2
Teicha teinei Talam nai
1 Amimi py Areng teng y teicha teinei talam ai nai ngai baly, tako dei talam ai nai tla. Huni tako deira y olive asitui hawi miu katui leih iy;
2 Aron i chapo pathyp pi nai keungchi teng y syn pi ai nai tla. Kalop amsi nai pathyp pi nai keung ly tako dei angsorei, asitui hawi mui kahawichi syn iy, maicham salo y leng patlum ai nai tla. Huna nai kapathyp ly Areng ai pany jo nai katalamra ne. Hini talam nai mui kahawi ai ly Areng my kawn pi nai ne.
3 Teicha teinei talam nai kamlai ly pathyp pi nai keungchi i vui ne; huni teicha teinei ly Areng teng y talam chum nai teicha teinei ne nai deaungkho y khri pa-rei chai i, pathyp pi nai keungchi naini cha pajau khyh nai ne.
4 Takeang tleaung y paawp nai tako hawi talam ai na baly, takora y angbo abawi ai nai tlo y; tako dei hawi olive asitui katlen iy sa nai tako phi katho py ne sy, olive asitui hawi kaleu nai tako phi kangpo py ne sy, talam pajau.
5 Tamo laawm pangdaira taheang nai tako talam ai na baly, huni tako ly angbo abawi y nai tako deira y olive asitui katlen nai tako dei ne ai nai tla.
6 Huni tako talam nai khala tako kanawi piu iy, huni ka-kora asitui leih ai nai tla.
7 Laawmra taheang nai tako hawi talam ai na baly, olive asitui hawi katlen nai tako dei hawi sa ai nai tla.
8 Huni katalamra ai Areng teng y talam ai na baly, pathyp pi nai keung teng y au ai nai tla.
9 Pathyp pi nai keung ly huni katalamra ai maicham mang y syn iy tako bawibawichi ai Areng teng y talam ai nai molam, tako maidenrei la iy, maicham salo y leng patlum ai nai tla. Huni talam nai mui kahawi ai ly Areng my kawn pi nai ne.
10 Tako talam nai kamlai ly pathyp pi nai keungchi i vui ne; huni tako ly Areng teng y talam chum nai tako ne nai deaungkho y, khri pa-rei chai nai ne.
11 Areng teng y nangchi talam nai teicha teinei ngiereichi ly angbo abawi ai nai tlo y; Areng teng y talam nai teicha teineira y, mana khala py angbo, ti y baly khawi hang abawi ai nai avo y.
12 Nangchi saneng tleirei pakym achu nai amti amjang chaluchi ly Areng teng y talam ai nai tla. Na i py huni ai maichamra leng patlum ai nai tlo y.
13 Palawi ly nangchi hawi Tameuh sala y Leu Maikawm ka-ma-ra ne nai deaungkho y, teicha teinei talam nai tleirei palawi thiu ai nai tla. (Nangchi i talam nai kapathypra tleirei y palawi thiu ai nai tla.)
14 Nangchi ly tyn manme nai amti amjangchi ai Areng teng y talam nai khala chohnei taheang nai, ti y baly angjen talam ai nai tla.
15 Hunira y olive asitui hawi mui kahawi tabawi ai nai tla.
16 Pathyp pi nai keung ly chohnei hawi asitui jeng y, angjen hawi asitui maidenreichy la iy, mui katui ngierei hawi Areng i vui leng patlum ai nai ne.