23
Joseah my myn y chiu naira taphra vui nai
(2 Neng 34:3-7, 29-33)
1 Samrang Joseah ly Juda pri hawi Jerusalem mary i miteaung kehchi ai palau iy,
2 pathyp pi nai keungchi, amochi hawi khumi kamawn kanang patleh takhra y naimy, mary i khumi bawibawichi hawi vanrei, Achura yhm mang y chei nai ne. Samrang ly huni khumi bawibawichi teng y, Achura yhm theung y niu nai leu maikawm cha-iu ai tem pa-rei, tao pajeng parai naimy phain pi.
3 Ni ly samrang yhm i yhmmawm sahawi y angdo iy, “Kai ly nang i leu tangai ai; nang i leu hawi Reita leu pei naichi ai, paleung, phailo, atho bawibawi hawi atyp ai,” nanai Areng hawi leu maikawm asa bo.
4 Naibaly Joseah ly pathyp pi nai keung kalen keh Helkia, my i bangtang pathyp pi nai keungchi hawi, Achura yhm katheu pa-kho tym nai tamcheaungchi teng y, bala tameuh, Aser tameuh nu hawi ka-sichi ai chiu naira y teaung nai ateaung alangchi ai Achura yhm theung i nai patheu pawn ai nai leu pei bo. Samrang ly huni ateaung alang bawibawichi ai, mary angam mang i Kidron leaunghawi sahawi y mai hawi leng iy, maidymchi ly Bethela mary y syn hai bo. Ref 23.4-6: 2 Areng 21:3; 2 Neng 33:3
5 Ni ly Juda marychi hawi Jerusalem mary tengpang sahawi y mynchi teng y apathyp ai nai, Juda samrang my khai nai pathyp pi nai keungchi ai py, Bala tameuh, kanito, lo, ka-si, tempochi teng y apathyp nai pathyp pi nai keungchi ai py, kalopra i nai patheu pawn nai ne.
6 Ni ly Aser tameuh nu teng y talam nai tamkhawn py, Achura yhm theung i nai patheu vui iy mary angam mang i Kidron leaunghawi ra y mai hawi leng vui bo. Naibaly huni maidym ai dei lawm pa-rei deng iy, khumi mipuichi i khaileaungra y hei.
7 Achura yhm theung bimachi i yhmchi py taphra pawn bo. (Aser tameuh nu ai chiu naira y teaung nai ateaungchi ly huni meingtymra y aneng u nai ne.)
8 Samrang ly Juda marychira i pathyp pi nai keungchi ai Jerusalem mary y hawi iy, pri verei y awm nai huni khumichi i apathyp nai maichamchi ai py, tahm by y na pa-rei sa pi pawn bo. Mary theung y kun nai khala mary apai katheu pa-kho pui i langvawi mang y, mary lu areng Josua my sa nai katheu sahawi i mi-i myn vawinamchi teng y talam nai maichamchi py, taphra pi pawn nai ne.
9 Huni pathyp pi nai keungchi ly Achura yhm theung y atiti kalop sa u ai nai ngo y; na i py nichi ly mychi i ahawi pathyp pi nai keungchi nga nai, angbo abawi y nai tako ly cha ai nai nga u.
10 Huni bo baly ami py Mole tameuh teng y cho chanauchi ai mai y leng patlum nai kapathypra talam pajau y ai nai, samrang Joseah ly hinnom leaunghawira i mynchi ai chiu nai Topheth napi nai meingtym ai py, chai nem hai y bo. Ref 23.10: Lev 18:21; Jer 7:31, 19:1-6, 32:35
11 Ni ly kanito ai chiu ai nai Juda samrangchi my talam nai keaungngochi py la pi pawn iy, chiu naira y teaung nai ka-richi py, mai leng vui bo. (Hini ly tahm asang nai miteaung keh Nathan Meleh yhm sahawi i, Achura yhm apai pa-khora khai nai ne.)
