25
Anglo leaung horeichi hawi pata nai
1 Huna nai khala y ly kani pri my peang nai ly anglo kachai leaung horei, aju la nai keung ai lamchung ai nai maisi syn iy chei naichi hawi pata ai nai tla bo.Ref 25.1: Lk 12.35
2 Nichi theung y leaung pangrei ly cheng y i, leaung pangrei ly cheng.
3 Ati mana nai mo nabaly cheng y naichi ly masi mang ly syn i, hang ly syn u y;
4 cheng naichi ly masi syn i, hang py syn teang.
5 Naibaly aju la nai keung ly jeu patyh kyh nai deaungkho y nichi bawibawi ly i kamhm ngam i, i u pawn veng bo.
6 Naibaly aneng hyh khala y ly, ‘Khen cham, aju la nai keung ly tym bo! Mymy ai lamchung ai nai theu u jau! napi nai raawi thai bo.
7 Hunaibaly huni anglo kachaichi bawibawi ly angthau u i, maisi kachi u bo.
8 Naibaly cheng y naichi ly cheng naichi teng y, ‘Nangchi i masi hang pei mai kyh; kaichi i maisi dei ai bo,’ napi.
9 Na i py cheng naichi my ly, ‘Kaichi i vui hawi nangchi i vui hawi aleu ai nai athang by y; jo nai keungchi teng y phai chei u ly, hu y van u,’ napi nai pathang.
10 Naibaly nichi ly van ai nai chei u nai sala y ly aju la nai keung ly tym bo; hunaibaly angveirym naichi ly mymy hawi vanrei apom nai pawi y biu cha ai nai kun u i, katheu akho u veng bo.
11 Hunai bo y ly anglo kachai takhrachi py tym i, ‘Areng, Areng, kaichi ai paeaung pi kyh!’ napi.Ref 25.11–12: Lk 13.25
12 Na i py mymy ly ‘Meitang khyp kang thui pi, kang pany kang pacha y leang,’ napi nai pathang.
13 Hunaibaly ajeng u rym paryp, ati mana nai mo nabaly nangchi ly kani py neng py pany y.
Miseaung leaung thomreichi hawi pata nai
(Lk 19:11-27)
14 “Ne, khumi leaungrei ly pri takhra y chei ai nai kha y mymy i miseaungchi ai palau iy mymy i yhmtheaung ly nichi teng y au nai kamta atawm.
15 Naibaly mymy ly miseaung leaungrei teng y talent pangrei, leaungrei teng y talent nyhrei, leaungrei teng y talent harei, nichi i sa thai nai ryrei bawibawi sa ai nai au i, khuleaung chei bo.
16 Naibaly talent pangrei nga nai keung ly huni ly ka-pai sa hai praw i, talent pangrei kamran nga hai bo.
17 Hunai kamta teang, talent nyhrei nga nai keung py talent nyhrei kamran nga hai bo.
18 Na i py talent harei nga nai keung ly chei iy khaileaung tai i, yhmkeung i tangka ly heu vui veng lawh.
19 Naibaly kra parai nai bo y ly huni miseaungchi i yhmkeung ly vawi iy, nichi teng y mymy i yhmtheaung kry nai satang deng bo.
20 Hunaibaly talent pangrei nga nai keung ly chei i, talent pangrei kamran syn naimy, ‘Areng awi, nang i kai ai talent pangrei kry hai nai ly khen cham, talent pangrei kamran kanga bo,’ napi.
21 Yhmkeung my ly ni teng y, ‘Miseaung kahawi ka-ym awm nai, nang i sa nai ly hawi mang; nang ly maiden chy naira y ka-ym awm i, nawi parai naira tleaung y kang khai ai mang; nang i yhmkeung i kawn naira y kawn teang,’ napi.
22 Naibaly talent nyhrei nga nai keung py chei i, ‘Areng awi, nang i kai ai talent nyhrei kry hai nai ly khen cham, talent nyhrei kamran kanga bo,’ napi.
23 Yhmkeung my ly ni teng y, ‘Miseaung kahawi ka-ym awm nai, nang i sa nai ly hawi mang; maiden chy naira y ka-ym awm i, nawi parai naira tleaung y kang khai ai mang: nang i yhmkeung i kawn naira y kawn teang,’ napi.
24 “Naibaly talent harei nga nai keung py chei i, ‘Areng awi, nang ly sa hai takei talei khyhkhyh nanai kang pany, nang i tiu y naira y py nang ly tyn lawh, nang i ahei hai y naira y py nang ly pakym lawh reng;
25 hunaibaly kang jei i, kai ly chei iy, nang i talent ly khaileaung y ka-up bo; khen cham, nangmy i karang ateng nang ly nga teang bo,’ napi.
