17
Elija hawi kani khang nai
1 Kilead pri Tishbe mary y awm nai amo Elija ly samrang Ahad teng y, “Kani nai ai, nanai kaimy kang thui pi ali y ryrei ly mo mang saneng nyh, saneng thomrei sala y kani khang ai. Kadam py tla ai ny y, nanai kai i chiu nai Tameuh kangheng Areng i amyn y kang thui pi,” napi.Ref 17.1: Jakob 5:17
2 Hunaibaly Areng ly Elija teng y,
3 “Hini mary i nai theu iy nisi mang y chei ly Jordan tavo nisi ngan mang y awm nai Kherit micheaung sahawi y aheu ba.
4 Nang ly huni micheaung tui nei ai nai nga ai mang. Nang i awm naira y teicha teineichi tha pi ai nai O-achi ai kaimy leu pei yb bo,” napi.
5 Elija ly Areng i leu tangai i, Kherit micheaung mang y chei iy awm bo.
6 Ni ly micheaung tui nei; O-achi my ni i cha ai nai tako hawi mawichi kani tleirei, khawn mang y tlen rei, dym mang y tlenrei tha pi bo.
7 Neng kra kyh nai bo baly kani khang i, micheaung tui ly kang veng bo.
Elija hawi Zarephath mary i neampachy lumai
8 Naibaly Areng my Elija teng y,
9 “Vai, nang ly Sidon mary sahawi awm nai Zarephath mary y chei ly hu y awm. Nang ai pacho panei ai nai huni mary i neampachy lumai teng y kaimy leu pei yb bo,” napi.Ref 17.9: Lk 4:25-26
10 Hunaibaly Elija ly Zarephath mary y chei bo. Ni ly mary katheu pa-khora tym nai khala, theng ei nai neampachy lumai ai avum i, “Pahen parai naimy tui nei ai nai pei kyh,” napi.
11 Neampachy lumai ly tui la ai nai chei nai khala y Elija my, “Kai i vui tako maidenreichy py syn pi ryp kyh ba,” nanai aeu naimy napi bi.
12 Neampachy lumai my, “Kai teng y tako phirei py by y, nanai heng nai keung, nang i Areng Tameuh i amyn y kai vaineng abeu bo. Tako beung theung y tako dei angsorei hawi, asitui beung theung y olive asitui maidenreichy awm khyh. Huni maidenreichy naimy kai hawi kaimy i chapo vui tako paawp iy cha ai nai, hi y theng maidenreichy kaei nai ne. Huni bo baly kajeu ka-lam y kadei hawi ai nai khyh bo,” napi.
13 Elija my ly “Paleung mawn moh; chei ly nangni cha ai nai teicha teinei phai so. Na i py kai i vui tako phirei so pi man ly jeu hai; huni bo y tako dei kamlai hawi nangni chapo amhm i vui so ba.
14 Ati mana nai mo nabaly Israela chengchi i Areng Tameuh my, ‘Kai Tameuh my kani nai hai y ryrei ly tako beung theung y tako avaw ai ny y, asitui beng theung y py asitui avaw ai ny y,’ nanai leu pei yb nai deaungkho y ne,” nanai neampachy lumai teng y thui pi bo.
15 Neampachy lumai ly Elija my thui pi nai kamta sa i, nichi bawibawi ly kani neangneang cha ai nai teicha teinei ka-leu pa-rei nga u bo.
16 Elija molam y Areng my leu adeu nai kamta tako beung theung y tako dei avaw y, asitui beung theung y py asitui avaw y nai ne.
17 Neng kra kyh nai khala neampachy lumai i chapo ly keaungno; ni i no nai ly tyryh tyryh i, kangkhym y ly deaungdi dei bo.
18 Neampachy lumai ly Elija teng y, “Aw Tameuh i khumi awi, nang ly ati mana nai kai ai hini patang naira tym hai lawh mo? Nang ly kai i chapo ai dei ai nai pa-rei Tameuh teng y, kai i kamngochi pany hai ai nai hini meingtym y jeu nai a?” napi.
19 Elija my, “Nang i chapo ai kai teng y pei,” napi i, neampachy lumai kiu tleaung i nai deaungdi ai la iy, my i anga nai salo i sambeu y syn kalau i, ira tleaung y paseaung bo.
20 Naibaly ni ly “Aw kai i Areng Tameuh, hini neampachy lumai teng y ati mana nai, nang ly ka-jeira tym hai lawh mo? Hini neampachy ly kai i tlang tleaung y hawihai palai ang pacho ang panei nai ne. Na i py vai, nang ly ni i chapo ai dei hai lawh bo,” nanai tao pajeng parai naimy chiu sa hnei takeng bo.
21 Naibaly Elija ly deaungdi i tlang tleaung y tlen thomrei tabiu iy, “Aw kai i Areng Tameuh, hini deaungdi ai paheng pi teang kyh ba!” nanai chiu sa.Ref 17.21: 2 Areng 4:34-35
22 Areng ly Elija i hnei takeng nai ai pathang pi nai deaungkho y, deaungdi ly amcheng teang i heng teang bo.
23 Elija ly deaungdi ai tapawm iy anui mang y satla kathiu i, deaungdi amhm teng y, “Khen cham, nang i chapo ly heng teang bo he!” napi.
24 Naibaly neampachy my, “Vai, nang ly Tameuh i khumi ne, nanai hawi, Areng ly nang molam y leu ang pei nai bo, nanai py kai, kapany bo,” napi.