26
Isu ai patiu ai tau nai
(Mk 14:1-2; Lk 22:1-2; Jh 11:45-53)
1 Naibaly hina nai ne, Isu ly huni leu bawibawi thui pajau iy, mymy ly abangnaichi teng y,
2 ‘Vai kani nyhrei nai kha y Katlen Vui nai pawi awm ai, nanai nangchi ly pany, naibaly khumi i Chapo ai ly kraws tleaung y tahen ai nai patiu hai ai,” napi.Ref 26.2: Theu 12.1–27
3 Hunai thym khala y ly pathyp pi nai keung kalen keh nai Kaiapha napi nai i lyum y ly pathyp pi nai keung kalenchi hawi, khumi humchi i miteaung kehchi ly achu u bo;
4 nichi ly Isu ai tapawp paryp nai patiu iy padei u thai ai nai arum ryry.
5 Na i py nichi ly, “Pawi kha y ly ne moh sy, ti y baly khumi humchi theung y khrukhra nai awm lawh na,” napi.
Bethani y Isu ai rimui pathym nai
(Mk 14:3-9; Jh 12:1-8)
6 Naibaly Isu ly Bethani avang y keaungsi kaawm Simon i yhm y awm nai thym khala y ly,
7 neampachy leaungrei ly dengjai adym kangleung y rimui vang tang parai nai syn nai mymy teng y chei i, mymy ly biu o nai thym khala y ni i lu y lei.Ref 26.7: Lk 7.37–38
8 Na i py abangnaichi ly huna nai niu kha paleung hawi y i, “Ati mana ai nai hina nai pasum atyhtyh mo?
9 Hini ly vang neangneang jo iy khumi kamawnchi teng y pei pajau na a,” napi.
10 Na i py Isu ly huna nai pany i nichi teng y, “Hini neampachy ai ly ati mana ai nai khrukhra hai u lawh mo? Ni ly kai i tlang tleaung y atiti kahawi sa nai na a.
11 Khumi kamawnchi ly nangchi teng y awm jo chy bo, kai naini nangchi teng y kang awm jojo ai nai ny y leang.Ref 26.11: Leu 15.11
12 Hini rimui kai i tlang tleaung y lei nai ly kai ai up ai nai ang sa rym nai na a hi ly.
13 Meitang khyp kang thui pi khaileaung pri verei y ma y py hini satang kahawi thui pi naira tleirei y hini neampachy i sa nai py mymy ai pany jo ai nai thui jojo teang ai,” napi.
Juda ly Isu ai patiu ai nai paran nai
(Mk 14:10-11; Lk 22:2-6)
14 Hunai bo y ly holai nyhreichi theung i nai leaungrei, Iskariota Juda napi nai ly pathyp pi nai keung kalenchi teng y chei iy,
15 “Mymy ai ly kaimy kang patiu hai ai nai majirei pei ai nai ngai mo? ” napi. Naibaly nichi my ly tangka phairei vang pei.Ref 26.15: Zek 11.12
16 Naibaly ni ly huni dengdairei baly mymy ai patiu hai ai nai sai ka-vo hau ryry.
Isu ly abangnaichi hawi vanrei Katlen Vui Nai Pawi y biu o nai
(Mk 14:12-21; Lk 22:7-14, 21-23; Jh 13:21-30)
17 Naibaly tako angbo abawi y nai pawi angchei i kani y ly abangnaichi ly Isu teng y chei u iy, “Katlen Vui nai pawi cha ai nai ma mang y pawi pi ai nai ngai mo?” napi.
18 Naibaly mymy ly “Avang pui y ami teng y mo chei u ly, ni teng y, ‘Sara my, Kai i neng kasa bo i, kai teng y abangnaichi hawi nang i yhm y Katlen Vui nai pawi sa ai nai tau, ang napi,’ tapi,” napi.
19 Naibaly abang nai leaung nyhrei ly Isu i thui pi nai kamta sa hawi i, Katlen Vui nai pawi pawi hawi rym.
20 Naibaly dym mang y ly mymy ly abang nai leaung holai nyhreichi hawi biu u bo;
21 naibaly nichi ly cha u nai thym khala y mymy ly, “Meitang khyp kang thui pi, nangchi theung i leaungrei my kai ai ang patiu hai ryp ai,” napi.
