21
Juda samrang Manase
(2 Neng 33:1-20)
1 Manase ly Juda pri y samrang lyn nai neng khala, saneng holai nyhrei awm; ni ly Jerusalem mary y saneng 55rei peang bo. Ni i amhm ly Hepziba ne.
2 Manase ly kanan pri y Israela chengchi kun nai thym khala, Areng my patheu nai khumichi i amso ngai nai reitachi teaung iy, Areng i tlang tleaung y kamngo sa nai ne. Ref 21.2: Jer 15:4
3 Ni ly my i ampo Hezekia my taphra pawn nai myn y chiu nai meingtymchi sa palum teang. Bala tameuh teng y talam nai maichamchi sa iy Israela samrang Ahaz kamta, Aser tameuh nu i tamkhawn pado. Manase ly ka-sichi ai py chiu.
4 Mymy ai chiu ai nai meingtym ne, napi nai Areng my thui nai Achura yhm y, mynchi teng apathyp ai nai maichamchi sa. Ref 21.4: 2 Sam 7:13
5 Achura yhm apai nyhrei theung y py, ka-sichi ai chiu ai nai maichamchi sa.
6 Ni ly my i chapo ai py leng patlum nai katalamra palawn iy apathyp nai ne. Dawi kawp naichi hawi mo mang i satang thui kawp naichi amtiu iy, leung sarachi, vawinam pakun kawp naichi hawi amkawm. Ni ly Areng i tlang tleaung y khri pa-rei kamngo sa i, kado patheu nai ne.
7 Ni ly Aser tameuh nu i tamkhawn Achura yhm y khai; huni Achura yhm molam y Areng my Davida hawi chapo Solomon teng y, “Israela cheng holai nyhreichi i khu ka-peangchi ra y kaimy vawi takhra nai Jerusalem mary i hini Achura yhm ly kai ai chiu jojo nai meingtym lawm ai. Ref 21.7-8: 1 Areng 9:3-5; 2 Neng 7:12-18
8 Israela chengchi ly kai i leu pei nai bawibawichi tangai iy, kai i miseaung Mosi my pei nai Reita py patawm u baly, kai ly nichi i amsi pajochi teng y kapei pi nai hini pri i dengdairei, nichi ai kapatheu ai ny y,” napi.
9 Na i py Juda khumichi ly Areng i leu tangai u y; mymy i khumichi ai, kanan pri y Israela chengchi kun u nai thym khala, Areng my patheu pawn nai khumichi tleaung y py, hawi y keh nai kamngo sa hai ai nai Manase ly lam patei nai ne.
10 Areng ly mymy i miseaungchi hawi amochi dengdairei, thui pi nai ly
11 “Manase ly hini amso ngai naichi sa bo; kanan chengchi i hawi y sa nai tleaung y py, khri pa-rei hawi y naichi sa lawh bo. Ni ly my i sa nai mynchi hawi Juda khumichi ai kamngo lam mang y pahawi nai ne.
12 Hunai deaungkho y Israela chengchi i Tameuh, kai Areng ly satang thai nai khumichi lyh ai nai pa-rei, Jerusalem mary hawi Juda pri y ka-jeira tym hai ai.
13 Samari mary hawi Israela samrang Ahaz hawi katu chanauchi ai pajeng nai kamta, Jerusalem mary y kapajeng ai. Tamui changpyn iy pakhiu meuh nai samtang kamta, Jerusalem mary theung y khumi leaungrei py by y na pa-rei katamyh ai.
14 Dei kamthum khumichi ai kaimy khai su iy, paleung ka-echi teng y au ai. Paleung ka-echi ly nichi ai tiu iy, nichi i vawnsaichi lawm pi pawn ai.
15 Kai i khumichi ly nichi i amsi pajochi Aikupta pri i nai theu u nai neng khala i dengdai vaini khrairei, kai i tlang tleaung y kamngo sa iy kado patheu u nai deaungkho y, nichi ai kaimy pajeng ai,” napi.
16 Manase ly Juda mipuichi ai myn chiu ai nai lam patei iy, Areng i tlang tleaung y sa tamang hai bo. Huni bo y kamngo by y nai khumi neangneangchi ai padei iy, Jerusalem mary lamchi ra y thi leaung hai bo.
17 Manase i atiti sa naichi hawi kamngo sa naichi py, Juda razavang cha-iu theung y tajiu pi typ nai ne.
18 Manase dei nai khala ni ai ly Uz i akho, napi nai samrang i yhm apai theung y up nai ne. Naibaly ni i chapo Ammon ly ampo i meingtym samrang y atheng bo.
Juda samrang Ammon
(2 Neng 33:21-25)
19 Ammon ly saneng 22rei awm nai khala, Juda samrang lawm i, Jerusalem mary y saneng nyhrei peang bo. Ni i amhm ly Jotba mary Haru i chaniu Meshulemeth ne.
20 Ammon ly ampo Manase kamta, Areng i tlang tleaung y kamngo sa.
21 Ni ly ampo i sa nai kamta amtiu; ampo i chiu nai mynchi ai chiu.
22 My i amsi pajochi i Areng Tameuh ai khai su iy, Areng i leu pei naichi tangai y nai ne.
23 Ammon i bangtangchi ly ni ai samrang i yhm theung y, kangviu y padei u bo.
24 Naibaly Juda khumichi my Ammon ai padei nai khumichi ai padei iy, ni i chapo Josia ai samrang palyn u nai ne.
25 Ammon i sa nai atitichi ai Juda razavang cha-iu theung y tajiu pi typ nai ne.
26 Ammon ai ly Uz i akho theung y awm nai tapreaung y up nai ne. Naibaly ni i chapo Josia ly ampo i meingtym amtym iy. samrang lawm bo.