20
Samrang Hezekia i no nai hawi ali teang nai
(Is 38:1-8, 21-22; 2 Neng 32:24-26)
1 Huni neng khala y samrang Hezekia ly no i, deivi na. Amoz i chapo amo Isaia ly samrang teng y no de ai nai chei i, ni teng y, “Nang i no nai ly hawi teang y leang bo, dei takengkei ai. Hunai deaungkho y nang ly leu taviu ai awm naichi taviu ai nai Areng my leu pei nai ne. Dei ai nai angveirym ba,” napi.
2 Hezekia ly angpang mang y meimai hi iy,
3 “Aw Areng, kai ly nang i kalop ai ka-ym awm naimy sa. Nangmy sa hai ai ngai nai kamta sa nai ai pany pi ba,” nanai chiu sa iy khri pa-rei vo bo.
4 Isaia ly samrang teng i theu nai samrang i yhm umtang y tym y rai khala, Areng my ni teng y,
5 kai Areng i khumichi ai peang nai Hezekia teng y ali teang ly ni teng y, “Nang i amsi pajo Davida i Tameuh, kai Areng ly nang i chiu sa nai thai i, nang i meikatui py niu bo. Kai ly nang i no nai hawi hai ai i, nang ly kani thomrei bo baly Achura yhm y chei pajau ai.
6 Kai ly nang ai saneng holai pangrei heng bi ai nai pei ai. Kai ly nang hawi Jerusalem mary ai Asuria empara samrang teng i nai atleu ai. Kai i nang parai nai ai py, kai i miseaung Davida teng y leu adeu nai ai py, adawn iy kai ly hini mary ai ama hai ai,’ nanai thui pi,” napi.
7 Isaia ly samrang i miseaungchi teng y, “Ni i uisalura y thaidu athai hawi bi pi. Huni no nai ly tama vui ai,” napi.
8 Samrang Hezekia my, “Areng ly kai i no nai tama hai iy, kani thomrei kani y Achura yhm y chei pajau ai, nanai ly ati ka-ma-ra hawi pany pajau ai mo?,” nanai deng.
9 Isaia my, “Areng ly mymy i adeu nai kamta sa ai, nanai nang pany ai nai ka-ma-ra harei patei pi ai. Nang ly khailei salo y tla nai pa-pui ai, mo mang y kheu kan horei asyh nai niu ai nai ngai a? ti y baly nithun mang y kheu kan horei, anaw hai ai nai ngai a?,” napi.
10 Hezekia my, “Pa-pui ly mo mang y kheu kan horei asyh ai nai ly rai y, huna nai y nithun mang y kheu kan horei anaw hai ai nai ngai,” napi.
11 Naibaly Isaia ly Areng teng y chiu sa i, samrang Ahaz i sa nai khailei salo y tla nai pa-pui ly nithun mang y kheu kan horei anaw pi nai ne.
Babulon pri i savaichi
(Is 39:1-8)
12 Huni neng khala Baladan i chapo babulon samrang Meroda Baladan ly samrang Hezekia no nai satang thai; hunai deaungkho y, cha tajiu iy langseaung pa pi bo.
13 Hezekia ly savaichi ai lamchung iy, my i nang chawn nai muku, tangka, rimuichi hawi tavai ateaung bawibawichi patei pi bo. Vawnsai khai nai takunchi hawi pri verei y awm nai ngiereichi ai, huni khumichi teng y samrang my patei pi nai ne.
14 Naibaly amo Isaia ly samrang Hezekia teng chei iy, “Huni khumichi ly ma mang i jeu u nai mo? Nichi my nang teng y ati thui pi u mo?,” nanai deng.
Hezekia my, “Nichi ly khri pa-rei palo nai Babulon pri dengdairei jeu nai ne,” napi.
15 Isaia my, “Nichi ly samrang i yhm theung y atitichi niu u mo?,” nanai deng.
Hezekia my, “Nichi ly samrang yhm theung y awm nai ngiereichi niu u nai ne. Vawnsai khaira takun theung i, nichi ai kaimy patei y nai ati sai py by y leang bo,” napi.
16 Huna nai khala Isaia ly samrang teng y, “Nang i samrang yhm theung y awm nai ati cheaungkhangchi py,
17 nang i amsi pajochi my vaini khrairei pateung pi nai yhmtheaung katuichi py, Babulon pri mang y syn pawn nai neng kani tym ai; ati sai py angdaw pi ai ny y. Ref 20.17: 2 Areng 24:13; 2 Neng 36:10
18 Nang i katu chanau kypkyp phyreichi ai py, patiu iy Babulon samrang i yhm y kalop sa hai ai nai tli pawn ai, nanai ati cheaungkhang sa thai nai Areng my leu ang pei bo,” napi. Ref 20.18: 2 Areng 24:14-15; Dan 1:1-7
19 Samrang Hezekia ly mymy deung y tlamsa naira hawi chymme naira awm ai, nanai pany lawh i, “Nang i thui pi nai Areng i leu ly hawi nai ne,” napi.
Samrang Hezekia i deung tlum nai
(2 Neng 32:32-33)
20 Samrang Hezekia i ham parai nai, tuikan sa nai, mary theung y tui lam sa nai hawi ni i atiti sa naichi ai, Juda razavang cha-iu theung y tajiu pi typ nai ne.
21 Hezekia dei nai khala ni i chapo Manase ly ampo i meingtym amtym i, samrang lawm bo.