22 Naibaly nichi ly khri pa-rei paleung mawn u nai mymy teng y, “Areng awi kaimy a? ” napi bawibawi.
23 Naibaly mymy ly, “Kai ai bikheaung y ang tapo hai nai keung kypkyp my ang patiu hai ai..Ref 26.23: Sam 41.9
24 Khumi i Chapo ly mymy i satang tajiu nai kamta khypkhyp my chei vui ai; na i py Khumi i Chapo ai patiu hai ai nai keung ly taham si! Huni khumi ly tapen y nai khyly mymy i vui hawi keh alam ai,” napi nai pathang.
25 Naibaly mymy ai patiu hai ai nai Juda my ly, “Rabbi awi, kaimy a?” napi. Mymy ly ni teng y, “Nang ly thui khyp bo,” napi.
Areng i biu
(Mk 14:22-26; Lk 22:14-20; 1 Kor 11:23-25)
26 Naibaly nichi ly cha u nai thym khala y Isu ly tako la i kawn nai leu thui iy, theng baw theng baw i abangnaichi teng y pei, “Lo u ly, cho u; hini ly kai i tlang ne,” napi.
27 Naibaly khau la i kawn nai leu thui iy nichi teng y pei i,
28 “nangchi bawibawi nei u; hini ly kai i thi, kamngo pahen ai nai khumi neangneangchi i vui theu nai leu maikawm ne.Ref 26.28: Theu 24.8; Jer 31.31–34
29 Na i py kang thui pi, Ngaai i peang naira y nangmychi hawi kangtha kanei ai nai kani tym y ryrei ly, vai i dengdairei kreip angjyn athai hang ly kanei ali y leang bo,” napi.
30 Naibaly nichi ly khulym thui u pajau nai bo y theu u i, Oliv mawi y chei u bo.
Petera apha ai nai sai Isu my thui pi yb nai
(Mk 14:27-31; Lk 22:31-34; Jh 13: 36-38)
31 Hunaibaly Isu ly nichi teng y, “Vai dym ly nangchi bawibawi ly kai i molam y atlym u bebe ai; ati mana nai mo nabaly, ‘Beram typ nai keung ai ly kapakhau ai i, beram kanghuchi py ahei hai ai,’ nanai tajiu nai ne.Ref 26.31: Zek 13.7
32 Na i py kai ai pathau nai bo y ly Kalili pri y nangchi i mo y katako ai,” napi.Ref 26.32: Mt 28.16
33 Na i py Petera my ly mymy teng y, “Bawibawichi ly nang i molam y atlym u bebe iy py kai ly atlym ai nai aveng,” napi nai pathang.
34 Isu my ly ni teng y, “Meitang khyp kang thui pi, vai dym ly a kheaung y rai kha y nang ly kai ai tlen thomrei apha ai,” napi.
35 Petera my ly mymy teng y, “Nang i dei naira y dei teang iy py kai ly pipi apha y ai,” napi. Hunai kamta teang abangnai bawibawichi ly napi bebe.
Isu ly Kethsemani akho y chiu sa nai
(Mk 14:32-42; Lk 22:39-46)
36 Huni pajau kha y Isu ly nichi hawi meingtym harei, Kethsemani napi naira y tym; naibaly mymy ly abangnaichi teng y, “Kai hu mang y chiu sa nai sala ryrei ly hi y ateh u,” napi.
37 Naibaly mymy ly Petera hawi Zebedai i chapo nini ai ly hawi i, paleung mawn nai khrikhri pa-rei phailo seaung amteaung bo.
38 Naibaly mymy ly nichi teng y, “Kai ly dei ai nai pa-rei khrikhri pa-rei paleung mawn na; hi y awm u ly, kai hawi vanrei ajeng u rym paryp ba, ” napi.
