5
1 Sa tamang nai molam y kamngo pahen nai kapathypra talam ai nai tla.
Khumi leaungrei ly tara jeung y pany hai ai nai palau nai khala, ni ly mymy i niu nai, thai nai kamta thui khyp y lawh baly, tamang nai ne.
2 Khumi leaungrei ly tawnbawi kadei ai reita leaungsai y chai y nanai pany y nai y nam lawh baly, athang khai y naimy nam lawh bo, nanai pany phai apany baly, ni ly chai y i kamngo tla bo.
3 Khumi leaungrei ly tlangra i amso ngai nai ai, athang khai y naimy nam lawh baly, nam lawh abi lawh bo nanai pany phai apany baly, ni ly chai y i kamngo tla bo.
4 Khumi leaungrei ly mani mora py avo mo, avo y mo, nanai dawn dan y naimy vaineng abeu lawh baly, huna nai vaineng abeu nai pany phai apany baly, ni ly kamngo tla bo.
5 Khumi leaungrei ly kamngo sa baly, tamang bo nanai apany ai nai tla.
6 Ni ly tamang nai molam Areng teng y beram nu, ti y baly mi-i nu hawi apathyp ai nai syn takengkei ai nai tla. Pathyp pi nai keung ly huni khumi i kamngo molam y tawnbawi talam pi ai nai tla.
7 Ni ly beram mo, mi-i mo talam ai nai by y lawh baly, ni i kamngo molam y yhm buhu nyhrei, ti y baly amprym buhu nyhrei Areng teng y syn ai nai tla. Harei ly kamngo pahen nai kapathypra mo, vai harei ly leng patlum nai kapathypra mo, talam ai nai tla.
8 Ni ly hunichi ai pathyp pi nai keung teng y syn iy, pathyp pi nai keung my ly huni tavo lu leu hai y naimy kaneaung mie ai nai tla.
9 Naibaly huni tavo thi phyrei ai ly maicham teng mang y katheng prei iy, huni bo i thi ly maicham kheutang y tapijai ai nai tla. Hini ly kamngo pahen nai kapathypra ne.
10 Pa-nyh tavo ai ly reita kamta leng patlum ai nai tla; huna nai kamta pathyp pi nai keung ly huni khumi pahenra nga ai nai talam pi ai nai tla. Naibaly huni khumi py kamngo lawira nga ai.
11 Ni ly yhm buhu bomrei, ti y baly amprym buhu bomrei py, by y lawh baly, kamngo pahen nai kapathypra i vui tako dei sierei, pathyp pi nai keung teng y syn ai nai tla. Huni katalamra ly teicha teinei katalamra ny y; kamngo pahen nai katalamra ne nai deaungkho y, tako dei salo y olive asitui, ti y baly mui kahawi leih ai nai avo y.
12 Pathyp pi nai keung ly Areng teng y tako dei talam be nai ka-ma-ra lawm ai nai tako dei kiu angsorei la iy leng patlum ai nai tla; hini ly kamngo pahen nai katalamra ne.
13 Hina nai kamta pathyp pi nai keung ly huni khumi i vui kamngo pahen nai kapathypra talam pi nai deaungkho y, ni ly kamngo lawira nga ai. Teicha teinei talam nai kamta, tako dei kamlai ly pathyp pi nai keung i vui ne.
14 Areng my Mosi teng y hini reitachi pei pi bo.
15 Ami mo ly Areng i vui y kachai khai patyp naichi ai athang khai y naimy sa tamang lawh baly, ni ly Areng teng y no-na by y nai beram katai, ti y baly mi-i katai syn ai tla. Huni beram, ti y baly mi-i i vang apani nai tangka py syn ai nai tla.
16 Ni ly chai naira ai kachai so teang y nai molam tangka hawi peh ai nai ly chungphy apomrei tleang panawi bi iy, pathyp pi nai keung teng y talam ai nai tla. Naibaly pathyp pi nai keung my huni khumi i kamngo molam y beram katai, ti y baly mi-i katai hawi pathyp pi nai deaungkho y, ni ly kamngo pahen naira nga ai.
17 Khumi ami py Areng i reita leu pei nai ha harei ai athang khai y naimy taphra lawh baly, ni ly kamngo sa nai deaungkho y pajeng naira avum ai.
18 Ni ly pathyp pi nai keung teng y no-na by y nai beram katai, ti y baly mi-i katai ha harei vang apani yb nai tangka py talam ai nai tla. Naibaly pathyp pi nai keung ly huni khumi i kamngo molam pathyp pi nai deaungkho y, ni ly kamngo pahen naira nga ai.
19 Huni ly Areng i tlang tleaung y sa tamang nai molam, kamngo pahen nai katalamra ne.