18
Elija hawi Bala i amochi
1 Huni bo kani kra kyh nai khala y, kani khang nai py saneng thomrei awm i, Areng my Elija teng y, “Nang ly chei iy samrang Ahab i mo y kun; kai ly kani nai hai ai,” napi.
2 Hunaibaly Elija ly chei bo.
Huni neng khala Samari pri y kani khang nai ly khri pa-rei ty nanai ne.
3 Hunai deaungkho y Ahab ly samrang yhm kry nai keung Obadia ai palau. (Obadia ly Areng my khri pa-rei tahm khai nai deaungkho y,
4 Areng i amochi ai padei nai thym khala y, Obadia ly amo leaung chungvaireichi ai kamkawm nyhrei sa i, kamkawm harei y leaung vui pangrei, tapiuchira y heu iy teicha teinei hawi tui py pei pi nai ne.)
5 Ahab ly Obadia teng y, “Keaungngo hawi keaungngo kaneaung kasauchi dei y ai nai acha bai avum teu na mo, nanai pri verei y awm nai tui sampum hawi, tavo micheaung tleirei y achi chei iy khen hawi sina,” napi.
6 Nini ly chei ai nai meingtymchira y paleung ka-dyh naimy, lam ha harei mang y chei hawi akyhkyh bo.
7 Huna nai chei hawi i Obadia ly Elija hawi avum tlui nai ne. Ni ly Elija ai ma nai deaungkho y lu meung nai chiu iy, “Nang ly kai i areng Elija ne a?” nanai deng.
8 Elija my, “Ne, kai ly Elija ne na a; nang ly nangmy i samrang teng y chei iy, kai ly hi y awm, nanai thui pi,” napi.
9 Obadia my, “Kai ly ati hawi y nai kasa lawh nai y, nang ly kai ai samrang Ahab i kiu y dei hai ai nai pato nai a?
10 Samrang ly nang ai khaileaung pri verei y hau hai nai ne, nanai Tameuh kangheng, nang i Areng amyn y kai, vaineng abeu bo. Mani pri y py Elija ly by y leang bo, nanai thui nai ly teng khyp nanai Ahab my vaineng abeu hai nai ne.
11 Vai, nang ly kai ai samrang Ahab teng y chei iy, hini meingtym y nang awm, nanai pato lawh bo.
12 Naibaly kai ly hu y chei phai chei baly Areng i phailo my nang ai, kai pany y nai meingtym y hawi veng lawh baly, kai mana kasa ai mo? Hini meingtym y nang awm, nanai samrang teng y amti pi chum nai khala, samrang ly nang ai avum y lawh baly kai ai ang tleh ai. Kai ly deaungdichy khala i dengdairei Areng ai khri pa-rei tahm khai nai ne, nanai pany pi bo.
13 Areng i amochi ai Jezebeli my padei nai thym khala y, kai ly amo leaung chungvaireichi ai kamkawm nyhrei sa iy, kamkawm ha harei y leaung vui pangrei, tapiu theung y kaimy heu vui iy teichachi hawi tui pei pi nai ly nang thai y nai sai a?
14 Hunaibaly nang ly ati mana nai y, kai ai samrang teng y pato iy hini meingtym y nang awm, nanai thui hai pajau ai mo? Ni ly kai ai padei ai!” napi.
15 Elija my, “Vaini kai ly samrang i mo y amteng pi ai, nanai kai i chiu nai ati cheaungkhang sa thai nai Areng i amyn y kai adeu mang,” napi.
16 Hunai deaungkho y Obadia ly samrang Ahab teng y chei iy amti pi i, Ahab ly Elija hawi avum ai nai chei bo.
17 Ahab ly Elija ai avum nai khala ni teng y, “Israela pri y patang hai nai keung ai kai avum bo!” nanai thui.
18 Elija my, “Patang hai nai keung ly kai ny y, patang hai nai keungchi ly nang hawi nangmy i ampo naini ne. Nang ly Areng i leu pei naichi tangai y naimy, bala i mynchi ai chiu bo.
19 Vai ly Israela mipui bawibawichi ai Karamela mawi saleung y kai hawi avum ai nai leu pei ba. Samrangnu Jezabela my sabawm nai amo leaung 450 reichi hawi, Aser tameuhnu i amo leaung 400 reichi ai py palau iy hawi kalau ba,” napi.
20 Hunaibaly Ahab ly Israela cheng bawibawichi hawi, bala amochi ai Karamela mawi saleung y angym hai bo.
21 Elija ly mipuichi teng y chei iy, “Nangchi ly mana tanrei paleung adi adiu naimy awm u ai mo? Areng ly Tameuh ne, nabaly ni ai chiu u. Bala ly Tameuh ne, nabaly ni ai chiu u!” napi. Na i py khumichi ly ati sa py pathang u y.
22 Naibaly Elija my, “Areng i amochi theung y kai leaungrei awm khyh bo. Na i py bala i amo ly leaung 450 rei awm.
23 Si katai amai nyhrei jeu hai ly harei ai nichi teng y pei pi u; nichi ly huni si katai tleh iy abai piupa chum baly, thengchi salo y khai u sy; na i py mai patawi u moh sy. Kai py takhra si katai harei ai hunai kamta sa teang ai.
24 Hunaibaly bala i amochi ly mychi i tameuh teng y chiu so u sy; kai py Areng teng y chiu kasa ai. Kaichi bawibawi i chiu sa hnei takeng nai pathang pi iy mai pala pi nai keung ly Tameuh tatang ne ai,” napi.
Mipuichi ly Elija i thui nai leu ai ngai u i, aeu u sau na bo.
