3
1 Tiu lawm nai avum ai nai, nang chawn nai mary,
li-tapawp iy khumi ai padei reng nai mary ly taham si .
2 Khyh pakhau nai katyn,
ka-ri amli nai katyn,
keaungngo muiken katyn,
tavai keaungngo ka-ri athyh nai raawi tangai cham!
3 Keaungngo atang nai risachi ly athorei my tiu u i,
nichi i haisauchi hawi tivichi ly angvang thlithlup na!
Kati pajau y na pa-rei nawi nanai
khumi kadei veuchi ly apeung su na bo.
Khumichi py huni veuchi salo y atlym u na bo.
4 Ninevi mary napi nai bimanu ly pajeng naira avum bo.
Ni ly khumichi i paleung tlawn na pa-rei, mo-cha hawi nai deaungkho y,
khumi neangneangchi i paleung ai parawi i, amtlau hai bo.
5 Ati cheaungkhang sa thai nai Areng my,
“Aw Ninevi mary, kai ly nang ai kang pajeng ai!
Tlang ka-keu awm hai iy,
khumi cheaungkhangchi ai khen ai nai pei ai.
Nang i kangji nga nai ly prichi my niu u ai.
6 Kai ly amso ngai nai hawimy nang hawi amkawm iy,
anyn angso hawimy kang taphum ai.
Khumichi ly nang i tlang tleaung y paleung no-ei naimy khen u ripati ai.
7 Nang ai niu nai khumi bawibawichi ly nithun mang y anaw u ai.
Nichi my, ‘Ninevi mary ly phra seaungkhrang veng bo!
Huni mary ai ami my pahen ai mo?
Ami nai ly paleung pahawi pi ai mo?,’ ” nanai thui u ai.
8 Aw Ninevi mary awi, nang ly Aikupta pri i mary pui thebe mary tleaung y hawi keh sai a? Huni maryra py mary apai kamta ama hai nai tavo harei awm. Naing tavo ly huni mary i ama hai naira ne.
9 thebe mary ly Ethiopia hawi Aikupta pri ai peang. Pata pajau y nanai pa-rei sa thai naira kawi bo. Libia pri ly Aikupta pri hawi amsawi amnai ne i py,
10 thebe mary i khumichi ly pri pala naira avum u iy, nichi i cho chanauchi ly lam sangum tleirei y, khyh pakhau nai avum u bo. Nichi theung i tahm awm nai khumichi ai sengkry hawi pakheng iy, mychi tengtawi tambe va i aphy u bo.
11 Aw Ninevi mary awi, nang ly pavui tapai naimy, paleung ka-echi kiu i law tleaung ai nai atho sa ai.
12 Nang i amtangra ngiereichi ly athai kangmyn awm nai thaidu keungchi hawi atawm iy, keung tahyn baly cha ai ngai nai khumi i labeaung kho y athaichi athun ai!
13 Nang i tavaimi risachi ly neampachychi kamta lawm iy, nang i pri y awm nai apai katheuchi py, paleung ka-echi mo y amtang hai pajau y nai am-eaung su bo. Nang i mary apai katheu angtleangrachi ly mai my kang pawn ai.
14 Mary amtang hai pajau ai nai tui deu u. Amtangrachira y atho aeng hai u! Iukhi sa ai nai khaileaung laikan chiu piupa iy, iukhi lawm nai yhmchi so u rym!
15 Nang ly mana mo sa i py, mai my kang iy tavai keung y dei ai. Akhu-tamachi my cha nai amti amjangchi kamta, nang ly tama ai.
Nang ly akhutamachi kamta khumi vuikanai peung hai bo!
16 Kani mang ka-si taukichi tleaung y nawi nai ka-sum ka-pai sa nai khumichi peung hai pi bo! Na i py mychi i pakhi kadai iy akheang pawn nai akhutama michi kamta, huni khumichi ly theu u pawn ai.
17 Nang i tamcheaungchi hawi bangtangchi ly savai nai dym y dengpangchira chym iy, kani si baly akheang veng nai deaungkho y, manira y tym nai mo, nanai pany y nai akhutama kanghuchi hawi atawm u bo!
18 Aw empara samrang Asuria awi, nang i bangtang kalenchi ly i kamhm ngam u bo. Nang i bangtangchi py dei u be veng bo! Naibaly nang i mipuichi ly mawichira y ahei phro i, nichi ai mychi i pri mang y, pahawi ali teang pi ai nai khumi leaungrei py by y.
19 Nang i angvawi i vui asi by y. Nang i tamo kalemchi ai py hawi pa-rei so thai y. Nang i phra nai satang thai nai khumi bawibawichi ly amo theu naimy kiu tabeang u bo. Amimi py, pata pajau y na pa-rei nang i ana pumpi nai sai avum y nai ha py by y.