39 Naibaly mymy ly maidenrei mo mang y chei kyh i ambeu iy, “Aw Ngaai awi, pajau baly hini khau ly kai ai katlen hai kyh sy; na i py kaimy ngaingai ny y naimy, nangmy ngaingai phai ne sy,” nanai chiu sa bo.
40 Naibaly mymy ly abangnaichi teng y chei iy, nichi ai ly i ngym nai niu: hunaibaly mymy ly Petera teng y, “Mana! Nangchi ly tana chy sala y py kai hawi vanrei ajeng u rym paryp pajau y a?
41 Parawi naira y kun u y ai nai ajeng u rym paryp naimy chiu so u; phailo my ly angjeng i, tlang my ly ham y,” napi.
42 Naibaly pa-nyh chei bi i chiu sa bi iy, “Aw Ngaai awi, hini ly kai nei y nai awm pajau y baly nangmy ngaingai ne sy,” napi.
43 Naibaly mymy ly chei bi iy nichi ai ly i ngym nai niu taleang bi, nichi khri pa-rei i amhm na.
44 Naibaly nichi teng i nai chei vui bi iy pa-thom chiu sa bi i, mymy i thui angchei nai kamta thui bi bo.
45 Hunai pajau khala y ly mymy ly abangnaichi teng y chei bi i nichi teng y, “Vai ly i u ly, anawn u jau; khen cham, neng ly tym bo: Khumi i Chapo ai ly khumi kamngochi i kiu y patiu hai ai bo he.
46 Angthau, tako u sina; khen cham, kai ai patiu hai ai nai keung ly kasa bo he,” napi.
Isu ai patiu u nai
(Mk 14:43-50; Lk 22:47-53; Jh 18:3-12)
47 Naibaly mymy ly thui dudu nai thym khala y my Juda, holai nyhreichi theung i leaungrei ly tym ryp; naibaly pathyp pi nai keung kalenchi hawi khumi humchi i miteaung kehchi teng i nai khumi mipui ka-teng ny y naichi ly haisau hawi thengbeang syn nai mymy hawi vanrei tym miu.
48 Naibaly mymy ai patiu hai ai nai keung my ly ma ai nai ka-ma-ra thui pi rym i, “Kai i pachawm nai ly ne mang, mymy ai patiu u,” napi.
49 Hunaibaly ni ly Isu teng y chei praw iy, “Rabbi, noso hawi a? ” napi nai ni ai pachawm.
50 Naibaly Isu my ni teng y, “Nai awi, nang i jeu nai aly ly so jau bei,” napi. Hunaibaly nichi ly Isu ai patawn i patiu u bo.
51 Naibaly khen cham, Isu i kamkawm theung i leaungrei ly tapo iy, ni i haisau aphiu i pathyp pi nai keung kalen keh nai i miseaung ai ly ateng iy, kano sei thlau vui.
52 Naibaly Isu ly ni teng y, “Nang i haisau ly keu y hawn teang jau: haisau syn nai keung bawibawichi ly haisau y dei teang ai.
53 Vai py kani pri i amtaw thau naichi sang tariurei nai meingtym holai nyhrei nai tleaung y nawi keh nai ang pato pi ai nai Ngaai teng y katakeng pajau y, nanai athang khai u a?
54 Na i py katakeng baly hina nai kamta awm ai nai tla, nanai Tameuh i cha-iu leu ly mana tym thai ai mo?” napi.
55 Hunai thym khyp khala y ly Isu my khumi mipuichi teng y ly, “Haisauchi thengbeangchi syn naimy damra ai patiu ai nai kamta kai ai patiu ai nai theu u lawh a? Achura yhm kalen pui y kani tleirei leu kang patiu nai ateh iy ly kai ai patiu u y.Ref 26.55: Lk 19.47, 21.37
56 Na i py amochi i leu tym thai ai nai hini bawibawi ly tym nai bo he,” napi. Hunai thym khala y ly abangnaichi bawibawi ly mymy ai patlaw su i angpreng pi pawn veng.
Isu ai tara chih naira y pahawi nai
(Mk 14:53-65; Lk 22:54-55, 63-71; Jh 18:13-14, 19-24)
57 Naibaly Isu ai patiu nai keungchi ly mymy ai ly pathyp pi nai keung kalen keh nai Kaiapha teng y pahawi u bo. Huni meingtym y Reita patiu nai keungchi hawi, miteaung kehchi ly awm u achu veng bo.
