2
Nehemia ly Jerusalem mary y chei nai
1 Lo palyhrei khei nai bo y kanirei nai khala, empara samrang Artazeret biu oh nai thym y, kai ly ni teng y chei iy kreip hang talam pi nai ne. Samrang ly kai i meimai hawi y nai mana khala py niu vai y nai deaungkho y,
2 ni ly kai teng y, “Nang ly ati mana nai y hina tanrei meimai hawi y na mo? Nang ly keaungno nai py by y, nang ly paleung ka-dawn hawi y nai deaungkho y meimai hawi y nai ne ai,” napi.
Hina nai samrang my thui nai khala kai ly athengra naimy kapathang nai ly
3 “Samrang nang ly deungtasarei heng sau na sy; kai i amsichi ai up nai mary ly phra seaungkhrang bo i, mary apaichi py mai y kang pawn nai deaungkho y, kai ly mana nai meimai kahawi awm pajau ai mo?” kanapi.Ref 2.3: 2 Areng 25:8-10; 2 Neng 36:19; Jer 52:12-14
4 Empara samrang my, “Ati amjy hnei ai nai ngai mo?,” nanai deng.
Kai ly kani pri mang y awm nai Tameuh teng y chiu kasa chum baly,
5 samrang teng y, “Samrang awi, nang ly kai ai pahen iy kai i hnei takeng nai kawn pi ai na baly, kai ai Juda pri y chei ai nai pei kyh; kai i amsi pajochi ai up nai mary palum teang ai nai pei ba,” napi.
6 Samrangnu hawi vanrei ateh nai empara samrang ly kai i hnei nai pathang nai bo y kai teng y, “Nang ly chei nai mana tanrei kra ai mo? Mana khala vawi ali teang ai mo?,” nanai ang deng. Kai ly vawi teang ai nai neng pathang pi bo.
7 Naibaly kai ly khuleaungra y aly ngai nai kasabawmra nga ai nai molam, Euphrat tavo pui nidym khu ka-peang samrang i bangtang kalenchi teng y pei ai nai cha hawi,
8 Achura yhm angdeangra apai katheuchi, mary apaichi hawi kaimy awm ai nai yhm i vui py, dengkeaung pei ai nai samrang i daichi peang nai keung Asaph teng y cha patheu pi ai nai takeng. Tameuh ly kai hawi vanrei awm nai deaungkho y, empara samrang ly kai i hnei nai bawibawichi ang pei.
9 Samrang ly tavailu phyreichi hawi keaungngo tavaimi kamkawm ai kai hawi vanrei pato pi nai deaungkho y, kai ly Euphrat tavo pui nidym khu ka-peang mang y khuleaung amsa i, huni meingtym y awm nai samrang i bangtang kalenchi teng y, samrang i chachi pei pi nai ne.
10 Na i py Beth Horon mary i Sanbala hawi, Ammon pri ka-peangra i miteaung keh Tobiah nini ly Israela chengchi ai kahawi sa ai nai khumi leaungrei ang tym, nanai thai baly nini ly khri pa-rei kado theu hawi bo.
11 Kai ly Jerusalem mary mang y kachei patawm i, hu y kani thomrei ni awm;
12 huni bo y kai ly Jerusalem mary ai mana kasa ai mo, nanai Tameuh my kai teng y pany hai nai saichi ly ami teng y py kathui pi y naimy vum anenghyh khala ang thau i, ahawi phyreichi ai palau iy mary angam mang y theu bo. Kaichi ly kaimy i atang nai keaungngo kano kasau bo baly, ati sai py syn y nai ne.
13 Kaichi ly nidym leaunghawi katheu pa-kho mang theu iy, tokalawi naka tui sampum tako prei i, anyn angso aphi nai katheu pa-kho ryrei katako u; huna khala khutawi y leang rai. Kai ly hina nai kamta tako i, anawi seaungkhrang nai apaichi hawi, mai my kang iy phra nai mary katheuchi ai kakhen bo.
14 Naibaly mary nisi ngan mang dengdairei tui sampum apai pa-kho hawi, samrang i tuikan awm nai tosyh mang y khrairei chei bo. Kai i atang nai keaungngo kano kasau ly lengseaung katleuchi sala y lam hau i niu y nai deaungkho y,
15 kai ly Kidron leaunghawi theung mang y satla kathiu prei i, keaungngo kano kasau atang iy mary apai kakhen prei nai ne. Naibaly kai ly huni lam mang vawi ali teang iy, leaunghawi apai pa-kho mang dengdairei mary theung y kun teang bo.
16 Kai ly ma y chei mo, ati kasa mo, nanai mary theung y awm nai miteaung keh ami py pany y. Kai ly vaini khrairei hini molam y Juda cheng pathyp pi nai keungchi, lu sa naichi, miteaung kehchi hawi kai i kalopra y abawi iy sa ai nai khumi takhrachi teng y py, kathui pi y leang rai.
17 Na i py vai kai ly nichi teng y, “Jerusalem mary ly phra seaungkhrang bo i, mary apaichi py atlym pawn nai deaungkho y, achi mana tanrei rai naira avum mo, nanai nangchi pany u bo; achi kangji ngo bi y ai nai mary apaichi palum u teang sina,” nanai thui pi.
18 Tameuh my kai ai ang awm hai iy kai ai sabawm nai sai py, kai ai empara samrang my ati mana leu ang pei mo, nanai py amti pi bo.
Naibaly nichi my, “Sa palum teang ai nai achi amteaung u sina!” nanai thui u i, kalop amteaung ai nai angvei u rym bo.
19 Naibaly huni satang ai Sanbala, Tobiah hawi Arab cheng Keshemchi my thai u nai khala y, kaichi ai ang panui hai nai tarawi y nichimy thui nai ly “Nangchi i katau ly ati mo? Nangchi ly empara samrang ai tiu u nai a?,” ang napi u.
20 Naibaly kaimy, “Kani pri mang y awm nai Tameuh my ly kaichi ai eaung ai nai pei ai; kaichi ly mymy i miseaungchi ne i, sa palum nai kalop amteaung ai; nangchi ly Jerusalem mary theung y ati sai py peang y, hini mary theung y nangchi hawi amtawn abi nai ka-ma-ra sai py by y leang,” napi.