5
Pahen ai nai chiu sa nai
1 Aw Areng, kaichi teng y tym naichi ly ati mana nai leaungsaichi mo, nanai pany pi jo kyh ba.
Kaichi ai khen kyh ly kaichi i tahm anem nai sai niu pi kyh ba.
2 Kaichi i yhmtheaung katuichi ly apany vai y nai khumichi kiu y tym lawh bo.
Cheng takhra khumichi ly kaichi i yhmchira y athum u vui bo.
3 Kaichi i ampochi ai ly paleung ka-echi my padei be bo i,
amhmchi ly lumaichi lawm u bo.
4 Kaichi ly kaimychi nei ai nai tui molam py, vang pei ai nai tla.
Theng py van ai tla nai ne.
5 Kaichi ly keaungngo kano kasauchi hawi kula-iuchi kamta, nithun mang athorei my pakhau nai avum u bo.
Kaichi ly khri pa-rei paha i py, anawn ai nai ngo y.
6 Kaichi ly kaimychi heng ai nai i vui y, teicha teinei aleu pa-rei nga ai nai molam py,
Aikupta pri hawi Asuria pri mang y chei iy cheaung ai nai tla bo.
7 Kaichi i amsi pajochi ly kamngo sa tamang iy, dei u pawn nai deaungkho y,
kaichi ly nichi i kamngo mynji pho ai nai tla.
8 Miseaungchi hawi takhra y na pa-rei, nichi my ang peang nai avum u teu i py,
nichi kiu tleaung i nai kaichi ai, ami py atleu pajau y.
9 Daichi avangchira y khumi tleh nai keungchi, aki aleaung naimy awm nai deaungkho y,
kaichi ly tlang areu iy, teicha teinei kahau u.
10 Kajeu kanglam pavam nai deaungkho y keaung no hai i,
kaichi i ngan tlang ly tako paawp nai mai kabi kamta bi na bo.
11 Kaichi i ajuchi ly Zion mawi y my, pajang nai avum u bo.
Juda avang tleirei y awm nai kaichi i chaniu anglochi ai kamjau kamteang khai iy, hawi y naichi sa u.
12 Paleung ka-echi ly kaichi i luchi ai patiu iy, akaeura y bang u bo;
nichi ly miteaungchi ai py, tahm khai u y.
13 Kaichi i thawndeang deaungdichi ly miseaungchi kamta choh deng ai nai tla.
Deaungdichi py, ji parai nai theng aeangchi atlymvi atlymvi naimy apu ai nai tla.
14 Miteaungchi ly mary apai pa-kho sahawi y ateh u y leang bo.
Thawndeang deaungdichi py, katyn kapauchi beu u y leang bo
15 Amo theu nairachi ly kaichi deung y tama vui bo.
Lam naichi ly paleung si nairachi mang y amtlau vui bo.
16 Kaichi i amlyh ai naira ly ha py by y leang bo.
Kaichi ly kamngo sa tamang nai deaungkho y, taham si.
17 Kaichi ly paleung phra iy meikatui angdeang nai deaungkho y,
kaichi i mei ly khen nai niu pajau y na bo.
18 Zion mawi ly khumi angso by y nai deaungkho y,
khivachi ly mary kaphrara y aki aleaung nai ne.
19 Na i py aw Areng, nang ly deungtasarei samrang ne.
Nang i peang naira ly deungtasarei awm jo ai.
20 Nang ly ati mana nai y kaichi ai avawrei tami vui lawh mo?
Ati mana nai y hina tanrei kra nanai pa-rei, kaichi ai khai su lawh mo?
21 Aw Areng, nangmy teng y jeu ali teang ai nai pei kyh ba. Kaichi ai pahawi ali teang kyh ba!
Jangni i kamta kaichi ai phum-ang haiho len hai kyh ba.
22 Ti y baly nang ly kaichi ai deungtasarei, khai su ai bo a?
Nang i kado theu nai rym nai neng by y bo a?