NEHEMIA
Hini cha-iu theung y ly Nehemia i Tameuh ai paleung hawi verei ym nai sai hawi, Tameuh teng y avaw avawrei chiu sa nai saichi ly pany jo ai hawi parai nai ne.
1
1 Hinichi ly Hakaliah i chapo Nehemia i sa nai sai satangchi ne.
Jerusalem mary i vui y Nehemia paleung mawn nai
Pasia empara samrang Artezaret my peang nai saneng apomrei saneng, Kisalu napi nai lo y kai, Nehemia ly Susa mary pui y kaawm.
2 Kai i amjo amnau Hanani hawi, khumi kamkawm harei ly Juda pri i nai tym u; naibaly kai ly nichi teng y pri pala nai chochi Babulon pri i dengdairei tym u ali teang nai Juda amjo amnauchi hawi, Jerusalem mary i satang deng nai ne.
3 Nichi my kai teng y, dei kamthum mychi pri y tym u nai khumichi ly khri pa-rei patang naira avum nai hawi, tengpang sahawi i cheng takhrachi my tahm khai y naira avum nai satangchi py ang thui pi. Naibaly Jerusalem mary apaichi phra naimy awm jo nai py, apai katheuchi py mai my kang nai khala i dengdai vaini khrairei palum teang y rai nai satangchi py ang thui pi.
4 Huni satangchi thai nai khala y kai ly ateh iy kavo bo.
Kai ly kani neangneang vo tangam naimy biu kahai chum baly,
5 Tameuh teng y, “Aw kani pri mang y awm nai Areng Tameuh! Nang ly tahm asang nai deaungkho y kaichi ly jei kaji naimy tahm kang khai u nai ne; nang ly nangmy ai tamen iy leu pei nai tangai nai khumichi hawi leu maikawm asa nai khaw hai bo.
6 Aw Areng, kaichi ai khen ly nang i miseaung Israela chengchi i vui, vum kanithun kai i chiu sa hnei takeng nai tangai pi kyh ba. Israela chengchi ne nai kaichi ly kamngo sa tamang nai khumichi ne, nanai kai my ahui bo. Kaichi i amsi pajochi hawi kai ly kamngo sa bo.
7 Kaichi ly nang i tlang tleaung y hawi y keh nai kamngo kasa u; nang i leu pei naichi katangai u y; nang i miseaung Mosi i dengdairei Reita leu pei naichi patawm u y bo.
8 Nang ly Mosi teng y adeu nai leu ai pany pi jo ba: ‘Nangchi ly kai i leu tangai u y baly, kai ly nangchi ai cheng takhrachi theung y ahei hai ai.Ref 1.8: Lev 26:33
9 Na i py nangchi ly kai teng y ali teang iy kai i leu pei nai tangai u lawh baly, khaileaung pri khuteng y khrairei ahei phro teu i py, nangchi my kai ai chiu ai nai khai takhra nai meingtym mang y kaimy kang pahawi ali teang ai.’Ref 1.9: Leu 30:1-5
10 “Aw Areng, hinichi ly nang i khumichi, nang i miseaungchi ne; nang ly ham parai nai haiho, atho awm nai kiu hawi nichi ai atleu bo.
11 Kai i chiu sa nai py, nang ai tahm khai nai nang i miseaungchi i chiu sa nai ai py, tangai pi kyh ba; vaini kai ai eaung ai nai pei ba. Empara samrang my kai i tlang tleaung y pahen ai nai ka-dawn so pi ba,” nanai kai ly chiu kasa.
Huni neng khala y kai ly empara samrang teng y kreip hang talam pi nai keung ne.