3
Jerusalem mary apai palum teang nai
1 Mary apai palum teang nai sai ly hina nai ne: Pathyp pi nai keung kalen keh Eliashib hawi, ni i ahawi pathyp pi nai keungchi ly beram katheu palum teang iy khai takhra i, katheu dawnchi tai u bo. Nichi ly apai chungvai angdeangra hawi Hananela angdeangra y tym pa-rei sa u bo.
2 Jeriko mary i khumichi ly mary apai phyrei sa u.
Imari i chapo Zakura ly huni bo i phyrei ai sa.
3 Hasenah nupai my ngo katheu sa chum baly, katheu laibeaungchi, katheu dawnchi, katheu angtleangrachi hawi katheu lengteaungchi tai u bo.
4 Huni bo i mary apai phyrei ly Hako i katu, Uriah i chapo Meremoth my sa i, huni bo i phyrei ai ly Meshezabela i katu, Berekhiah i chapo Meshulam my sa.
Huni bo i phyrei ai Baana i chapo Zadok my sa.
5 Huni bo i phyrei ai Tekoa mary i khumichi my sa; na i py mary i miteaung keh kalenchi ly nichi ai pacheang nai keungchi my sa hai nai kalop ai akhi u bo.
6 Naibaly Paseah i chapo Jojada hawi, Besodiah i chapo Meshulam nini ly Jeshana katheu pa-kho sa palum chum baly, katheu laibeaungchi, katheu dawnchi, katheu angtleangrachi hawi katheu lengteaungchi tai u.
7 Huni bo i mary apai phyrei ai ly Kibeon mary i Melatiah, Merono mary i khumi Jadon, Kibeon mary i khumichi hawi Mizapa mary i khumichi my,Euphrat tavo nidym khu ka-peang samrang i bangtang kalen i yhm y tym pa-rei sa u nai ne.
8 Huni bo i phyrei ai ly Hahaiah i chapo paitheng Uziela my sa.
Huni bo i phyrei ai mary apai kakau ryrei, rimui hang sa nai keung Hananiah my sa.
9 Hura i chapo Jerusalem mary ka-hyhrei peang nai keung Riphaiah ly huni bo i mary apai phyrei ai sa.
10 Haruma i chapo Jedaiah ly my i yhm ahawi y awm nai mary apai phyrei ai sa.
Hashabaniah i chapo Hattu ly huni bo i phyrei ai sa nai ne.
11 Harim i chapo Malakhijah hawi, Pahat Moba i chapo Hashu nini ly mary apai phyrei hawi tako takeang angdeangra ai sa hawi bo.
12 Hallohe i chapo Jerusalem mary ka-hyhrei peang nai keung Shalum ly huni bo i phyrei ai sa. (Sa nai kalopra y my i chaniuchi my sabawm nai ne.)
13 Hanun hawi Zanoah mary i khumichi ly leaunghawi katheu pa-kho palum u chum baly, katheu dawnchi, katheu angtleangrachi hawi, katheu lengteaungchi tai u; naibaly apai kasau miu 1,000 rei ai anyn angso aphira katheu pa-kho ryrei sa u nai ne.
14 Rekha i chapo Beth Hakhirem ka-peang ai peang nai keung Malakhijah ly anyn angso aphira katheu pa-kho sa palum teang i, katheu dawnchi, katheu angtleangrachi hawi, katheu lengteaungchi tai.
15 Kolahozeh i chapo, Mizapa ka-peang ai peang nai keung Shalum ly tuipum katheu pa-kho palum teang iy amphu tabiu i, katheu dawnchi, katheu angtleangrachi hawi, katheu lengteaungchi tai; ni ly samrang i akho sahawi, Siloh tuikanra i mary apai ai Davida i mary khaileira tym pa-rei sa nai ne.
16 Azabu i chapo Betzura ka-peang ka-hyhrei ai peang nai keung Nehemia ly huni bo i mary apai phyrei ai Davida i tapreaung, tuikan hawi tavaimichi awmra yhm kasauchi ryrei sa nai ne.
