17
1 Areng my Mosi teng y leu pei nai ly
2 Aron, ni i chapochi hawi Israela cheng bawibawichi i vui y hini reitachi pei pi nai ne.
3-4 Areng i awmra Tabynako katheu pa-kho y ny y naimy, meingtym takhra y si mo, beram mo, mi-i mo tleh iy Areng teng y talam nai Israela cheng ly reita taphra nai khumi ne. Ni ly thi beu hai atyhtyh nai deaungkho y, ni ai ly Tameuh i khumichi theung i nai nyn va vui ai.
5 Hini reita i pany hai ai ngai nai ly vaichi khala Israela chengchi ly tawnbawichi ai daichi mang y tleh nai ne i py, vai ly Areng i mo y tleh hai nai ne. Nichi ly tawnbawichi ai Tabynako katheu pa-khora pathyp pi nai keung teng y syn pi iy, leunghawi kapathypra talam ai nai tla.
6 Pathyp pi nai keung my thi ai ly Tabynako katheu pa-kho sahawi i maicham makeng palyhreira y katheng prei ai nai tla. Naibaly thau ai ly leng patlum nai deaungkho y, Areng my kawn nai mui kahawi amseaung hai ai.
7 Israela khumichi ly Areng ai ka-awi sa naimy daichi theung y tawnbawichi tleh iy, vawinamchi teng y apathyp bi ai nai avo y. Israela khumichi ly hini reita pei nai ai teaung patawm jojo ai nai tla.
8 Israela cheng mo, Israela chengchi theung y awm nai cheng takhra mo, Tabynako katheu pa-khora ny y naimy takhra meingtym y
9 leng patlum nai kapathypra mo py ne sy, takhra tawnbawi ai mo py ne sy, Areng teng y talam lawh baly, huni khumi ai Tameuh i khumichi theung i nai nyn va vui ai.
10 Israela cheng mo, Israela chengchi theung y awm nai cheng takhra mo, thi abawi nai mawi cha lawh baly, Areng ly meimai hi pi vui iy mymy i khumichi theung i nai nyn va vui ai. Ref 17:10 AA 9:4; Lev 7:26-27; 19:26; Leu 12:16,23; 15:23
11 Heng nai amjychi i hengra ly thi y awm nai deaungkho y, Areng ly khumichi i kamngo pahen pi ai nai thi ngierei maicham tleaung y leih ai nai tla, nanai leu pei nai ne. Thi ly heng naira ne i, kamngo pachai thai. Ref 17:11 Heb 9:22
12 Hunai deaungkho y Israela cheng theung i py ne sy, Israela cheng theung y awm nai cheng takhra mo py ne sy, thi abawi nai mawi ly cho ngau y nanai Areng my leu pei bo.
13 Israela cheng mo, Israela chengchi theung y awm nai cheng takhra mo, cha ngau nai tawnbawi, ti y baly tavo nga lawh baly, huni heng nai amjy i thi ly khaileaung y leih iy, khaileaung hawi taphum ai nai tla.
14 Heng nai amjychi i hengra ly thi y awm nai deaungkho y, Israela chengchi ly thi abawi nai mawi cho ngau y. Cha nai khumi ai ly mymy i khumichi theung i nai nyn va vui ai, nanai Areng my leu pei bo.
15 Israela cheng theung i mo, cheng takhra mo, dei atyhtyh nai tawnbawi mawi, ti y baly mawi kasi my kei iy dei nai mawi cha lawh baly, my i ateaungchi pasiu iy tui ahiu pan ai nai tla. Ni ly dym mang khrairei ajeng iy, reita leaungsai y chai naira nga ai.
16 Hini reita ai patawm y nai khumi ly my i kamngolai pajengra avum ai.