12 Samrang Ahaz i awm nai samrang yhm amphu salo y Juda samrangchi sa nai maichamchi py, Achura yhm apai nyhrei theung y samrang Manase i sa nai maichamchi py, samrang Joseah ly taphra iy dei lawm pa-rei sa chum baly, Kidron leaunghawi theung y aphi pawn nai ne.Ref 23.12: 2 Areng 21:5; 2 Neng 33:5
13 Samrang Joseah ly Jerusalem mary nisi, olive mawinote 23:13\xk Olive mawi: Hebrai leu y “kamngo mawi” napi. \x*tokalawi ngan mang y Sidon i tameuh Asatare, Moba tameuh Khemosa, Ammon tameuh Molechi ai chiu ai nai samrang Solomon my sa pi nai maichamchi py, chai nem hai y bo. Ref 23.13: 1 Areng 11:7
14 Samrang Joseah ly leungchengchi taphra iy, Aser tameuh nu i tamkhawnchi panawi pi pawn. Naibaly huni meingtymchi ra y khumi hiuchi kawi hai cheng bo.
15 Samrang Joseah ly Israela chengchi ai kamngo lam mang y pahawi nai keung, Neba i chapo samrang Jeroboam i Bethela meingtymra y sa nai chiu naira meingtymchi py, taphra pawn. Joseah ly maichamchi panawi pawn iy, Aser tameuh nu teng y talam nai tamkhawn py mai leng vui bo. Ref 23.15: 1 Areng 12:33
16 Naibaly Joseah ly khen amki prei i, mawi saleung y awm nai tapreaung phyrei niu nai deaungkho, huni tapreaungra i khumi hiuchi la iy, maicham salo y mai patawi hai bo. Hina nai hawimy samrang ly huni maicham ai chai nen hai y nai ne. Hina nai tym nai ly jangni y samrang Jeroboam ly my i reita pawi sa nai khala, maicham sahawi y angdo iy amo leaungrei my thui pi nai leu kamta tym nai bo. Samrang Joseah ly khen amki prei bi i, huna nai thui pi nai amo i tapreaung niu baly,Ref 23.16: 1 Areng 13:2
17 “Huni ly ami i tapreaung mo?,” nanai deng.Ref 23.17: 1 Areng 13:30-32
Bethela mary i khumichi my, “Huni tapreaung ly Juda pri i dengdairei jeu nai amo i tapreaung ne. Huni amo ly hini meingtym i maichamra y, nang i sa nai leaungsaichi thui pi yb nai keung ne,” napi.
18 Joseah my, “Huni tapreaung ly awm palai sy; ni i hiuchi kasyh u moh,” napi.
Hunai deaungkho y ni i hiuchi py, Samari mary i jeu nai amo hiuchi py, kasyh y naimy khai u nai ne.
19 Samrang Joseah ly Israela pri mary tleirei y awm nai, myn y chiu nai meingtymchi taphra. Huni meingtymchi sa nai molam y Israela samrangchi ly Areng ai kado patheu u nai ne. Joseah ly Bethela mary y sa nai kamta, huni maicham bawibawichi ai py sa.
20 Ni ly myn y chiu nai meingtymchi ra y kalop sa nai pathyp pi nai keung bawibawichi ai, mymychi pathyp nai maichamchi salo y khai iy padei chum baly, khumi hiuchi ai huni maichamchi salo y mai patawi pawn bo. Naibaly samrang ly Jerusalem mary y vawi ali teang nai ne.
Samrang Joseah my Katlen Vui Nai pawi sa nai
(2 Neng 35:1-19)
21 Samrang Joseah ly leu maikawm cha-iu theung y tajiu nai kamta, khumichi teng y amychi i Areng Tameuh i nang parai nai sai palo nai, Katlen Vui nai pawi sa ai nai leu pei nai ne.
22 Israela pri y peang nai tara chih nai keungchi deung i dengdairei, mani Israela samrang, ti y baly Juda samrang py, hini Katlen Vui nai pawi so u vai y leang.
