LEVI THEAUNG I REITA
Levi theaungchi i reita cha-iu theung y Israela chengchi i chiu nai reita hawi reita leaungsaichi tahyh yb nai kamta, sa patyp ai nai pathyp pi nai keungchi i vui leu pei naichi abawi nai ne.
Hini cha-iu i sangum leu sai ly Tameuh ly kachai ne nai hawi, mymy i khumichi ly “Israela chengchi i chai parai nai Tameuh,” hawi amtawn jo ai nai chiu nai reitachi, heng nai leaungsai satangchi ne.
Areng Isu my pa-nyh aly len keh nai reita leu pei nai, “Nangmy ai atamen nai kamta nangmy i saleaungchi ai py tamen ai nai tla,” napi nai leusai ly pakeung 19 kadeaung 18 ra y avum pajau nai ne.
1
Bomverei leng patlum nai kapathypra
1 Areng ly mymy i awmra Tabynako theung mang dengdairei Mosi ai palau i,
2 Israela chengchi apathyp nai khala, teaung patawm ai nai reitachi pei pi nai ne.
Amimi py, tawnbawi hawi apathyp baly amy i si kanghu theung i mo, beram kanghu, ti y baly mi-i kanghu theung i mo, ha harei hawi apathyp ai nai tla.
3 Si hawi leng patlum nai apathyp ai na baly, huni si katai ly no-na awm ai nai tlo y. Areng my ni ai kawn pi ai nai, ni ly huni si katai ai Areng i awmra Tabynako katheu pa-khora y syn ai nai tla.
4 Ni ly si katai i lu tleaung y kiu kheang nai deaungkho y, huni si ly ni i kamngo pahen nai kapathypra y Areng my palawn pi ai.
5 Ni ly huni meingtym y si katai tleh iy Aron i chapo pathyp pi nai keungchi my huni thi ai Areng teng y talam chum baly, Tabynako katheu pa-khora awm nai maicham makeng palyhreira y katheng prei ai nai tla.
6 Naibaly ni ly si peih lei iy abai ai nai tla;
7 pathyp pi nai keungchi my maicham tleaung y theng heaung iy, mai sa ai nai tla.
8 Naibaly nganbawi akawi, lu hawi thauchi ai theng tleaung y khai ai nai tla.
9 Takuta hawi kheuchi ai tui hawi paju pyn ai nai tla; naibaly kalop amsi nai pathyp pi nai keung ly tawnbawi bomverei ai leng patlum ai nai tla. Hini talam nai mui kahawi ai ly Areng my kawn pi nai ne.
10 Huni khumi ly beram, ti y baly mi-i hawi apathyp ai na baly, huni tawnbawi ly no-na by y nai tawnbawi katai lawm ai nai tla.
11 Ni ly huni tawnbawi ai maicham i tosyh ngan mang y tleh ai nai tla; pathyp pi nai keungchi ly huni tawnbawi thi ai maicham makeng palyhreira y katheng prei ai nai tla.
12 Ni ly huni tawnbawi ai abai chum baly, kalop amsi nai pathyp pi nai keung my nganbawi, lu hawi thauchi ai maicham salo y khai ai nai tla.
13 Ni ly takuta hawi kheuchi tui hawi paju pyn ai nai tla; pathyp pi nai keung ly bom verei maicham salo y leng patlum ai nai tla. Hini talam nai mui kahawi ai ly Areng my kawn pi nai ne.
14 Nang ly tavo hawi apathyp ai ngai na baly, huni ly amprym buhu, ti y baly yhm buhu lawm ai nai tla.
15 Pathyp pi nai keung ly huni tavo ai maicham mang y syn iy kaneaung mie chum baly, tavo lu maicham salo y leng patlum ai nai talam ai nai tla. Tavo thi ai ly maicham sahawi y paleaung pawn ai nai tla.
16 Ni ly awichapu hawi vanrei awichapura i teicha ai ly la iy, maicham i nisi ngan mang y awm nai maiphura y aphi ai nai tla.
17 Ni ly tavo pakhi nyhrei ai syn iy taku phokra ai nai tla. Na i py pakhi aleng baw vui ai nai tlo y; naibaly bom verei maicham salo y leng patlum ai nai tla. Hini talam nai mui kahawi ai ly Areng my kawn pi nai ne.