1 Areng my Mosi teng y leu pei nai ly 2 Israela cheng theung i khumi leaungrei ly reita leu pei naichi ai athang khai y naimy taphra iy, sa tamang nai awm lawh baly, anui mang i khai pi yb nai reita kamta sa ai nai Areng my leu pei nai ne.

3 Pathyp pi nai keung kalen keh my kamngo sa lawh baly, khumichi i tlang tleaung y raurei kamngo tym hai nai deaungkho y, ni ly kamngo lawira nga ai nai , no-na by y nai si katai beaungjeaung harei hawi Areng teng y apathyp ai nai tla. 4 Ni ly huni si katai ai Areng i awmra Tabynako katheu pa-kho mo y pahawi sy ly si lu tleaung y kiu kheang iy Areng i mo y, huni si tleh ai nai tla. 5 Naibaly pathyp pi nai keung kalen keh ly thi maidenrei la iy, Tabynako angtheung y kun hai ai nai tla. 6 Ni i kiu pajeung ai thira tapo iy, huni thi ly kanih ali hang nai mo y tlen saryhrei katheng ai nai tla. 7 Hunaibaly ni ly Tabynako theung i mui katui leng patlum nai maicham takichira i kachawnchira y, huni si thi maidenrei hawi tabei ai nai tla. Huni bo i thi kamlai ai ly Tabynako katheu pa-khora y awm nai, leng patlum nai maicham kheutangra leih jawn ai nai tla. 8 Naibaly ni ly si katai takuta tavira i thau bawibawichi, 9 pakawi seaungru hawi hunira i thau, pathymra i hawi keh nai phyrei la ai nai tha. 10 Pathyp pi nai keung ly leunghawi kapathypra i tawnbawi thau ai leng patlum nai kamta, huni si katai thau ai maicham salo y leng patlum ai nai tla. 11 Naibaly si peih, nganbawi ngierei, lu, kheuchi, takuta hawi vanrei tivichi ai ly 12 Tai naira angam mang y syn iy maidym adi nai meingtym kachaira, mai y leng vui ai nai tla.

13 Israela cheng bawibawichi ly Areng i leu pei naichi theung i ha harei ai taphra nai y kamngo tla lawh baly, 14 tamang bo, nanai pany phai pany praw baly, si katai beaungjeaung harei hawi kamngo pahen nai kapathypra talam ai nai tla. Nichi ly huni si ai Areng i awmra Tabynako mang y syn ai nai tla. 15 Khumi mipuichi ai lu sa pi nai keungchi ly huni si katai lu tleaung y kiuchi kheang iy, huni si tleh ai nai tla. 16 Pathyp pi nai keung kalen keh ly Tabynako theung mang y thi maidenrei syn sy ly 17 ni i kiu pajeung hawi thi y tapo iy, huni thi ai kanih ali hang nai mo y tlen saryhrei katheng ai nai tla. 18 Tabynako angtheung mang i mui katui leng patlum nai maicham takichira i kachawnchira y, si thi maidenrei tabei sy; thi kamlai ai ly Tabynako katheu pa-kho sahawi y awm nai leng patlum nai maicham kheutangra leih jawn ai nai tla. 19 Naibaly ni ly si katai thau ngiereichi la iy, maicham tleaung y leng patlum ai nai tla. 20 Ni ly kamngo pahen nai kapathypra talam nai reita kamta, huni tawnbawi talam ai nai tla. Pathyp pi nai keung ly hina nai kamta, khumichi i kamngo molam y tawnbawi apathyp nai deaungkho y, khumichi ly kamngo lawi naira nga u ai. 21 Naibaly ni ly my i kamngo molam y talam nai si ai, tai naira angam mang y mai patawi nai kamta, huni si ai py hunira y mai patawi ai nai tla. Hini apathyp nai reita ly cheng vui jeungrei kamngo lawi naira nga hai ai nai sa nai ne.

22 Peang nai keung samrang ly Areng i leu pei naichi theung i ha harei ai athang khai y naimy taphra nai kamngo sa lawh i, 23 my i kamngo apany phai apany baly, no-na by y nai mi-i katai harei hawi apathyp ai nai tla. 24 Ni ly maicham tosyh ngan mang i leng patlum nai tawnbawichi tleh nai meingtym y, huni mi-i lu tleaung y kiu kheang iy, mi-i ai tleh ai nai tla. Hini kapathypra ly kamngo lawira nga ai nai ne. 25 Pathyp pi nai keung ly my i kiu pa jeung hawi thi y tapo iy, maicham takichira i kachawnchira thi tabei ai nai tla. Thi kamlai ly maicham kheutangra y leih jawn ai nai tla. 26 Naibaly leunghawi kapathyp tawnbawichira i thau ai leng patlum nai kamta, mi-i thau ngiereichi ai, maicham salo y leng patlum ai nai tla. Hunai kamta khyp pathyp pi nai keung ly peang nai keung samrang i kamngo molam talam nai deaungkho y, huni samrang ly kamngo lawi naira nga ai.

27 Khumi leaungrei ly Areng i leu pei naichi theung i ha harei ai, athang khai y naimy taphra nai kamngo tla lawh i,Ref 4:27-31 Kati 15:27-28 28 ni ly my i kamngo apany phai apany baly, no-na by y nai mi-i nu harei hawi apathyp ai nai tla. 29 Ni ly maicham tosyh ngan mang i tawnbawichi tleh nai meingtym y, mi-i lu tleaung kiu kheang iy, huni mi-i ai tleh ai nai tla. 30 Pathyp pi nai keung ly my i kiu pajeung hawi thi y tapo iy, maicham takichira i kachawnchira thi tabei ai nai tla. Thi kamlai ly maicham kheutang y leih jawn ai nai tla. 31 Naibaly leunghawi apathyp nai tawnbawichira i thauchi la nai kamta, mi-inu ra i thau ngiereichi la iy, maicham salo y leng patlum ai nai tla. Hini talam nai mui kahawi ai ly Areng my kawn pi nai ne. Pathyp pi nai keung ly hina nai kamta khumi leaungrei i kamngo molam talam pi nai deaungkho y, huni khumi ly kamngo pahen naira nga ai. 32 Khumi leaungrei ly kamngo pahen nai kapathypra beram syn lawh baly, huni beram ly no-na by y nai beram nu ne ai nai tla. 33 Ni ly maicham tosyh ngan mang i leng patlum nai tawnbawichi tleh reng nai meingtymra, huni tawnbawi lu tleaung y kiu kheang iy, tawnbawi tleh ai nai tla. 34 Pathyp pi nai keung ly my i kiu pajeung hawi thi y tapo iy, maicham takichira i kachawnchira y tabei ai nai tla; thi kamlai ly maicham kheutangra leih jawn ai nai tla. 35 Naibaly leunghawi katalamra tawnbawi thau la nai kamta, beram nu i thau ngiereichi la iy, katalamra hawi vanrei, maicham salo y leng patlum ai nai tla. Pathyp pi nai keung ly hina nai kamta, khumi leaungrei i kamngo molam pathyp pi nai deaungkho y, huni khumi ly kamngo pahen naira nga ai.