19
1 Areng my Mosi teng y,
2 Israela khumi mipuichi i vui leu pei nai ly “Nangchi i Tameuh, kai Areng ly kachai ne nai deaungkho y, nangchi ly chai ai nai tla. Ref 19:2 Lev 11:44-45; 1Pet 1:16
3 Khumi luteng amhm ampo ai tahm khai ai nai tla. Kaimy leu kang pei nai kamta, Anawn kani y ja ai nai tla. Kai ly nangchi i Areng Tameuh ne.Ref 19:3 Theu 20:8, 12: Leu 5:12,16
4 “Kai ai khai su iy mynchi ai chiu moh. Tamo ngan hawi sa nai myn ai chiu moh. Kai ly nangchi i Areng Tameuh ne.Ref 19:4 Theu 20:23; 34:17; Lev 26:1; Leu 17:25
5 “Nangchi ly leunghawi kapathyp tawnbawi tleh nai khala, kai i leu pei naichi kamta talam baly, kai ly huni katalamra ai kawn pi ai.
6 Kapathypra talam nai kani, ti y baly kani pa-nyh y tawnbawi mawi cha ai nai tla. Pa-thom kani y khrairei palai nai mawi ly mai y leng vui ai nai tla,
7 ati mana nai mo na baly huni mawi ly reita y chai y nai ne. Pa-thom kani y huni mawi kamlai cha lawh baly, huni katalamra ly kaimy kawn pi ai ny y.
8 Amimi py huni mawi cha lawh baly, kai i vui pei patyp nai katalamra ai tahm khai y nai deaungkho y, huni khumi ai kai i khumichi theung i nai nyn va vui ai.
9 “Nangchi li hlaura i choh tyn baly ampheaung teng ka-kira i chohchi ly tyn u moh; tyn bawi y nai chohvuichi ai py tyn ali teang moh. Ref 19:9-10 Lev 23:22; Leu 24:19-22
10 Kreip akhora i athai jaw be y nai athaichi ai py, jaw nai khala akhui bawi y nai athaichi ai py, pakym ali teang moh. Huni athaichi ly khumi kamawnchi hawi cheng takhrachi i vui pahai pi ai nai tla. Kai ly nangchi i Areng Tameuh ne.
11 “Ami i vawnsai paviu moh, ami ai tapawp moh, ka-chawi thui moh.Ref 19:11 Leu 5:19-20; Theu 20:15-16
12 Sa khyp ai ny y pui naimy kai i amyn y tau iy leu adeu moh. Huna nai sa nai y kai i amyn taphra moh. Kai ly nangchi i Areng Tameuh ne.Ref 19:12 Theu 20:7; Leu 5:11; Mt 5:33
13 “Amy tleaung y atho di nai khumi ai, kamjau kamteang khai moh; ami i vawnsai lawm moh. Ka-tham vang pei ai awm nai ly kani dym y naimy pei praw ai nai tla; khawn mang khrairei pei y naimy khai moh. Ref 19:13 Leu 24:14-15
14 Kano kapang ai pasawi moh; mei kamju mo y pathuikhe iy avah ai naira khai pi khyp moh. Kai i leu tangai ai nai tla. Kai ly nangchi i Areng Tameuh ne.Ref 19:14 Leu 27:18
15 Ka-jo kahmchi ai leu meitang naimy chih pi ai nai tla. Khumi kamawn ai patleh takhra moh; kanangchi ai ly meimai khen moh. Ref 19:15 Theu 23:6-8; Leu 16:19
16 Ami kangji nga ai nai leu ly ahei hai reng moh. Dei ai ataing nanai pa-rei tamang nai khumi ai tara chih nai thym khala, huni khumi mang y asa hai pajau nai pany naira awm lawh baly, apha y naimy pany hai pi ai nai tla. Kai ly Areng ne.