25 Naibaly Elija my bala i amochi teng y, “Nangchi ly khumi nawi nai deaungkho y si katai la iy, amteaung u man ba; naibaly nangmychi i tameuh teng y chiu so u; theng ai ly mai patawi u moh,” napi.
26 Nichi py mychi teng y tym hai nai si katai ai apathyp ai nai sa u chum baly, bala tameuh teng y kani thun teng na pa-rei chiu sa u bo. Nichi my, “Aw bala tameuh! kaichi i chiu sa nai tangai pi kyh ba,” nanai aeu u chum baly, mychi i sa nai maicham ai taki teungtareung iy lam u. Na i py bala tameuh teng i ati sai py pathang y.
27 Kani thun bo nabaly Elija ly nichi teng y, “Nangchi ly hini tleaung y aeu iy chiu so u! bala ly tameuh ne! Ni ly atiti dawn vui lawh mo, sakhawn maikawm thau vui lawh mo, khuleaung chei vui lawh mo, ti y baly i vui lawh i, nangchi my palaw u!” nanai panui hai bo.
28 Hunaibaly bala i amochi ly vaichi i tleaung y aeu iy chiu sa u i, mychi i reita kamta acho akeichi hawi, thi leaung na pa-rei tlang y a-ohja bo.
29 Nichi ly kani dym nanai pa-rei tao pajeng parai naimy, aeu u teu i py pathang pi y, ati katyn py thai u y nai ne.
30 Naibaly Elija my khumichi teng y, “Kai i sahawi y jeu u,” napi i, khumichi ly ni i sahawi y akachu u nai khala, Elija ly taphra veng nai Areng i maicham ai palum teng bo.
31 Ni ly Areng my Israela amyn pathi nai Jakob i kangpreang cheng holai nyhreichi jeng y, lengseaung holai nyhrei la. Ref 18.31: Atiti 32.28, 35.10
32 Huni lengseaungchi hawi Areng ai chiu ai nai maicham sa palai nai ne. Ni ly huni maicham kamki tui palang apom phai palyhrei chei nai angawm leaunghawi tai.
33 Naibaly maicham tleaung y thengchi pajyn hyh naimy khai chum baly, si katai abai piupa iy theng salo y khai bo. Elija my, “Chy-y palyhrei tui deu iy kapathyp mawi hawi theng salo y leih u,” napi. Khumichi ly leih u nai khala,
34 Elija my, “Leih u bi rai,” napi. Khumichi ly leih u bi nai khala y Elija my, “Leih panawi bi rai,” napi bi. Khumichi my py leih panawi bi bo.
35 Tui ly maicham kamki leaung iy leaunghawira y tui kawi na bo.
36 Kani ka-reu apathyp nai neng tym nai khala y, amo Elija ly maicham sahawi y chei i, “Aw Abraham, Isaka, Jakob i Areng Tameuh, nang ly Israela chengchi i Tameuh ne, nanai hawi, kai ly nang i miseaung ne i, hini sa nai bawibawichi ly nang i leu pei nai saho y sa nai ne, nanai py vaini pany u sy.
37 Aw Areng, nang ly deungtasa Tameuh ne, nanai hawi, hini khumichi ai nangmy teng y palau teang bo, nanai py hini khumichi pany ai nai, kai ai pathang pi kyh ba. Aw Areng, pathang pi kyh ba,” nanai chiu sa bo.
38 Naibaly Areng my mai pala pi nai deaungkho y apathyprachi hawi raurei, theng hawi lengseaungchi py, kang pawn nai chang y i, khaileaung malawn py kang iy, leaunghawira i tuichi py kang pawn nai ne.
39 Hina naichi niu nai khala y khumichi ly khaileaung y atlym u i, “Areng ly Tameuh ne; Areng leaungrei naini Tameuh tatang ne!” nanai aeu u bo.
40 Elija my, “Bala i amochi ai patiu u; leaungrei py tleaung moh sy!” nanai leu pei bo. Khumichi ly amo bawibawichi ai patiu iy, Elija ly nichi ai Kishon micheaung mang y pahawi i, tleh chau chau nai ne.
Kani nai hai teang nai
41 Naibaly Elija ly samrang Ahab teng y, “Vai ly nang chei iy teicha teinei cho ba; kani pajyh nai katyn thai bo,” napi.
42 Ahab ly cha nei ai nai chei nai thym khala y, Elija ly mawi saleung y lyn kalau i, my i kheukhu nyhrei sala khaileaung y lu meung bo. Ref 18.42-45: Jakob 5:18
43 Ni ly miseaung teng y, “Chei ly pangli mang y khen angdeang cham,” napi.
Miseaung ly chei i khen nai vawi teang i, “Kai ly ati sai py niu y be,” napi. Elija ly huna nai kamta tlen saryhrei chei hai iy angdeang hai bo.
44 Miseaung ly tlen saryhrei chei i, khen nai vawi teang nai khala, “Pangli mang dengdairei ang teang kalau nai, kiu padawi phei tirei py by y nai khupanymchy kaniu,” napi.
Elija my miseaung teng y, “Nang ly samrang Ahab teng y chei ly kani nai y rai khala y ka-ri tleaung atang iy samrang i yhm mang y vawi ai nai thui pi,” nanai leu pei bo.
45 Neng kra y nai sala y my kani khusang ly khupanym my khiu iy ali aho i, kani khri pa-rei taawi nai ne. Ahab ly keaungngo ka-ri tleang y atang i, Jezarela mary mang y theu jo bo.
46 Areng i sa thai naira ly Elija i tlang tleaung y tym nai deaungkho y, my i ateaung ai akeng y akawm cheng iy, Jezarela mary y tym pa-rei Ahab i mo mang angpreng nai ne.