HABAKKUK
I AMO LEU
Hini bo i cha-iu theung i leuchi ly khumi hawi y naichi i khym taham si nai molam y amo leu thui nai ne i, amo Habakkuk i tem khala khrairei ym nai sai amny hai iy, Tameuh i nang parai nai sai ai palo nai ly sam khulym hawi patem nai ne.
1
1 Hini leu ly amo Habakkuk teng y, Areng i pany hai nai leu ne.
Teng y nai kalopchi molam y Habakkuk i amti pi nai
2 Aw Areng, kaichi i tlang tleaung y khrukhra naira avum nai khala nang thai tanga pa-rei, “Sabawm kyh ba,” nanai mana tanrei kra na pa-rei aeu iy kang hnei ai mo?
3 Nang ly ati mana nai y kaichi i tlang tleaung y, hina nai ngari kamtang hawi, hawi y naira avum hai lawh mo? Kaichi ly khrukhra naira, lawm taphra nairachi avum nai ne. Meingtym tleirei y ka-jo ka-thui hawi a-ei naichi py avum nai ne.
4 Tara leu reita ly atho di iy teaung ai nai ngo y nai deaungkho y, mana khala py adyh adawi pa-rei chih u thai y. Khumi hawi y naichi ly khumi kahawichi ai kamjau nga u nai deaungkho y, tara chih nai ly tamang khikha na bo.
Areng my pathang pi ali teang nai
5 Naibaly Areng my, mymy i khumichi teng y, “Nangchi ly nangmychi i tengpang sahawi y awm nai khumi cheng cheaungkhangchi ai, ajeng naimy khen patawm u. Naibaly nangchi niu nai leaungsai molam y lyh u ai. Kai ly nangchi thai nai malawn py, ym pajau y nai sai harei sa ai. Ref 1:5 Amtaw 13:41
6 Kai ly ka-jei hawi parai iy awm pypy thai y nai Babulon chengchi ai sa thai naira awm hai ai. Nichi ly pri takhrachi ai tiu ai nai khaileaung y tako prei iy, tavai thau u ai. Ref 1:6 2 Areng 24:2
7 Khumichi ai jei hyn hai iy paleung len amlyh naimy, reita kateng lam so u y ai.
8 “Nichi i keaungngochi ly takaikheng tleaung y rang iy, teicha alam nai kasui tleaung y malawn py jei ai nai hawi. Keaungngo atang nai risachi ly keaungngochi ai kamlo mang dengdairei, athorei my ang jeu hai bo. Nichi i keaungngochi ly khaileaung y muiken hawi kaseu u bo. Nichi ly teicha ni nai ahmtlau kamta, athorei my ang jeu u nai ne.
9 “Nichi i tavaimichi ly athorei my tiu i eaung u bo. Khumichi ly nichi tym nai deaungkho y jei hyn u Nichi i patiu nai langhengchi ly spryh jirei nawi nai ne.
10 Nichi ly pri peang nai samrangchi ai, khumi aniu y nai sa u bo. Samrang i bangtangchi ai panui hai u. Nichi ai mani mo amtangra py paka pajau y. Nichi ly abyhra angawmchi taphum iy, amtangrachi ai tiu pajau vui nai ne.
11 Naibaly mymychi i sa thai naira ai tameuh palawn iy, chiu u nai huni khumichi ly ali kamta, ho parai naimy athawn u pawn bo,” napi.
Habakkuk my Areng teng y amti pi bi nai
12 Aw Areng, nang ly angchei khala i dengdairei Tameuh ne. Nang ly kaichi i Tameuh, Chai parai naimy deungtasarei awm nai ne. Aw Areng, kai i Tameuh hawi abyhra lengseaung, “Nang ly Babulon chengchi ai vawi takhra iy, kaichi ai pajeng thai ai nai nichi ai atho angym hai bo.
13 Na i py nang ly khumi hawi y nai, ka-ym by y nai khumichi tlang tleaung y mana nai kham pi pajau ai mo? Nang i mei ly khri pa-rei chai parai nai ne i, hawi y nai ai khen pajau y. Nang ly khumichi i sa tamang nai py, kham pi pajau y. Hunai deaungkho y amychi tleaung y kabo kaja hawi nai khumichi ai, huni khumichi my taphra nai khala nang ly ati mana nai y awm pypy lawh mo?
14 Nang ly ati mana nai y khumichi ai ngo kamta, mymychi ai peang nai keung by y nai mipo kanghu kamta, lawm hai lawh ai mo?
15 Babulon chengchi ly khumichi ai ngo kamta sakawichi hawi patiu u bo. Nichi ly khumichi ai paleupychi hawi ryh iy patiu thai nai deaungkho y, amo theu nai aeu u sau bo!
16 Nichi ly mychi i paleupychi saho y, cha nei ai nai molam avaw y nai deaungkho y, huni paleupychi ai chiu u iy, kapathyprachi malawn py talam u nai ne.
17 Nichi ly mychi i haisau ai deungrei teaung iy, khumi cheng cheaungkhangchi ai, pahyp y naimy ana iy taphra u na a?