17 “Ami ai paleung ka-e khai moh; ni molam y nang ly kamngo so y ai nai, ni hawi adyh adawi y nairachi, nihawi ka-vum sa iy alyra so. Ref 19:17 Mt 18:15
18 Ami ai vawitheung tha moh, paleung ka-e khai moh. Nangmy ai atamen nai kamta saleaung deaungpa ai py tamen ai nai tla. Kai ly Areng ne.Ref 19.18* 19.18: Mt 5:42; 19:19; 22:39; Mk 12:31; Lk 10:27; Rom 13:9; Kal 5:14; Jak 2:8
19 “Kai i leu kang pei naichi tangai. Khawn nai tawnbawi amjy atawm y nai tengtawi ly ti tapeung moh. Li harei y amti amjang ti amjy nyhrei pati mei moh. Kalang vui amjy nyhrei hawi aneng nai ateaung ly amchiu moh.Ref 19.19 Leu 22:9-11
20 “Khumi leaungrei ly my i miseaung nu ai takhra neampacho leaungrei teng y aju katheang palawn ai nai jo ai adeu chum nai bo y, van nai khumi my huni miseaung nu i vui vang pei y rai khala, angchei i yhmkeung ly miseaung nu hawi ta-pui ta-chi apha lawh baly, nini leaung nyhrei ai padei mei ai nai tlo y, takhra pajeng naira naini tym hai ai nai tla. Ati mana nai mo na baly huni miseaung nu ai ni my peang rai nai deaungkho y ne.
21 Ni ly kamngo pajengra lawi ai nai beram katai harei ai kai i awmra Tabynako katheu pa-kho mang y jeu hai ai nai tla.
22 Pathyp pi nai keung ly huni beram ai pathyp iy, ni i kamngo pahen ai nai kachai sa pi ai nai tla. Huna nai khala Tameuh ly ni i kamngo pahen pi ai.
23 “Nangchi ly Kanan pri y tym nai khala thengthai keung ui iy huni keung i saneng thomrei athai nai ly reita y chai y nai deaungkho y, huni athaichi ly cho u moh.
24 Palyh saneng y athai bawibawichi, kai Areng teng y kawn nai tarawi y talam ai nai tla.
25 Na i py pa-ngo saneng tym baly nangchi ly thengthaichi cha pajau bo. Nangchi ly huna nai kamta leu tangai u baly nangchi i thengthai keungchi ly athai pasu ai. Kai ly nangchi i Areng Tameuh ne.
26 “Thi abawi nai mawi ly cho u moh. Leung hawi atamchi amtiu u moh.Ref 19.26 AA 9:4, Lev 7; 26-27; 17:10-14; Leu 12:16; 23:15:23; 18:10
27 Dei nai khumi i vui paleung si nai ka-ma-ra lawm nai, lu teng ka-ki sam vau moh, labeaung mui py avau u moh.
28 Nangmy i tlang tleaung y, mang athun moh, kadei i vui paleung mawn vo tangam nai i vui, nangmy i tlang y a-oh moh. Kai ly Areng ne.Ref 19.27-28 Lev 21:5; Leu 14:4
29 “Kanan pri tameuhchi ai chiu nai meingtymra i bimachi kamta, nangmychi i chaniuchi ai lawm hai iy nichi ai kangji pei moh. Huna nai sa baly nangchi ly Tameuh ai khai su iy kaja phra u ai. Ref 19.29 Leu 23:17
30 Anawn kani y ja iy kai ai chiu nai meingtym ai py tahm khai, Kai ly Areng ne.Ref 19:30 Lev 26:2
31 “Kadeichi i phailochi hawi leu arum nai khumichi teng y tau hnei moh. Huna nai sa lawh baly nangchi ly reita leaungsai y amso ngai nai lawm u ai. Kai ly nangchi i Areng Tameuh ne.Ref 19.31 Leu 18:11; 1 Sam 28:3; 2 Areng 23:4; Is 8:19
32 “Miteaungchi ai tahm khai ai nai tla; kai ai jei kaji iy kai i leu tangai ai nai tla; Kai ly Areng ne.
33 “Nangchi i pri y awm nai cheng takhrachi ai ano u moh.
34 Nichi ai amy cheng tengtawi kamta palawn iy, amy ai atamen nai kamta, nichi ai py tamen teang ai nai tla. Nangchi py Aikupta pri y cheng takhrachi kamta lawm u nai ly apany u jo ba. Kai ly nangchi i Areng Tameuh ne.Ref 19.33-34 Theu 22:21, Leu 24:17-18; 27:19
35 “Teng y nai nehra sie khyrychi teaung iy ami ai tapawp moh.
36 Siju amto, sie khyry katengchi teaung ai nai tla. Kai ly nangchi ai Aikupta pri i dengdairei pahawi nai nangchi i Areng Tameuh ne. Ref 19.35-36 Leu 25:13-16; Lk 20:10; Ezek 45:10
37 Kai i reitachi hawi leu pei nai ngiereichi tangai u. Kai ly Areng ne.”