SATANG KAHAWI
MARKA I
TAJIU NAI
1
Baptis sa nai Johan i leu thui na
(Mt 8:1-12; Lk 3:1-18; Jh 1:19-28)
1 Tameuh i Chapo Isu Krista i Satang Kahawi angchei i nai ly.
2 Amo Isaia i cha-iu y tajiu nai kamta,Ref 1.2: Mal 3.1
“Khen cham, kai i amtaw thau nai ai ly nang i mo y
kang pato i,
Mymy ly nang i lam sa rym ai;
3 Daichi ka-vym y aeu nai raawi ly,
‘Areng i lamlen so u rym ly,
Mymy i lam cheaungkhang pataw u,’ napi.” nanai ne.,Ref 1.3: Is 40.3
4 Johan, daichi ka-vym y baptis sa nai keung ly, kamngo pahen naira nga ai nai uikhei nai baptisma leu thui nai theu bo.
5 Naibaly Judai pri i khumi bawibawi hawi, Jerusalem i khumi bawibawi theu u i, mymy teng y chei u; naibaly mymychi i kamngo ahui nai Jordan tavo y mymy teng y baptisma nga u.
6 Naibaly Johan ly kula-iu mui baichu akhiu iy, mymy i akeng y ly mawipeih khobai py akawm: mymy i cha nai ly akhu tama hawi daichi khawi hang ne.Ref 1.6: 2 Ar 1.8
7 Naibaly mymy ly, Kai i nithun y ang jeu ai nai ly kai tleaung y len keh nai ne: kai ly meung iy ni i phainai vui su ai nai py ataing y leang.
8 Kai ly nangchi ai tui hawi baptis kang sa nai teu; na i py mymy ly Phailo Kachai y baptis ang sa pi ai mang,” napi.
Isu i baptisma nga nai hawi setan my parai nai
(Mt 3:13-4:11; Lk 3:21-22, 4:1-13)
9 Naibaly huni neng khala y ly hina nai ne: Isu ly Kalili pri i Nazaret avang i dengdairei chei iy, Jordan tavo y ly Johan teng y baptisma nga.
10 Hunaibaly mymy ly tui i nai theu praw iy, tlenrei khyh my kani am-eaung i, Phailo ly buhu ka-tawm mymy i tlang tleaung y kathiu nai niu.
11 Naibaly kani pri mang i dengdairei raawi ly, “Nang ly kai i Chapo ngai parai nai ne, kai ly nang i tlang tleaung y khrikhri pa-rei kang kawn parai,” napi.Ref 1.11: AA 22.2; Sam 2.7; Is 42.1; Mt 3.17, 12.18; Mk 9.7; Lk 3.22
12 Naibaly mymy ai ly Phailo my daichi ka-vym y chei hai praw ryp.
13 Hunaibaly Setan my ni ai prawi nai tarawi y mymy ly daichi ka-vym y kani vui palyhrei awm i, daichi mawichi theung y awm, naibaly ni ai kani pri i amtaw thau naichi my kry.
Isu my ngo sara leaung palyhreichi ai palau nai
(Mt 4:12-22; Lk 4:14-15; 5:1-11)
14 Naibaly Johan ai patiu nai bo y Isu ly Kalili pri y Satang Kahawi thui pi ai nai chei i,
15 “Neng ly ang tym bo, Tameuh i peang nai ly kasa bo; uikhei u ly, Satang Kahawi ym u,” napi preiprei.Ref 1.15: Mt 3.2
16 Naibaly mymy ly Kalili ang peang en nai thym khala y Simon nini Simon i amjo amnau Andria ai ly ang y paleu heang nai niu; ati mana nai mo nabaly nini ly ngo sara ne.
17 Naibaly Isu my nini teng y, “Kai teng y abang hawi, hunaibaly khumi patiu nai sara y kang palawn ai,” napi.
18 Naibaly nini ly paleu khai hawi su iy mymy teng y abang hawi praw ryp.
19 Naibaly mymy ly ma-khyrei tako y rai kha y my Zebedai i chapo Jakob hawi ni i amnau Johan ai py niu; nini ly paleu py pathyp nai paleaung y awm hawi teang.
20 Naibaly mymy ly nini ai palau praw i, nini ly ampo Zebedai ai ly nichi i alai naichi teng y paleaung y khai hawi su iy, ni teng y abang hawi teang.
