27
Isu ai Pilata teng y pahawi nai
(Mk 15:1; Lk 23:1-2; Jh 18:28-32)
1 Naibaly khawn mang y ly pathyp pi nai keung kalenchi hawi khumi hum miteaung kehchi bawibawi ly Isu ai padei ai nai sai arum u bo;
2 naibaly ni ai kawm u i pahawi iy aripeng Pilata teng y au u bo.
Juda i dei nai
(Ataw 1:18-19)
3 Naibaly Juda, mymy ai patiu hai nai keung ly Isu ai pasum bo, nanai pany baly adawn ali i tangka phairei nai ly pathyp pi nai keung kalenchi hawi miteaung kehchi teng y syn teang iy,Ref 27.3–8: Ataw 1.18–19
4 “Kamngo by y nai khumi ai patiu hai nai ly kamngo sa bo kai ly,” napi. Na i py nichi my ly, “Kaichi i vui ly ati mawn naira awm mo? Nangmy ngaingai so,” napi lawh veng.
5 Naibaly ni ly tangka ai ly meingtym kachai y aphi vui iy leh veng i akaeu veng bo.
6 Naibaly pathyp pi nai keung kalenchi ly huni tangka la iy, “Hini ly khai achu nai tangka khai naira y khai ngau y, thi vang teu i,” napi.
7 Hunaibaly arum u i, angvynchi ai up ai nai laawm beu nai keung i meingtym ly van u bo.
8 Hunai deaungkho y huni meingtym ai ly vai khrairei ‘Thi Meingtym,’ napi nai ne.
9 Hunai thym khala y ly amo Jeremia my,Ref 27.9–10: Zek 11.12–13
“Areng ly kai ai leu pei nai kamta
Nichi ly huni tangka phairei la i,
Laawm beu nai keung i meingtym nga ai nai pei bo;
10 Huni vang ly Israela kangpreang phyreichi i
Khumi leaungrei i vang dawn pasym nai ne,” nanai thui nai ly tym bo.
Pilata my Isu ai chih nai
(Mk 15:2-5; Lk 23:3-5; Jh 18:33-38)
11 Naibaly Isu ly aripeng i mo y angdo i aripeng my ly, Nang ly Judachi i samrang ne a? napi nai deng. Naibaly Isu my ly ni teng y, “Nang ly thui khyp bo,” napi.
12 Naibaly pathyp pi nai keung kalenchi hawi miteaung kehchi my ni ai seu nai thym khala y mymy ly sai py pathang y.
13 Hunaibaly Pilata ly mymy teng y, “Nang ai nichi my hina tanrei ang seu nai ly thai y a? ” napi.
14 Naibaly ni ly sai py pathang y; hunaibaly aripeng ly khri pa-rei lyh na.
Isu ai padei ai nai leu pacheang nai
(Mk 15:6-15; Lk 23:14-25; Jh 18:39-19:16)
15 Naibaly aripeng ly pawi sa nai neng khala y ly theaung tla nai khumi leaungrei, khumi humchi i ngai nai ngierei ai ly patheu pi reng.
16 Naibaly hunai thym khala y ly theaung tla nai khumi amyn amthang parai nai, Barabba napi nai leaungrei awm.
17 Hunaibaly nichi ly jeu u achu i Pilata ly nichi teng y, “Nangchi ly ami ai patheu pi ai nai ngai u mo?
18 Barabba ai a? Isu, Krista napi nai ai a?” napi. (Nichi ly paleung ano nai deaungkho y mymy ai patiu hai nai ne, nanai pany bo.)
19 Naibaly ni ly tara chih nai atehra y ateh nai thym khala y aju my ly, “Tuni khumi hawi parai nai i tlang tleaung y ly ati sai py so hai moh; vaini ly mymy deaungkho y kai ly amang mang y atiti paleung si hyh nai amang bo,” napi nai taviu.
20 Naibaly pathyp pi nai keung kalenchi hawi miteaung kehchi my ly Barabba ai hnei iy, Isu ai ly padei ai nai khumi mipuichi ai parawi u bo.
21 Na i py aripeng my ly, “Nini leaung nyhrei ai ly ami ai patheu pi ai nai ngai u mo?” nanai pathang bi.
22 Naibaly nichi my ly, “Barabba ai,” napi. Pilata my ly nichi teng y, “Tumbaly Isu, Krista napi nai ai ly mana kasa ai mo? ” napi. Nichi bawibawi my ly, “Kraws tleaung y tahen hai,” napi.
