19
Samrang ly Isaia teng y tau hnei nai
(Is 37:1-7)
1 Samrang Hezekia ly nichi my leu amti pi nai thai phai thai baly, mymy i ateaung sei iy paisiu kanih amchiu naimy, Areng i Achura yhm y chei bo.
2 Samrang ly samrang i yhm kry nai keung Eliakim, secretary Sebana hawi saneng len nai pathyp pi nai keungchi ai Amoz i chapo amo Isaia teng y pato bo. Nichi py paisiu kanih amchiu u nai ne.
3 Amo Isaia teng y amti pi ai nai nichi teng y thui pi nai leu ly “Vaini ly patang nai kani ne; achi ly kamngo pajeng naira avum i, kangji nga u bo. Achi ly deaungdi tapen ai nai neng tym iy py, tapen ai nai atho by y nai neampachy hawi atawm.
4 Asuria empara samrang ly tavailu areng keh ai pato iy, Tameuh kangheng ai thui tamawn nai leu thui hai bo. Nang i Areng Tameuh ly huni leu thai iy, huna nai thui nai khumichi ai kamngo pajeng na sy. Hunai deaungkho y dei kamthum khumichi i vui Tameuh teng y chiu so pi ba,” napi.
5 Samrang Hezekia i leu thai nai khala Isaia my,
6 “Areng my hina nai leu pei bo; Asuria samrang i miseaungchi my, kai ai thui tamawn nai leu nangchi thai u nai ly jei u moh.
7 Areng my Asuria empara samrang ai mymy i pri y vawi hai nai satang saisairei thai hai ai. Naibaly Areng my nichi ai huni pri y padei ai,” nanai thui pi bo.
Asuria chengchi my pajei bi nai
(Is 37:8-20)
8 Asuria empara samrang ly Lakhisa mary i nai theu iy, tengpang sahawi i Libana mary y tiu, nanai Asuria miteaung keh ly thai nai khala, samrang hawi avum ai nai huni meingtym y chei bo.
9 Huna nai khala Asuria chengchi ly Ethiopia samrang Tirhakah my lu sa nai Aikupta tavaimichi ang jeu bo, nanai satang nga u. Huni satang thai nai khala empara samrang ly Juda samrang Hezekia teng y cha pa bo.
10 Huni chara y, “Nang i ym nai tameuh my, nang ly kai i kiu y sum ai ny y, nanai thui nai ly tangai moh.
11 Asuria empara samrang ly mymy taphra ai dawn yb nai pri ai, mana sa reng mo, nanai nang ly thai bo. Nang ly kai i kiu i nai tleaung ai, nanai dawn a?
12 Kai i amsi pajochi ly Kozan mary, Haran mary hawi Rezeph marychi ai taphra iy, Telasar mary y awm nai Betheden chengchi ai tamyh pawn. Huni khumichi i tameuhchi theung y, mani tameuh py nichi ai atleu pajau y.
13 Hamath mary, Arpad mary, Sephavaim mary, Hena mary hawi Ivah marychi ra y peang nai samrangchi ly ma mang y mo?,” nanai abawi nai ne.
14 Samrang Hezekia ly savaichi teng i cha la iy phain chum baly, Achura yhm y chei i, Areng i mo y khai bo.
15 Naibaly hina nai chiu sa, “Tahm asang parai nai Areng atehra salo y ateh nai Israela chengchi i Areng Tameuh awi, nang leaungrei naini khaileaung pri verei y peang nai Tameuh ne. Nang ly kani hawi khaileaung sa nai keung ne. Ref 19.15: Theu 25:22
16 Aw Areng, vai kaichi teng y tym nai atitichi khen cham. Tameuh kangheng napi nai nang ai, Sannakheri my thui tamawn nai leu tangai ba.
17 Aw Areng, Asuria empara samrang ly khumi cheng cheaungkhangchi ai phra hai iy, nichi i prichi ly khumi angso savai tlang naira lawm hai nai,
18 nichi i tameuhchi py mai hawi leng pawn nai kaichi pany. Huni tameuhchi ly tameuh tatang ny y. Khumi i kiu hawi sa nai dengkeaung myn, lengseaung mynchi ne.
19 Kaichi i Areng Tameuh awi, vai ly nang leaungrei naini Areng Tameuh ne, nanai khaileaung pri verei i khumi cheng cheaungkhangchi my pany u ai nai, vaimy kaichi ai Asuria chengchi kiu i nai atleu pi kyh ba,” nanai chiu sa bo.