Vawinam aso y naimy nam nai khumi leaungrei
(Lk 4:31-37)
21 Naibaly nichi ly kapernaum avang y kun u i, mymy ly Anawn Kani y achura yhm y kun iy leu patiu praw.
22 Naibaly mymy ly Reita patiu nai keungchi atawm y i, phom awm parai naimy nichi ai patiu nai deaungkho y nichi ly mymy i leu patiu nai ly khri pa-rei lyh na.Ref 1.22: Mt 7.28–29
23 Naibaly nichi i achura yhm y ly vawinam my nam nai khumi leaungrei awm khyp i ni my ly,
24 “Nazaret Isu awi, kaichi hawi nang hawi ati amtawm mo? Nang ly kaichi ai tama hai ai nai jeu nai a? Nang ai ly kai pany mang, Tameuh i Khumi Kachai ne,” nanai aeu.
25 Naibaly Isu my ni ai jo i, “Katheu moh; ni i taku theung i nai theu jau,” napi.
26 Naibaly vawinam my ly ni ai khrikhri pa-rei my kyn hai iy, athorei my hang i ni i taku theung i nai theu.
27 Naibaly nichi bawibawi khri pa-rei lyh na i, “Hini ly ati mo? Leu patiu nai kangtha na a hi ly! Vawinamchi ai py phom awm parai nai leu pei iy mymy i leu tangai u lawh ly,” nanai mymychi tengtawi adeng u.
28 Naibaly mymy i satang ly Kalili pri tengtang bawibawi y amthang praw.
Isu my no nai khumi ai hawi sa pi nai
29 Naibaly nichi ly achura yhm i dengdairei theu nai khala y Jakob nini Johan hawi vanrei Simon nini Andria i yhm y kun praw.
30 Naibaly Simon i ampi ly keaung no nai jawn jo i, nichi ly ni i satang Isu ai thui pi praw:
31 naibaly mymy ly jeu i ni i kiu y amkhaw iy pathau: hunaibaly mymy i keaung no nai ly pra i, nichi ai kry.
32 Naibaly dym mang y kani avah nai khala y ly no naichi bawibawi hawi, vawinam my nam naichi ai py ni teng y hawi u achu.
33 Avang theaungrei katheu pa-kho ahawi y awm u achu mang.
34 Naibaly mymy ly no nai amjy cheaungkhang no nai khumi neangneangchi ai ly hawi sa iy, vawinam neangneangchi ai py patheu; naibaly vawinamchi ly mymy ai pany nai deaungkho y, mymy ly nichi ai leu katheu ai nai pei y.
Isu my Kalili pri y leu thui nai
(Lk 4:43-44)
35 Naibaly mymy ly khawn mang y khutawi ai nai aveng rai khala y my angthau nai theu i, ka-vymra y chei iy hu y ly chiu sa.
36 Naibaly Simon hawi ni i ahawichi ly mymy i ni thun y hui u iy, ni ai niu baly mymy teng y,
37 “Khumi bawibawichi my nang ai ang hau na a,” napi.
38 Naibaly mymy ly nichi teng y, “Kai ly hunira y py leu kathui thai ai nai, meingtym takhra avang kangsa y chei u sina: huna nai sa ai nai kang jeu tang,” napi.
39 Hunaibaly mymy ly leu thui nai hawi, vawinamchi ai patheu nai py Kalili pri verei y nichi i achura yhm y kun preiprei.Ref 1.39: Mt 4.23, 9.35
Isu my keaungsi man nai khumi ai hawi sa pi nai
(Mt 8:1-4; Lk 5:12-16)
40 Naibaly keaungsi man nai khumi leaungrei ly ni teng y chei iy mymy i mo y ateh chakrym i, “Nang ly ngai baly kai ai pachai pajau ,” napi nai khri pa-rei takeng.
41 Naibaly mymy ly ni ai khri pa-rei pahen i, jaha nai nam iy ni teng y, “Ngai mang, chai jau sy,” napi.
42 Hunaibaly ni i keaungsi ly tlenrei khyh my tama praw i, chai ryp bo.
43 Naibaly Isu ly, “Ami teng y py ati sai py thui y ai nai amkym me ba;
44 na i py tako ly pathyp pi nai keung teng y akhen hai, naibaly nichi ai pany hai ai nai, nang chai ai nai Mosi i atiti leu pei nai kamta talam,” nanai ni teng y leu pei typ i pato praw.Ref 1.44: Lev 14.1–32
45 Na i py ni ly theu iy huni satang aeu amteaung i ahei hai, hunaibaly Isu ly ka-niu y avang y kun pajau y i, daichi ka-vymra y awm lawh veng: naibaly nichi ly meingtym tleirei i dengdairei ni teng y jeu u achu.