23 Naibaly ni my ly, “Ati na i bo? Ni i hawi y sa nai ati awm mo? ” napi. Na i py nichi my ly, “Kraws tkeaung y talen hai,” napi nai khri pa-rei aeu na.
24 Hunaibaly Pilata ly sai py so pajau y i, khru ra khru ra ai, nanai pany iy, tui la i, “Hini khumi kahawi i thi y kai ly chai bo; nangmychi ngaingai so u,” nanai khumi mipuichi i mo y kiu asi bo.Ref 27.24: Leu 21.6–9
25 Naibaly khumi humchi bawibawi ly, “Ni i thi ly kaimychi i tlang tleaung y hawi, kaichi i chanauchi i tlang tleaung y py awm sy,” napi nai pathang.
26 Hunai pajau khala y ly Barabba ai ly patheu pi iy, Isu ai ly chip i, kraws tleaung y tahen ai nai au bo.
Isu ai tavaimichi my panui hai nai
(Mk 15:16-20; Jh 19:2-3)
27 Hunai pajau khala y ly aripeng i tavaimichi my Isu ai huni areng i yhm y hawi u iy, nichi kamkawm i khumi bawibawi ni teng y palau u achu bebe.
28 Hunaibaly nichi ly mymy i kanih leng pi i, kanih kamsen jeaung khiu hai.
29 Naibaly aleng tarai khui u iy amyn hai i, mymy i lamtang mang i kiu y ly speung syn hai; naibaly nichi ly mymy i mo y kheukhu di iy, “Kawn ba, Judachi i samrang awi!” napi nai panui hai u.
30 Naibaly nichi ly mymy ai pachi pathawi iy speung ly la pi i lu y pakhau.
31 Naibaly panui hai pajau iy, huni kanih leng pi i mymy i kanih khiu hai bi, naibaly kraws tleaung y tahen ai nai pahawi u bo.
Isu ai kaws tleaung y tahen nai
(Mk 15:21-32; Lk 23:26-43; Jh 19:17-27)
32 Naibaly nichi ly theu u nai thym khala y ly Kurini avang i khumi, amyn Simon ai niu u iy, huni khumi ai ly mymy i kraws apu ai nai chei hai akhikan.
33 Naibaly nichi ly Kolkotha napi nai meingtym y tym u iy, (huni ly Lu Keuru meingtym, nanai sai ne,)
34 kreip athai hang katho atiti kakho hawi katlen nai mymy ai nei ai nai pei; naibaly mymy ly pateng i nei ngai y bo.
35 Naibaly nichi ly mymy ai kraws tleaung y tahen u pajau iy tambe va i, mymy i ateaungchi amji u bo.
36 Naibaly nichi ly hu y ateh nai ni ai typ u bo. Naibaly mymy ai seu nai leu ly,Ref 27.35: Sam 22.18
37 “Hini ly Isu, Judachi i samang ne,” nanai tajiu iy, mymy i lu leung y bi bo.
38 Naibaly mymy hawi vanrei ly damra khumi leaung nyhrei ai py tahen hawi teang, lamtang mang y leaungrei, langvawi mang y leaungrei.
39 Naibaly aleaung nai khumichi my ly lu thiu hai iy,Ref 27.39: Sam 22.7, 109.25
40 “Nang achura yhm kalen pui aphrei iy kani thomrei nai sala y sa teang ai nai keung awi, aplawi ly, nang ly Tameuh i Chapo ne baly kraws tleaung i nai satlo kathiu bei,” napi nai panui hai.Ref 27.40: Mt 26.61; Jh 2.19
41 Hunai kamta khyp teang pathyp pi nai keung kalenchi ly Reita patiu nai keungchi hawi, miteaung kehchi hawi py,
42 “Mymy ly khumi takhrachi ai palawi iy, amy ai ly aplawi thai y pui nai. Ni ly Israelachi i samrang chy bo; vai kraws tleaung i nai satlo sy, hunaibaly achi ly mymy ai ym ai.
