nai katalamra i vui y, mi-i katai harei py talam ai nai tla. Hina nai kamta khumichi i vui reita leaungsai y kachai sa pi ai nai tla.
6 Lo tleirei, lo si kani harei kani y talam nai leng patlum nai katalamra, huni hawi vanrei teicha teinei katalamra, kani tleirei leng patlum nai katalamra, huni hawi vanrei teicha teinei katalamra, kreip hang katalamra bo y, hini katalamrachi py talam ai tla. Hini teicha teinei katalamrachi i mui kahawi ai ly Areng my kawn pi nai ne.
Kamngo pahen nai kani i katalamrachi
(Lev 23:26-32)
7 Nangchi ly saryh lo kani horei kani y jeu achu iy, chiu sa ai nai tla, huni kani y teicha teinei cha ai nai tlo y, kalop py so u moh.Ref 29:7-11 Lev 16:29-34
8 No-na by y nai si katai harei, beram katai harei hawi sanengrei awm khyh nai beram katai saryhreichi ai Areng my kawn pi ai nai mui kahawi palawn iy leng patlum ai nai tla.
9 Leng patlum nai katalamra hawi vanrei, olive asitui katlen nai tako dei ly teicha teinei katalamra y talam ai nai tla. Si katai hawi vanrei tako dei sie saryhrei py, beram katai hawi vanrei tako dei sie pangrei py,
10 beram cho ha harei hawi vanrei tako dei sie thomrei py talam ai nai tla.
11 Huni bo y reita leaungsai i vui y kachai sa ai nai talam nai mi-i katai, kani tleirei leng patlum nai katalamra hawi vanrei, teicha teinei katalamra, kreip hang talam nai bo y kamngo pahen naira nga ai nai mi-i katai harei talam ai nai tla.
Taichy pawi katalamrachi
(Levi 23:33-44)
12 Nangchi ly saryh lo kani holai pangrei kani y, jeu achu iy chiu sa ai nai tla. Areng i nang parai nai ai palo nai hini pawi ly kani saryhrei sa ai nai tla, huni sala ly kalop so u moh.Ref 29:12-38 Theu 23:16; 34:22, Leu 16:13-15
13 Angchei kani y no-na by y nai si katai beaungjeaung holai thomrei, beram katai nyh rei hawi sanengrei awm khyh nai beram katai holai palyhreichi ai, Areng my kawn pi ai nai mui kahawi palawn iy leng patlum ai nai tla.
14 Leng patlum nai katalamra hawi vanrei, olive asitui katlen nai tako dei ai teicha teinei katalamra palawn iy talam ai nai tla. Si katai ha harei hawi vanrei tako dei sie saryhrei py, beram katai harei hawi vanrei tako dei sie pangrei py,
15 beram cho ha harei hawi vanrei tako dei sie thomrei py, aly ngai nai kreip hang katalamrachi py talam ai nai tla.
16 Huni bo y kamngo pahen nai kapathypra i vui y mi-i katai harei py talam ai nai tla. Hini katalamrachi ly kani tleirei leng patlum nai hawi vanrei teicha teinei katalamra, kreip hang talam nai bo y talam ai nai tla.
17 Pa-nyh kani y no-na by y nai si katai beaungjeaung holai nyhrei, beram katai nyhrei hawi sanengrei awm khyh nai beram katai holai palyhrei talam ai nai tla.
18-19 Huni bo y angchei i kani i vui y talam nai katalamrachi py talam ai tla nai ne.
20 Pa-thom kani y ly no-na by y nai si katai beaungjeaung holai harei, beram katai nyhrei hawi sanengrei awm khyh nai beram katai holai palyhrei talam ai nai tla.
21-22 Huni bo y angchei kani i vui y talam nai katalamrachi py talam ai nai tla.
23 Palyh kani y no-na by y nai si katai beaungjeaung horei, beram katai nyhrei hawi sanengrei awm khyh nai beram katai holai palyhrei talam ai nai tla.
24-25 Huni bo y angchei kani i vui y talam nai katalamra py talam ai nai tla nai ne.
26 Pa-ngo kani y no-na by y nai si katai beaungjeaung takawrei, beram katai nyhrei hawi sanengrei awm khyh nai beram katai holai palyhrei talam ai nai tla.
27-28 Huni bo y angchei kani i vui y talam nai katalamrachi py talam ai nai tla.
29 Tariu kani y no-na by y nai si katai beaungjeaung tajarei, beram katai nyhrei hawi sanengrei awm khyh nai beram katai holai palyhrei talam ai nai tla.
30-31 Huni bo y angchei kani i vui y talam nai katalamrachi py talam ai nai tla.
32 Saryh kani y no-na by y nai si katai beaungjeaung saryhrei, beram katai nyhrei hawi sanengrei awm khyh nai beram katai holai palyhrei py talam ai nai tla.
33-34 Huni y angchei kani i vui y talam nai katalamrachi py talam ai nai tla.
35 Tajarei kani y ly nangchi jeu achu iy chiu sa ai nai tla, huni kani y kalop sa ai nai tlo y.
36 No-na by y nai si katai beaungjeaung harei, beram katai harei hawi sanengrei awm khyh nai beram katai saryhreichi ai, Areng my kawn pi nai mui kahawi palawn iy, teicha teinei talam nai kamta leng patlum ai nai tla.
37-38 Huni bo y angchei kani i vui y talam nai katalamrachi py talam ai nai tla.
39 Hini reitachi ly dawn yb nai Pawi kani khala, Areng teng y talam ai nai leng patlum naichi, teicha teinei talam naichi, kreip hang talam naichi hawi leunghawi katalamrachi i vui reitachi ne. Hini katalamrachi ly leu ka-deu katalamra, paleung kangai katalamrachi bo y Areng my leu pei nai katalamrachi ne.
40 Hunai deaungkho y Mosi ly Areng my leu pei nai ngiereichi Israela chengchi teng y amti pi nai ne.