Mary apai sa nai Levi theaungchi
17 Anui mang i Levi theaungchi ly mary apai sa nai kalopra y sabawm nai khumichi ne
Bani i chapo Rehum ly mary apai phyrei ai sa;
Keila ka-peang ka-hyhrei ai peang nai keung Hashabiah ly huni bo i ka-hyhrei ai, my i ka-peang jeng y sa.
18 Huni bo i ka-hyhrei ly Hanada i chapo Keia ka-peang ka-hyhrei ai peang nai keung Bavawi my sa.
19 Jeshua i chapo, Mizapa mary ai peang nai keung Ezera ly tavai ateaungchi khai nai yhm pui mo i mary apai ai, mary taki ryrei sa.
20 Huni bo i ka-hyhrei ai Zabai i chapo Baru ly pathyp pi nai keung kalen keh Eliashib i yhm apai pa-kho ryrei sa.
21 Huni bo i phyrei ai Hako i katu, Uriah i chapo Meremoth ly Eliashib i yhm kachawn ryrei sa nai ne.
Mary apai sa nai pathyp pi nai keungchi
22 Anui mang i pathyp pi nai keungchi ly mary apai sa naira y sabawm naichi ne:
Jerusalem mary tengpang sahawi y awm nai khu ka-peang theung i pathyp pi nai keungchi ly mary apai phyrei ai sa u bo.
23 Huni bo i ka-hyhrei ai Benjamin hawi Hashuchi my, mychi i yhm mo kataw i apai sa u;
Ananiah i katu, Maseja i chapo Azariah ly my i yhm mo katawra i apai phyrei ai sa.
24 Henada i chapo Binnui ly huni bo i phyrei ai, Azariah i yhm dengdai mary taki ryrei sa.
25-26 Uzai i chapo Palal ly mary apai taki hawi, tamcheaung typ nai yhm apai sahawi i samrang yhm angdeangra dengdai amteaung iy, mary apai phyrei ai sa;
Parosh i chapo Pedaiah ly huni bo i phyrei ai, nisi mang i tui apai pa-kho hawi Achura yhm tamcheaung typ nai angdeangra sahawi y tym pa-rei sa. (Hini meingtym ly Achura yhm kalop sa naichi awm nai Jerusalem mary i Ophel, napi nai saleaung y awm nai ne.)
Takhra sa nai khumichi
27 Tekoa mary i khumichi ly Achura yhm tamcheaung typ nai angdeangra yhm pui dengdairei, huni hawi adengdang nai Ophel meingtym mary apai sahawi y tym pa-rei, huni bo i mary apai phyrei ai tlen pa-nyh sa u.
28 Huni bo i phyrei ai pathyp pi nai keung kamkawm harei my, keaungngo apai pa-kho dengdairei tosyh mang, mychi i yhm mo kataw ryrei sa.
29 Immera i chapo Zadok ly my i yhm mo i, mary apai phyrei sa.
Naibaly Shekaniah i chapo, nisi apai pa-kho typ nai keung Shemaiah ly mary apai phyrei sa.
30 Shelemiah i chapo Hananiah hawi Zalap i tariu chapo Hanun nini ly mary apai phyrei ai tlen pa-nyh sa.
Huni bo i phyrei ai Berekhia i chapo Meshulam ly my i yhm mo i mary apai sa.
31 Paitheng Malakhia ly Achura yhm i Miphaka katheu pa-kho hawi, mary apai nisi mang tosyh taki salo y awm nai takun sahawi, Achura yhm y kalop sa naichi hawi, ka-sum ka-pai sa nai khumichi i yhm ryrei, mary apai phyrei sa.
32 Kangkhym i mary apai ai ly paithengchi hawi, ka-sum ka-pai sa nai khumichi my, huni mary apai taki dengdairei beram katheu pa-kho tym pa-rei sa u nai ne.