23 Vai Joseah i peang nai saneng holai tajarei saneng y, Jerusalem mary y Katlen Vui nai pawi sa nai ne.
Samrang Joseah i sa palai naichi
24 Samrang Joseah ly Achura yhm theung y pathyp pi nai keung kalen keh Hilikiah my niu nai, leu maikawm cha-iu theung y tajiu nai kamta, sa u patawm ai nai Jerusalem mary hawi, Juda pri verei y awm nai vawinam pakun kawp naichi, leung sarachi, yhm typ nai mynchi, mynchi hawi chiu naira y teaung nai vawnsaichi taphra pawn nai ne.
25 Vaichi khala y, samrang Joseah kamta Mosi i Reita leu pei nai bawibawichi sa patawm iy, paleung, phailo hawi verei, ham parai naimy Areng ai chiu nai keung, samrang leaungrei py awm vai y leang. Ni bo y py awm ai ny y.
26 Na i py samrang Manase i sa tamang nai molam y, Areng ly Juda pri tlang tleaung y khrikhri pa-rei kado theu i, vai khrairei kado theu nai rym y nai ne.
27 Areng my, “Kai ly Israela pri y sa nai kamta Juda pri y py sa ai. Juda khumichi ai kaimy i mei ka-niu i nai, kapatheu vui ai. Kaimy vawi takhra nai Jerusalem mary hawi, kai ai chiu ai nai meingtym kapalawn nai Achura yhm malawn py, kaimy khai su ai,” napi.
Samrang Joseah i deung tlum nai
(2 Neng 35:20-36:1)
28 Samrang Joseah i atiti sa naichi ly Juda razavang cha-iu theung y tajiu pi typ nai ne.
29 Samrang Joseah i peang nai thym khala y Aikupta samrang Neko ly Asuria empara samrang ai sabawm ai nai tavaimichi hawi Euphrat tavo mang y amsa bo. Samrang Joseah ly Mekido mary y Aikupta tavaimichi ai paka ai nai atho sa i, tavai keung y dei nai ne.
30 Samrang i veu ai ly my i miteaung kehchi my tavai ka-ri tleaung y theng iy, Jerusalem mary y vawi hai i, samrangchi i tapreaung y up nai ne.
Juda mipuichi ly Joseah i chapo Joaha ai asitui leih iy samrang palyn bo.
Juda samrang Joaha
(2 Neng 36:2-4)
31 Joaha ly saneng 23rei awm nai khala y, Juda samrang lawm i, Jerusalem mary y lo thomrei peang nai ne. Ni i amhm ly Libana mary y awm nai Jeremia i chaniu Hamutal ne.
32 Huni samrang ly my i amsi pajochi i sa nai kamta sa i, Areng i tlang tleang y kamngo sa bo.
33 Aikupta samrang Neko ly ni ai patiu i, Hamath pri Riblah mary theaung y khai vui iy, Juda pri i tangka kaji sie 55,25rei hawi, muku kaji sie 55rei kahm palawn iy hnei. Huna khala i dengdairei Joaha i peang nai ly deung tlum nai ne.
34 Samrang Neko ly Joseah i chapo Eliakim ai Jehojakim, nanai amyn kangtha pei iy Juda pri i samrang y palyn bo. Joaha ai ly samrang Neko my Aikupta pri y hawi jo i, ni ly hu y dei nai ne.Ref 23.34: Jer 22:11-12
Juda samrang Jehojakim
(2 Neng 36:5-8)
35 Samrang Jehojakim ly Aikupta samrang my hnei nai kahm tangka pei pajau ai nai khumi mipuichi teng y mychi i ko nai kamta, phy pajyh iy cheaung bo.
36 Jehojakim ly saneng 25rei awm nai khala y, Juda samrang lawm i, Jerusalem mary y saneng holai harei peang nai ne. Ni i amhm ly Rumah mary y awm nai Pedaiah i chaniu Zebida ne. Ref 23.36: Jer 22.18-19, 26:1-6, 35:1-19
37 Jehojakim ly my i amsi pajochi sa nai kamta sa i, Areng i tlang tleaung y kamngo sa.