22
(2 Neng 34:1-2)
1 Josia ly saneng tajarei awm nai khala Juda samrang lawm i, Jerusalem mary y saneng 31rei peang nai ne. Ni i amhm ly Bozaka mary y awm nai Adaiah i chaniu Jedida ne. Ref 22.1: Jer 3:6
2 Josia ly Areng i kangai sa nai ne. Ni ly mymy i pajo Davida i sa nai kamta, Tameuh i reita bawibawichi ai sa patawm khyp bo.
Reita cha-iu niu nai
(2 Neng 34:8-28)
3 Samrang Josia my peang nai saneng holai tajarei saneng y, Meshulam i katu, Azalia i chapo secretary Shaphan ai Achura yhm mang y pato bo.
4 “Pathyp pi nai keung kalen keh Helkia teng y chei iy, Achura yhm y kun nai katheu pa-khora y pathyp pi nai keungchi my cheaung nai tangka vuikanai lo.
5 Naibaly tangka ly Achura yhm palum naira y lu sa nai keungchi teng y au ai nai, ni ai thui pi. Lu sa nai keungchi ly
6 lasamachi, kupe kakawpchi, iusai kakawpchi, hunichi i sa nai vang pei ai nai hawi, Achura yhm palum naira y aly ngai nai dengkeaung hawi lengseaung van naira y, huni tangka pasum ai.
7 Kalop sa naira y lu sa nai keungchi ly ka-ym awm naichi ne i, nichi ly tangka vuikanai patei ai nai aly ngai y,” napi.Ref 22.7: 2 Areng 12:15
8 Shaphan ly samrang i leu pei naichi, Helkia teng y thui pi. Naibaly Helkia my, mymy ly Achura yhm theung y Reita leu pei nai cha-iu niu nai thui pi bo. Helkia ly huni cha-iu ai Shaphan teng y pei pi i, Shaphan ly phain nai ne.
9 Naibaly ni ly samrang teng y vawi li teang iy, “Nang i miseaungchi ly Achura yhm i tangkachi la iy, sa palum naira y lu sa nai keungchi teng y pei pi u bo,” nanai amti pi nai ne.
10 Naibaly, “Hini cha-iu ly Hilikiah my kai teng y pei nai ne,” nanai thui pi chum baly, huni cha-iu ai samrang teng y raawi amkau parai naimy phain pi bo.
11 Samrang ly phain pi nai Reita leu thai nai khala y paleung si i, ateaung sei vui bo.
12 Naibaly samrang ly pathyp pi nai keung Hilikiah, Shaphan i chapo Ahikam, Mikaia i chapo Akibor, samrang yhm secretary Shaphan hawi samrang i tamcheaung Asaiah, nichi ai palau iy,
13 “Nangchi ly Areng teng y chei iy, kai hawi Juda khumi bawibawichi i vui, hini cha-iu theung y abawi nai leu pei naichi molam y deng u cham. Achi i amsi pajochi ly hini cha-iura i thui pi naichi so patawm y nai deaungkho y, Areng ly achi ai kado ang theu hai bo,” napi.
14 Naibaly Hilikiah, Ahikam, Akidor, Shaphan hawi Asaiah, nichi ly Jerusalem mary kangthara y awm nai Huladah, napi nai neampachy amo teng y tym u i, leu deng u bo. (Huni neampachy i juvo ly Haraha i katu, Tikvah i chapo Shalum ne. Ni ly Achura yhm i baichu ateaung alangchi kry nai keung ne.)
15 Neampachy amo my nichi teng y, “Samrang teng y leu amti thui pi u.
16 Areng my, ‘Kai ly samrang i phain nai cha-iura y tajiu nai kamta, Jerusalem mary hawi mary i khumichi ai katamyh ai.
17 Nichi ly kai ai hivui iy, tameuh takhrachi teng y apathyp u bo. Nichi hina naichi sa nai ly kai ai kado theu hai nai deaungkho y, Jerusalem mary y rym pajau y nai kado theu nai mai kang hai ai.
18 Samrang i molam y Israela chengchi i Tameuh, kai Areng my hina nai leu pei bo. Nang ly Reita cha-iu theung y tajiu nai kamta sa nai ne.
19 Jerusalem mary hawi mary i khumichi ai pajeng ai, nanai kaimy leu pei nai thai nai khala, nang ly vo naimy nangmy i ateaung seih iy uikheih i, kai i mo y paleung apanem bo. Kai ly hini mary phra hai ai. Hini mary i amyn ly khumichi i amsawi kadeu lawm ai. Na i py kai ly nang i chiu sa nai pathang pi mang.
20 Hunai deaungkho y Jerusalem mary y kaimy tym hai nai patang naira ly nang niu ai ny y. Kai ly nang ai paleung awmnem naimy tlang tem hai ai,” napi. Huni khumichi ly huni leu amti pi ai nai samrang teng y vawi u bo.