26 Naibaly yhmkeung my ly ni teng y, ‘Miseaung kamngo atho kasi, kai i tiu y naira y py katyn reng nai, kai i ahei hai y naira y py kapakym reng, nanai nang pany lo-oh?
27 Huna nabaly nang ly kai i tangka ly ka-pai sa nai keungchi teng y khai ai nai tla, hunaibaly kai vawi nai kha y ly kaimy i ly nucho hawi nga bi ai nai tla.
28 Hunaibaly ni i talent harei nai ly lo pi ly, talent horei nga nai keung teng y pei u.
29 Ami py atiti awm nai ngierei ai ly pei panawi bi ai, naibaly mymy ly bym pa-rei nga ai; na i py ami py atiti by y nai ngierei teng i nai ly ni i awm yb nai angchi py la pi ra ai.Ref 25.29: Mt 13.12; Mk 4.25; Lk 8.18
30 Naibaly miseaung vang y nai ai ly angam mang i kaveng y aphi u; hu y ly vo py vo ai, ho py akachai ai,’ napi nai pathang.Ref 25.30: Mt 8.12, 22.13; Lk 13.28
Kangkhym i tara chih naira
31 “Na i py Khumi i Chapo ly kani pri i amtaw thau nai bawibawichi hawi, mymy i nang parai naira amthyp naimy ang jeu nai neng khala y ly, mymy i nang parai nai atehra y ateh ai;Ref 25.31: Mt 16.27, 19.28
32 naibaly mymy i mo y ly cheng cheaungkhangchi achu ai; naibaly typ nai keung ly mi-ichi theung i nai beramchi ai khawi takhra nai kamta, nichi ai ly khawi takhra ai;
33 naibaly beramchi ai ly mymy i lamtang mang y, mi-ichi ai ly mymy i langvawi mang y khai ai.
34 Hunai khala y ly Samrang ly mymy i lamtang mang y awm naichi teng y ly, ‘Ngaai i amtheaung hai keh naichi awi, jeu u ly, khaileaung palum angchei khala i dengdairei nangchi i vui pri sa pi yb nai ly lo u;
35 ati mana nai mo nabaly kai kajeu alam iy nangchi my cha ai nai pei: kai tui ahai iy nangchi my nei ai nai pei: kai angvyn ne iy nangchi my anga hai: kai ly tlang ka-keu awm iy nangchi my kanih akhiu hai:
36 kai ly no iy nangchi my kai ai pasawm patau: kai theaung y awm iy nangchi ly kai ai de,’ nanai napi ai.
37 Hunai khala y ly khumi kahawichi ly, ‘Areng awi, nang kajeu alam kha y cha ai nai pei nai, tui ahai kha y nei ai nai pei nai,
38 angvyn lawn kha y anga hai nai, kanih by y nai kha y khiu nai,
39 no kha y py theaung tla nai kha y py ade aji nai, hunichi ly mana khala y awm mo? napi nai pathang u ai.
40 Naibaly Samrang my ly nichi teng y, ‘Meitang khyp kang thui pi, hini kai i amjo amnau theang keh naichi theung y leaungrei i tlang tleaung y sa u nai ly kai i tlang tleaung y sa u nai ne,’ napi nai pathang ai.
41 “Hunai pajau khala y ly ni ly mymy i langvawi mang y awm naichi teng y ly, ‘Amsawi lawi naichi awi, diabola hawi mymy i amtaw thaunaichi i vui sa rym nai deungtasarei mai y kai teng i nai chei u pawn;
42 ati mana nai mo nabaly kai kajeu alam iy nangchi ly cha ai nai pei u y: kai tui ahai iy nangchi ly nei ai nai pei u y:
43 kai angvyn ne iy nangchi ly ango hai y: kai ly tlang ka-keu awm iy nangchi ly kanih akhiu hai y: kai ly no nai hawi theaung y awm nai khala y nangchi ly kai ai de u y,’ napi ai.
44 Hunai khala y ly nichi my py, ‘Areng awi, nang ly kajeu alam nai mo, tui ahai nai mo, angvyn ne nai mo, tlang ka-keu awm nai mo, no nai mo, theaung y awm nai mo kaichi my kang niu iy, nang ai kang sabawm pi y nai ly mana khala y mo? nanai pathang ai.
45 Naibaly mymy ly nichi teng y, ‘Meitang khyp kang thui pi, hini khumi theang keh naichi theung y leaungrei i tlang tleaung y so u y nai ly kai i tlang tleaung y so u y nai ne, nanai pathang ai.
46 Naibaly hinichi ly deungtasarei pajeng naira y chei u vui ai: khumi kahawichi naini deungtasarei hengra y chei u vui ai,” napi.Ref 25.46: Dan 12.2