3
Leunghawi kapathypra
1 Khumi ami py mymy i si katai hawi leunghawi kapathypra talam ai na baly, huni si ly no-na by y nai si katai, ti y baly si nu ne ai nai tla.
2 Huni khumi ly Areng i awmra tabynako katheu pa-khora si katai i lu tleaung y kiu kheang iy, huni si tleh ai nai tla. Aron i chapochi napi nai pathyp pi nai keungchi ly tawnbawi i thi ai maicham makeng palyhreira katheng prei ai nai tla.
3-4 Si takutara bam nai thau, pakawi seaungru hawi huni ai bam nai thau hawi pathym hawi keh nai phyreichi ai Areng teng y talam ai nai tla.
5 Pathyp pi nai keungchi ly hunichi ai, leng patlum naira hawi vanrei, maicham salo y leng patlum ai nai tla. Huni talam nai mui kahawi ly Areng my kawn pi nai ne.
6 Beram, ti y baly mi-i hawi leunghawi kapathypra talam ai na baly, no-na by y nai katai, ti y baly nu talam ai nai tla.
7 Beram hawi apathyp nai khumi ly,
8 Tabynako mo y beram i lu tleaung kiu kheang iy, huni beram ai tleh ai nai tla. Pathyp pi nai keungchi ly tawnbawi thi ai maicham makeng palyhreira katheng prei ai nai tla.
9 Hunaibaly beram thau, tamai, takutachira i thau ngiereichi,
10 pakawi seaungru hawi hunira i thau, pathymra i hawi keh nai phyreichi ai Areng teng y talam ai nai tla.
11 Kalop amsi nai pathyp pi nai keung ly hunichi ai maicham salo y leng patlum ai nai tla.
12 Mi-i hawi apathyp nai khumi ly,
13 Tabynako mo y mi-i lu tleaung kiu kheang iy, huni mi-i ai tleh ai nai tla. Pathyp pi nai keungchi ly tawnbawi thi ai maicham makeng palyhreira katheng prei ai nai tla.
14 Hunaibaly takutara y bam nai thau, pakawi seaungru hawi hunira i thau,
15 pathymra i hawi keh nai phyreichi ai Areng teng y talam ai nai tla.
16 Pathyp pi nai keung ly hunichi ai maicham salo y leng patlum ai nai tla. Huni katalamra i mui kahawi ly Areng my kawn pi nai ne; thau ngiereichi ly Areng i vui ne.
17 Israela chengchi ly thau py, thi py cho ngau y; meingtym tleirei y awm nai Israela cheng bawibawichi ly hini reita teaung patawm jojo ai nai tla.