43 Ni ly Tameuh ai ym chy bo; hawi mang, mymy ly ni ai ngai baly vai palawi sy; ‘Kai ly Tameuh i Chapo ne,’ na chy bo,” napi nai panui hai u.Ref 27.43: Sam 22.8
44 Damra khumi tahen teang nai nini my py hunai kamta panui hai teang.
Isu i ddei nai
(Mk 15:33-41; Lk 23:44-49; Jh 19:28-30)
45 Naibaly kanithun kha i nai kani ka-reu khala y khrairei pri veng bebe.
46 Naibaly kani ka-reu thym khala y Isu ly tao pajeng parai pa-rei my, “Elawi, Elawi, lama sabakthani?” nanai aeu; (huni ly, “Kai i Tameuh, kai i Tameuh, ati mana nai kai ai khai su lawh?” nanai sai ne.)Ref 27.46: Sam 22.1
47 Naibaly mymy i ahawi y angdo nai phyreichi ly huni thai i, “Hini khumi ly Elija ai palau nai na a,” napi.
48 Naibaly nichi theung i leaungrei ly angpreng praw iy, span la i kreip athai hang katho kawi pa-rei padeung nai, speung y takei iy nei hai bo.Ref 27.48: Sam 69.21
49 Naibaly khumi takhrachi my ly, “Awm sy; mymy ai la ai nai Elija ang jeu lawh na mo khen u sina” napi.
50 Naibaly Isu ly tao pajeng parai pa-rei my aeu bi i, mymy i philo patlaw bo.
51 Naibaly khen cham, achura yhm kalen pui i kanih jang nai ly salo mang i dengdairei anui mang y khrairei asei thla veng bo; naibaly kaleih theu i lengseaung puichi py kawi bo;Ref 27.51: Theu 26.31–33
52 angawmchi py am-eaung iy, i ngym chum nai khumi kachaichi i tlang neangneangchi ai py pathau bo;
53 nichi ly mymy i angthau bi nai bo y angawm i dengdairei theu iy, avang kachai y kun u i, khumi neangneangchi teng y amteng u bo.
54 Naibaly tavaimi chungvairei lu hawi mymy teng y Isu ai typ naichi ly kaleih theu nai hawi, atiti tym nai sai niu i khri pa-rei jei u na, “Hini khumi ly Tameuh i Chapo ne khyp nai bo,” napi.
55 Naibaly Isu ai sabawm ai nai tarawi y Kalili pri i dengdairei ni teng y abang nai neampachychi neangneang hu y awm; nichi ly palo parai naira i dengdairei angdeang u bo;Ref 27.55–56: Lk 8.2–3
56 hunichi theung y ly Mari Makdilini py, Jakob nini Jose i amhm Mari py, Zebedai i chapo nini i amhm py abawi.
Isu ai up nai
(Mk 15:42-47; Lk 23:50-56; Jh 19:38-42)
57 Naibaly dym mang y ly Arimathai avang i khumi kanang leaungrei, Josepha napi nai ly jeu i, mymy kypkyp py Isu ai ym nai khumi ne teang;
58 huni khumi ly Pilata teng y chei i, Isu i veu hnei. Naibaly Pilata my ly au ai nai leu pei.
59 Hunaibaly Josepha ly veu la iy, chai pyn nai kanih mai asynrei chy y bam i,
60 mymy i angawm kangtha khypkhyp lengseaung pui takeu naira y up i, angawm pa-kho y ly lengseaung len parai nai pali tawp iy leh veng bo.
61 Naibaly Mari Makdilini hawi Mari takhra ly hu y awm i, angawm mo y ateh hawi bo.
Tapreaung y tamcheaung khai nai
62 Naibaly khawn mang y ly (huni ly Sa Rym Nai Kani bo i khawn ne,) pathyp pi nai keung kalenchi hawi Pharisaichi ly Pilata teng y awm u achu mang i,
63 “Areng awi, huni tapawp nai keung ly mymy heng nai khala y ly, ‘Kai ly kani thomrei kani y angthau teang ai,’ nanai kaichi ly adawn vau bo.Ref 27.63: Mt 16.21, 17.23, 20.19; Mk 8.31, 9.31, 10.33–34; Lk 9.22, 18.31–33
64 Hunaibaly angawm ly kani thomrei kani chi pa-rei hawihai palai typ ai nai leu pei kyh, ti y baly ni teng y abangnaichi ly ni ai paviu ai i, khumi humchi teng y, ‘Ni ly kadeichi theung i nai angthau teang bo,’ ti lawh na; hunaibaly kangkhym i tapawp nai ly kangman i nai tleaung y hawi y kehkeh ai,” napi.
65 Pilata my ly nichi teng y, “Nangchi ly typ ai nai keung tavaimichi awm chy bo; chei u ly, nangchi kamjau ryrei hawihai typ hai bei,” napi.
66 Hunaibaly nichi ly typ ai nai keung tavaimichi hawi chei u iy, angawm ly typ hai i, lengseaung ai ly pajawp hai typ u bo.