24
1 Samrang Jehojakim my peang nai thym khala y, Babulon samrang Nebukhadnezar ly Juda pri y tiu ai nai tym. Jehojakim py ni i peang nai anui y saneng thom ryrei awm; huni bo baly tiu bo. Ref 24.1: Jer 25:1-38; Dan 1:1-2
2 Areng ly mymy i miseaung amochi dengdairei leu pei nai kamta, Juda pri taphra ai nai Babulon, Suria, Moba hawi Ammon tavaimichi ai pato bo.
3 Areng ly samrang Manase i sa tamang nai kamngo molam y, huni tleaung y kamngo by y nai khumichi ai padei nai molam y, Juda khumichi ai
4 mymy mei ka-niu i dengdairei, patheu pawn ai ngai nai deaungkho y, hina nai kamta sa nai ne. Huni kamngo molam y Areng ly Manase ai kamngo pahen pi y bo.
5 Jehojakim i atiti sa naichi ly Juda razavang cha-iu theung y tajiu pi typ nai ne.
6 Jehojakim dei nai khala, ni i chapo Jehojakhin ly samrang lawm bo.
7 Aikupta samrang hawi ni i tavaimichi ly mana khala py Aikupta pri i dengdairei theu ai nai ngo u y bo. Ati mana nai mo nabaly Euphrat tavo dengdairei Aikupta pri tosyh ngan khu ka-peang tym pa-rei, Aikupta khu ngierei ai Babulon samrang my peang vui nai deaungkho y ne.
Juda samrang Jehojakhin
(2 Neng 36:9-10)
8 Jehojakhin ly saneng holai tajarei awm nai khala, Juda samrang lawm i, Jerusalem mary y lo thomrei peang nai ne. Ni i amhm ly Jerusalem mary y awm nai Elanathan i chaniu Nahuta ne.
9 Jehojakhin ly ampo i sa nai kamta sa iy, Areng i tlang tleaung y kamngo sa bo.
10 Nebukhadnezar i tavailu arengchi my lu sa nai Babulon tavaimichi ly Jerusalem mary y katanmeuh nai ly samrang Jehojakhin i deung y ne.
11 Huna nai katanmeuh nai thym khala y, Nebukhadnezar mymy kypkyp py Jerusalem mary y tym.
12 Samrang Jehojakhin ly my i amhm, chapochi, tavai luchi, samrang yhm miteaung kehchi hawi vanrei, Babulon tavaimichi teng y tamawi aseih bo. Nebukhadnezar ly my i peang nai saneng tajarei awm nai khala y, Jehojakhin ai langheng hawi i,Ref 24.12: Jer 22:24-30, 24:1-10, 29:1-2
13 Achura yhm hawi samrang yhm theung i, vang kateng bawibawichi ai Babulon pri mang y syn pawn nai ne. Areng my thui pi yb nai kamta, Nebukhadnezar ly Achura yhm y teaung ai nai samrang Solomon i sa nai, muku ateaung bawibawichi ai kheaung pawn bo.
14 Nebukhadnezar ly Jerusalem mary i khumichi, samrang i cho chanauchi hawi lu sa nai keung ngiereichi, khumi bawibawi leaung 10,000reichi ai patiu iy langheng hawi nai ne. Ni ly khumi kamawn kateuchi ai naini Juda pri y daw su iy, tami thip kawp naichi hawi kalop kawp keh naichi ai ly hawi pawn bo.
15 Nebukhadnezar ly Jehojakhin hawi vanrei amhm ai py, ajuchi ai py, bangtangchi ai py, Juda chengchi ai lu sa nai keungchi ai py, Babulon pri mang y hawi pawn nai ne. Ref 24.15: Ezek 17:12
16 Nebukhadnezar ly aly len nai khumi bawibawi leaung 7,000reichi ai Babulon pri mang y hawi nai ne. Huni bo y tamo thip kawp naichi hawi kalop kawp nai khumi leaung 1,000reichi ai py hawi nai ne. Hunichi bawibawi ly tlang atho awm iy, tavaimi kalop sa pajau naichi ne.
17 Nebukhadnezar ly Jehojakhin i ampochy Mattniah ai samrang palyn i, amyn ly Zedekiah, nanai amyn pathi bo. Ref 24.17: Jer 37:1; Ezek 17:13
Juda samrang Zedekiah
(2 Neng 36:11-12; Jer 52:1-3a)
18 Zedekiah ly saneng 21rei awm nai khala y Juda samrang lawm i, Jerusalem mary y saneng holai harei peang nai ne. Ni i amhm ly Libana mary y awm nai Jeremia i chaniu Hamutal ne.Ref 24.18: Jer 27:1-22, 28:1-17
19 Zedekiah ly samrang Jehojakhin i sa nai kamta sa iy, Areng i tlang tleaung y kamngo sa.
20 Areng ly Jerusalem mary i khumichi hawi Juda pri i khumichi ai, khri pa-rei kado theu nai deaungkho y, mymy mei ka-niu i nai patheu pawn nai ne.Ref 24.20: Ezek 17:15