1 Areng my Mosi teng y, 2 Israela chengchi i vui leu pei nai ly “Kai ly nangchi i Areng Tameuh ne. 3 Nangchi awm vai nai Aikupta khumichi i sa reng nai saichi py, nangchi ai vai kaimy pahawi iy awm ai nai kanan pri khumichi i sa reng nai saichi py so u moh. 4 Kai i leu pei naichi phai tangai u ly patawm u. Kai ly nangchi i Areng Tameuh ne. 5 Kai i reita hawi leu pei naichi phai patawm u; hunaibaly nangchi ly hengra nga u ai. Kai ly Areng ne,” napi.Ref 18:5 Neh 9:29; Ezek 18:9, 20:11-13; Lk 10:28; Rom 10:5; Kal 3:12

6 Areng ly hina nai kamta leu pei nai ne. Nangchi ly nangmychi i amjo amnau kasa nai hawi ta-pui ta-chi apho moh. 7 Nangmy i amhm hawi ta-pui ta-chi apha nai molam y, ngampo ai kangji pei moh. Nangmy i amhm kypkyp ai py kangji pei moh. 8 Ngampo i aju katheangchi hawi ta-pui ta-chi apha nai molam y, ngampo ai kangji pei moh, takhrachi hawi py pajang sa iy, ngampo ai tahm khai y nai so moh.Ref 18:8 Lev 20:11; Leu 22:30; 27:20 9 Nangmy i tuicho kypkyp hawi mo, yhm vanrei, ti y baly yhm takhra awm iy tleaungri acheang nai ampo mang i tuicho lengsang, ti y baly amhm mang i tuicho lengsang hawi mo py, ta-pui tachi apho ngau y. Ref 18:9 Lev 20:17; Leu 27:22 10 Nang i katu neampachy hawi ta-pui ta-chi apho ngau y; huni ly nangmy ai kangji apei nai tla. 11 Ampo y vanrei, amhm y takhra nai tuicho ampro ly ta-pui ta-chi apho ngau y; huni py nangmy i tuicho ne teang. 12-13 Ngampo i tuicho, ngamni, ti y baly ngamhm i amnau, ngamhmto hawi py ta-pui ta-chi apho ngau y. 14 Ngampochy i aju, ngamhmto hawi py ta-pui ta-chi apho ngau y. Ref 18:12-14 Lev 20:19-20 15 Nangmy i lengngo hawi py ta-pui ta-chi apho ngau y. Ref 18:15 Lev 20.12 16 Nangmy i amjo amnau i aju hawi py ta-pui ta-chi apho ngau y. Ref 18:16 Lev 20:21 17 Nang hawi ta-pui ta-chi apha vai nai neampachy i chaniu, ti y baly katu neampachy hawi py ta-pui ta-chi apho ngau y. Huna nai sa lawh baly nichi ly nang hawi thi ngan ka-bi ne i, nang ly thi ngan ka-bi hawi tamang nai kamngo tla. Ref 18:27 Lev 20:14, Leu 27:23 18 Nangmy i aju heng nai ryrei ly nang i aju amnau ai nang i aju katheang palawn ai nai pom ngau y.

19 Tlangchai awm nai neampachy ly reita leaungsai y chai y nai deaungkho y, tlangchai awm nai thym y nihawi ta-pui ta-chi apho ngau y. Ref 18:19 Lev 20:18 20 Khumi takhra i aju hawi ta-pui ta-chi apho moh; huna nai sa lawh baly nang ly reita leaungsai y chai y nai ne. 21 Nang i cho chanauchi ai Mole tameuh teng y leng patlum ai nai pei moh. Huna nai sa nai ly nangmy i Areng Tameuh ai tahm khai y nai ne. Ref 18:21 Lev 20:1-5 22 Neampacho tengtawi ta-pui ta-chi apho ngau y. Tameuh ly huna nai sa nai ai paso nai ne.Ref 18:22 Lev 20:13 23 Neampacho py, ti y baly neampachy py, tawnbawi hawi ly apajang moh; huna nai sa nai ly khumi i reita ny y nai deaungkho y, reita leaungsai my nang ai amso ngai hai nai ne. Ref 18:23 Theu 22.18; Lev 20.15-16; Leu 27:21

24 Nangchi ly huna naichi sa iy nangmychi ai chai hai y ai nai so moh. Nangchi awm ai nai pri i Kai, Areng my patheu ai nai chengchi ly huna nai chai y naichi sa iy mymychi ai chai hai y bo. 25 Nichi i sa nai kalopchi ly mychi i awm nai pri y chai hai y nai ne; hunai deaungkho y Areng ly huni pri ai pajeng iy, huni khumichi ai patheu vui ai. 26-27 Nichi ly huni amso ngai naichi sa i, hini pri y chai hai y nai ne; na i py nangchi ly hunai kamta so u moh. Israela cheng mo, nangchi hawi vanrei awm nai cheng takhra mo, nangchi bawibawi ly Areng i reita hawi leu pei naichi sa patawm u ai nai tla. 28 Hunaibaly nangchi by y rai khala i khumichi kamta, nangchi ai huni pri i nai ang patheu vui ai ny y. 29 Huna nai amso ngai nairachi sa nai khumi ai ly Tameuh i khumichi theung i nai nyn va vui reng nai py, nangchi pany u nai ne.

30 Naibaly Areng my, “Kai i kang pei nai leu phai tangai u; nangchi ny y rai khala i huni pri y awm nai khumichi i sa nai kamta amtiu u moh. Nangchi ly huna naichi sa nai molam y, nangmychi ai chai hai y ai nai aso u moh. Kai ly nangchi i Areng Tameuh ne,” napi.Ref 10:30 Lev 20:10