28
Deira i nai angthau teang nai
(Mk 16:1-10; Lk 24:1-12; Jh 20:1-20)
1 Naibaly Anawn Kani dym mang y kani saryhrei nai angchei i kani khutawi ai nai kha y, Mari Makdilini hawi Mari takhra ly angawm khen ai nai chei hawi bo.
2 Naibaly khen cham, kaleih khri pa-rei theu bo, ati mana nai mo nabaly Areng i kani pri i amtaw thau nai leaungrei ly kani pri mang i dengdairei satla iy, lengseaung ai ly kasyh vui i, salo y ateh bo.
3 Ni i meimai awm nai sai ly amlosadi kamta atawm;
4 mymy i ateaung ly ji kamta kaleung na; naibaly typ nai keungchi ly ni ai jei nai deaungkho y dei nai kamta awm u bo.
5 Naibaly kani pri i amtaw thau nai my ly neampachy nini teng y, “Jei hawi moh; nangni ly kraws tleaung y tahen nai Isu ai hau hawi nai ne, nanai kai pany.
6 Mymy ly hi y by y leang bo: mymy i thui nai kamta angthau teang veng bo ly. Choh, mymy i aseaung nai meingtym khen cham.
7 Naibaly tako hawi kaliki ly, abangnaichi teng y, ‘Mymy ly kadeichi theung i nai angthau teang bo: khen cham, Kalili pri y nangchi i mo y ang tako bo; nangchi ly hu y mymy ai niu ai mang,’ tapi hawi. Khen cham, kang thui pi bo he,” nanai pathang.
8 Naibaly nini ly jei nai hawi khri pa-rei kawn nai tarawi y angawm i dengdairei tako hawi kaliki iy, abangnaichi ai thui pi ai nai angpreng hawi bo.
9 Naibaly khen cham, Isu ly nini hawi avum i, “Noso hawi a?” napi. Hunaibaly nini ly mymy i kheu pakhi y amkhaw iy chiu hawi bo.
10 Naibaly Isu my nini teng y, “Jei moh, tako hawi ly, Kalili pri y chei ai nai kai i amjo amnauchi ai thui pi; nichi ly hu y kai ai niu ai mang,” napi.
Tamcheaungchi my satang thai hai nai
11 Naibaly nini ly tako hawi nai thym khala khen cham, typ nai keung tavaimi phyreichi ly avang pui y kun u iy, atiti tym nai sai bawibawi ly pathyp pi nai keung kalenchi teng y thui pi u bo.
12 Naibaly nichi ly miteaung kehchi hawi achu u i, arum pajau iy tavaimichi ai ly tangka neangneang pei i,
13 “Kaichi vum y i ngym nai sala y abangnaichi ang jeu i, mymy ai paviu veng bo,’ tapi u.
14 Naibaly Aripeng my huni pany baly kaichi my ni ai kam ai, naibaly nangchi ly sai py dawn y han,” napi.
15 Hunaibaly nichi ly tangka la iy nichi i thui pi nai kamta sa u bo; hunaibaly vai khrairei huni leu ly Judachi i theung y thui lengleang jojo rai.
Isu ly abangnaichi teng y amteng pi nai
(Mk 16:14-18; Lk 24:36-49; Jh 20:19-23; Ataw 1.6-8)
16 Na i py abangnai leaung holai hareichi ly Kalili pri y Isu my mawi thui pi rym naira y chei u bo.Ref 28.16: Mt 26.32; Mk 14.28
17 Naibaly nichi ly mymy ai niu iy chiu u bo; na i py phyreichi my ly ym thai y.
18 Hunaibaly Isu ly nichi teng y chei i, nichi hawi arum iy, “Kani y hawi khaileaung y py aly peang naira bawibawi ly kai teng y ang pei nai bo.
19 Hunaibaly cheng cheaungkhangchi ai abang nai khumi palawn ai nai chei u ly, nichi ai Ampo hawi Chapo hawi Philo Kaichai i amyn y baptis so u:Ref 28.19: Ataw 1.8
20 leu kang pei nai bawibawi tangai ai nai nichi ai patiu u. Naibaly khen cham, kaimy kypkyp ly neng tem pa-rei py nangchi teng y kang awm jojo ai,” napi.