40
Areng i awmra Tabynako tahyh nai hawi au nai
1 Areng my Mosi teng y,
2 “Areng i Tabynako ly angchei i lo, angchei i kani y tahyh pi ai nai tla.
3 Tabynako theung y leu sai horei pei naichi abawi nai Leu Maikawm Pawm khai iy, huni i mo y ly kanih ali jang khyp ai nai tla.
4 Tabynako theung y sabawi pakun iy, huni i ateaungchi ai sabawi salo y khai ai nai tla. Maisi yhm kateang py pakun iy maisi yhmchi ly huni salo y khai ai nai tla.
5 Rimui mui katui patawira muku maicham ai Leu Maikawm Pawm i mo y khai iy, Tabynako katheu pa-khora kanih ali jang ai nai tla.
6 Tawnbawi leng patlum nai maicham ai ly Areng i awmra Tabynako katheu pa-kho mo y khai ai nai tla.
7 Rahum ai ly Areng i awmra Tabynako hawi maicham sala y khai iy, huni rahumra tui kadeng ai nai tla.
8 Tabynako ka-ki tapang iy pa-khora y kanih ali jang ai nai tla.
9 “Tabynako hawi huni theung i awm nai ateaung bawibawi ai kachai lawm ai nai, tahm palyn nai asitui lei iy, Areng teng y au patyp ai nai tla.
10 Naibaly tawnbawi leng patlum nai maicham hawi huni i ateaung bawibawichi ai py, kachai lawm ai nai tahm palyn nai asitui leih iy chai hai keh ai nai tla.
11 Huna nai kamta teang, rahum hawi panuira kheu ai py, Areng teng y au patyp ai nai tla.
12 “Aron hawi ni i chapochi ai Tabynako katheu pa-kho mang y pahawi iy, reita y tui hawi apaju apachai u ai nai tla.
13 Aron ai pathyp pi nai keung ateaungchi amthyp hai ly ni ai tahm palyn nai asitui kachai leih iy au patyp ly kai i vui pathyp pi nai keung kalop sa hai ai nai tla.
14 Ni i chapochi ai py palau iy ateaung amthyp hai.
15 Naibaly nichi ai pathyp pi nai keung kalop sa hai ai nai, nichi i ampo ai tahm palyn pi nai kamta, nichi ai py tahm palyn nai asitui leih iy au patyp ai nai tla. Nichi ai hina nai kamta tahm palyn nai asitui leih khala naini, nichi i katu chanauchi ly pathyp pi nai keung y amtym u jojo ai,” napi.
16 Mosi ly Areng my leu pei nai kamta sa bo.
17 Nichi ly Aikupta pri i theu nai pa-nyh saneng, angchei lo, angchei i kani y Areng i Tabynako tahyh u bo.
18 Mosi ly Tabynako panuirachi tahyn bo; naibaly angpang dawnchi pado i, lengteaungchi thawi iy chenghengchi py leng bawi bo.
19 Ni teng y Areng my leu pei nai kamta, Tabynako amphu tabiu iy huni amphu salo y, vai harei tabiu bi nai ne.
20 Huni bo y ni ly lengseaung phei nyhrei ai Leu Maikawm Pawm theung y khai typ bo; Pawm i sengtlengchira y samtleang thawi iy, khym py Pawm salo y tleang typ bo.
21 Naibaly ni ly Pawm ai Tabynako theung y pakun iy, kanih ali hang nai jang hai i, Areng my leu pei nai kamta Leu Maikawm Pawm ai jang me bo.
22 Ni ly Areng i leu pei nai kamta sabawi ai, Tabynako theung i tosyh ngan, kanih ali jang nai angam mang y khai iy,
23 Areng my leu pei nai kamta Areng teng y talam ai nai tako ly sabawi salo y khai bo.
24 Ni ly maisi yhm kateang ai Tabynako angtheung, tokalawi ngan sabawi teng mang y khai.
25 Naibaly Areng my leu pei nai kamta, Areng i mo y maisi yhmchi thawn bo.
26 Ni ly muku maicham ai py Areng i awmra Tabynako angtheung, kanih ali jang nai mo y khai bo.
27 Areng my leu pei nai kamta, maicham tleaung y rimui mui katuichi patawi nai ne.
28 Ni ly Tabynako katheu pa-khora kanih ali jang chum baly,
29 Tabynako katheu pa-kho mo y leng patlum nai maicham ai khai bo; Areng my leu pei nai kamta, leng patlum nai kapathypra hawi, teicha teinei katalamra py, maicham tleaung y talam nai ne.
30 Ni ly rahum ai Tabynako hawi maicham sala y panui iy tui kadeng bo.
31-32 Areng my leu pei nai kamta, Mosi, Aron hawi ni i chapochi ly Tabynako theung y kun nai khala py, maicham sahawi y ahai nai khala py, nichi i kiu kheuchi, hunira y apaju apachai u.
33 Naibaly Mosi ly Tabynako hawi maicham ka-ki angpang tapang iy, apai pa-khora kanih ali jang bo. Hunaibaly Mosi ly sa ai nai ngiereichi sa angym be bo.
Areng i Tabynako salo y tamai beu nai
(Kati 9:15-23)
34 Naibaly Areng i awmra Tabynako salo y tamai beu i, Areng i nang parai nai kangvang sangso ly Tabynako angtheung y angvang phang na bo. Ref 40:34 1 Areng 8:10-11; Is 6:4; Ezek 43:4-5; Amt 15: 8
35 Hunai deaungkho y Mosi ly Tabynako angtheung y kun pajau y.
36 Israela chengchi ly Tabynakora i tamai aheang pan nai khala naini, meingtym takhra mang y tai ai nai asyh u thai nai ne.
37 Tabynako y tamai beu nai sala ryrei ly khuleaung amso thai y.
38 Israela chengchi ly khuleaung amki nai lam jeungrei, Tabynako salo kani thun y tamai beu nai ai py, vum y maiteaung kangvang angvang nai ai py niu u nai ne.