Samrang i vui Isaia dengdairei tym nai leu
(Is 37:21-38)
20 Naibaly samrang i chiu sa nai pathang pi nai deaungkho y, samrang Hezekia i vui Isaia dengdairei
21 Areng my leu pei nai ly “Nang Sennakheri awi, Jerusalem mary ly nang ai khen iy panui hai bo.
22 Nang ly ami ai thui tamawn nai mo, nanai nang pany a? Nang ly Israela chengchi i chai parai nai kai Tameuh ai tahm khai y lawh ly.
23 Nang ly nangmy i tavai ka-ri bawibawichi hawi Lebanon mawi tleaung y asang keh nai mawichi ai tiu nai pajau, nanai kai teng y amlyh ai nai savaichi pato bo. Nang ly huni meingtym i asang keh nai saitleang keungchi hawi, apu keh nai maicha keungchi ai paliu naimy, atu thengreung pui theung y tym, nanai amlyh bo.
24 Nang ly tuikanchi tai iy pri takhra i tui kanei, nanai py, nang i tavaimi risachi ly kheu hawi chiu iy Naing tavo tui kang hai nai ne, nanai py amlyh bo.
25 “Jangni i dengdairei huni bawibawichi ai kaimy pasym yb nai ne, nanai nang, thai vai y nai sai a? Vai py huni atitichi ai kaimy lawm hai bo. Amtangra marychi ai anyn angso pakheng achu naira lawm hai pajau nai sa thai naira, nang teng y kang pei bo.
26 Huni marychi ra y awm nai khumichi ly sa thai naira by y; kaso theu naimy, nisi ali kabi aho iy jeirawm vui nai acha, amphu salo y prau nai achachi hawi atawm nai ne.
27 “Na i py nang i satang angym pa-rei kai pany; nang ly ati sa iy ma mang y chei mo, nanai py, kai ai manatanrei kado theu hai mo, nanai py kai pany.
28 Nang i kado theu nai hawi paleung len naichi py, kai ly thai bo. Hunai deaungkho y kai ly nang ai nodo pheu, labeaung pakau iy jeu nai lam mang vawi hai ali teang ai,” napi.
29 Naibaly Isaia ly samrang Hezekia teng y, “Mo mang y tym ai nai atitichi i ka-ma-ra ly hina nai ne. Nang ly vai neng py, amlo py, mychi ngaingai prau nai chohchi cha ai. Na i py pa-thom saneng y ly nangmychi my pati nai choh tyn u ai. Kreip keungchi py ui iy kreip athaichi cha u ai.
30 Juda pri y awm nai dei kamthum khumichi ly khaileaung y tangjyn aneng pa-rei pala iy athai pasu nai keungchi kamta, atho awm u ai mang.
31 Jerusalem mary hawi Zion mawi salo y, khumichi ly dei y naimy awm u ai. Ati mana nai mo nabaly, hunai kamta tym ai nai Areng my leu pei yb veng nai deaungkho y ne.
32 Asuria empara samrang i molam y Areng my thui nai ly ‘Ni ly hini mary theung y kun ai nai nga ai ny y; mary theung y thailiho chynrei malawn py ko ai nai ngo y ai. Mary ai katanmeuh iy tiu ai nai abyhra angawmchi py sa ai nai nga ai ny y.
33 Ni ly mary theung y kun ai nai ngo y naimy, jeu nai lam mang vawi ali teang ai. Hini ly kai Areng my pei nai leu ne.
34 Kai ly kaimy i nang parai nai ai py, kai i miseaung Davida teng y leu adeu pi nai ai py, adawn iy hini mary ai ama hai ai,’ nanai leu pei bo,” napi.
35 Huni vum y Areng i kani pri amtaw thau leaungrei ly Asuria khumichi i tai naira mang y chei iy, tavaimi risa leaung 185,000reichi ai pajeng i, kani pa-nyh khawn mang ly huni khumi bawibawichi dei u nai ne.
36 Huna nai khala Asuria empara samrang Sennakheri ly tavai anaw teang iy, Ninevi mary mang y ali u bo.
37 Kanirei nai khala y ni ly my i tameuh Nisaro i achura yhm y chiu sa nai ne i, my i chapo leaung nyhrei, Adrammele hawi Sareza nini ly samrang ai haisau hawi tleh chum baly, Ararat pri mang y preang vui bo. Ni i chapo vai leaungrei Esarahadon ly ampo i meingtym amtym i, empara samrang lawm nai ne.