58 Na i py Petera ly pathyp pi nai keung kalen keh nai i lyum y tym pa-rei kamlo dengdairei mymy ai hui pajyh; naibaly kun iy huni satang tem pa-rei pany ai nai miseaungchi theung y ateh teang.
59 Naibaly Isu ai padei u thai ai nai, pathyp pi nai keung kalenchi hawi tara chih nai keungchi bawibawi ly ni ai ka-chawi y seu ai naira hau u ryry;
60 na i py ka-chawi naimy pany nai keung amlawn nai neangneang jeu iy py ngo pajau y. Hunai bo y ly khumi leaung nyhrei jeu hawi iy,
61 “Hini khumi ly, ‘Achura yhm kalen pui ly ka-phrei iy kani thomrei sala y kasa bi thai,’ na ly,” napi.Ref 26.61: Jh 2.19
62 Naibaly pathyp pi nai keung kalen keh nai ly angdo i mymy teng y, “Nang ly ati sai py pathang y nai sai a? Hina tanrei ang seu nai ly mana lawh? ” napi.
63 Na i py Isu my ly sai py katheu y. Naibaly pathyp pi nai keung kalen keh nai my ly mymy teng y, “Tameuh kangheng i amyn y kang thui nai bo: nang ly Krista Tameuh i Chapo ne a? nanai kaichi ai thui pi,” napi.
64 Isu my ly ni teng y, “Nang ly thui khyp bo. Na i py kang thui pi, nangchi ly vai mo mang y Khumi i Chapo ly atiti py sa thai nai keung i lamtang mang y ateh nai, kani mang i khupanym tleaung y jeu nai niu u ai,” napi.Ref 26.64: Dan 7.13
65 Naibaly pathyp pi nai keung kalen keh nai my ly mymy i ateaung sei iy, “Ni ly Tameuh ai thui tamawn bo: pany nai keung takhrachi ai ati aly ngai jau mo? Khen cham, mymy i Tameuh ai thui tamawn nai sai ly vai nangchi ly thai bo: mana dawn u mo? napi.Ref 26.65–66: Lev 24.16
66 Nichi my ly, “Dei ai nai ataing y! napi nai pathang.
67 Naibaly mymy i meimai y pachi pathawi u iy tapheu bo; phyreichi my ly,Ref 26.67: Is 50.6
68 “Nang, Krista, nang ai ly ami my ang tabeang mo? Kaichi ai thui pi,” napi iy tabeang bo.
Petera my Isu ai apha nai
(Mk 14:66-72; Lk 22:56-62; Jh 18: 15-18, 25-27)
69 Naibaly Petera ly angam mang lyum y ateh nai ne; naibaly anglo leaungrei ly ni teng y chei iy, “Nang py kalili pri i khumi Isu teng y awm nai teang na a hi ly, ” napi.
70 Na i py ni my ly, “Nang i thui nai ly kai pipi pany y,” nanai nichi bawibawi i mo y apha.
71 Naibaly dangkhum y theu iy anglo takhra my ni ai niu i, hu y awm naichi teng y ly, “Hini khumi py Nazaret Isu teng y awm nai na a hi ly,” napi.
72 Naibaly mymy ly, “Kai ly huni khumi ai kapany y leang,” nanai vaineng abeu naimy apha bi.
73 Naibaly tanarei chy sala y ahawi y angdo naichi my ly Petera teng y, “Nang py nichi theung i khumi khyp nai bo, nang i leu y amny chy bo,” napi.
74 Naibaly ni my ly, “Hini khumi ai ly kai pany y,” nanai pasawi iy vaineng abeu amteaung bo. Naibaly a kheaung praw ryp bo.
75 Naibaly Petera ly Isu my, “A kheaung y rai kha y nang ly kai ai tlen thomrei apha ai,” napi nai leu ly adawn vau bi. Naibaly ni ly theu i khri pa-rei vo ryry.