19
Sinai mawi salo y Elija tym nai
1 Samrang Ahab ly Aju Jezabela teng y Elija i sa nai cheaungkhangchi hawi, bala amo bawibawichi ai padei nai saichi py amti pi.
2 Jezabela ly Elija teng y, “Kai ly khawndam hini neng tym nai khala y amochi ai nang i sa nai kamta nang i tlang tleaung y kaso y lawh baly, tameuhchi my kai ai dei ai nai pa-rei pajeng sy,” nanai khumi pato iy thui hai bo.
3 Elija ly jei nai deaungkho y lawira nga ai nai preang vui bo. Ni ly my i miseaung ai hawi iy, Juda pri Baraseba mary mang y tako jo nai ne.
Miseaung ai ly huni mary y daw jo iy,
4 mymy ly kani khengrei daichi ka-vym theung y tako nai ne. Ni ly dengkeaung ka-khui hareira y tym nai khala ateh i, dei nai ly hawi keh alam ai, nanai thui iy, “Aw Areng, hina nai ly hawi y parai bo; Kai i phailo ai lo veng ba; kai ly dei nai hawi keh alam ai!” nanai chiu sa.Ref 19.4: Jon 4:3
5 Ni ly dengkeaung keung anui y aseaung iy i bo. Kani pri amtaw thau leaungrei ly ni ai kiu hawi tabi i, “Angthau ly cho ba,” napi.
6 Elija ly khen aki prei iy luleung mang y tako phirei hawi tui adym py niu i, cha nei chum baly i teang bi.
7 Kani pri amtaw thau nai ly pa-nyh jeu bi iy, “Nang i chei ai nai khuleaung ly palo nai deaungkho y, ang thau ly cho ba,” napi.
8 Naibaly Elija ly ang thau iy cha chum baly Sinai mawi kachai mang y kani 40 rei tako ai nai atho awm bo.
9 Ni ly huni mawi y tym nai khala, tapiu theung y kun iy i nai ne.
Hunaibaly Areng my ni teng y, “Elija awi, nang ly hini meingtym y ati sa nai mo?” nanai deng.
10 Elija my, “Aw ati cheaungkhang sa thai nai Areng Tameuh, kai ly nang leaungrei ai naini avawrei kang chiu nai ne. Na i py Israela mipuichi ly nang hawi asa nai Leu Maikawm ai taphra iy, nang i maicham ai panawi nai hawi nang i amo bawibawichi ai py padei u bo. Kai leaungrei naini tleaung i, nichi my kai ai padei ai nai hau u bo!” napi.Ref 19.10: Rom 11:3
11 Naibaly Areng my ni teng y, “Tapiu theung i nai theu iy, mawi saleung kai i mo y angdo ba,” napi. Hunaibaly Areng ly ni i sahawi mang tako prei i, ali kamchai aho hai bo. Hunai deaungkho y mawichi ly ako i, lengseaungchi py kawi phro pawn nai ne. Na i py Areng ly huni ali kamchai theung y awm nai ny y; ali aho nai anawn nai khala y kaleih theu; na i py huni kaleihra y awm nai ny y.
12 Kalei theu chum baly mai angveaung bo. Na i py huni mai kangveaung theung y Areng ly awm nai ny y; mai kangveaung chum baly raawi kamsyhchy theu nai ne.
13 Huni raawi thai nai khala y Elija ly my i meimai y ateaung amyn naimy theu i, tapiu pa-khora angdo bo. Huna nai khala, “Elija awi, nang ly hini meingtym y ati sa nai mo?” nanai deng nai raawi thai bo.
14 Elija my, “Aw ati cheaungkhang sa thai nai Areng Tameuh, kai ly nang leaungrei ai naini avawrei kang chiu nai ne. Na i py Israela mipuichi ly nang hawi asa nai Leu Maikawm ai taphra iy, nang i maicham ai panawi nai hawi nang i amo bawibawichi ai py padei u. Kai leaungrei naini tleaung i, nichi my kai ai padei ai nai hau u bo,” napi.
15 Areng my, “Nang ly Damaska mary sahawi daichi ka-vym mang y ali teang ly huni mary theung y kun iy Hazael ai Suria samrang y palyn nai asitui leih pi. Ref 19.15: 2 Areng 8:7-13
16 Nimshi i chapo Jehu ai py Israela samrang y palyn nai asitui leih pi. Abel Meholah mary i awm nai Shaphat i chapo Elisa ai nang i meingtym amtym ai nai asitui leih pi. Ref 19.16: 2 Areng 9:1-6
17 Hazael my padei ai naira i tleaung nai khumi ai ly Jehu my padei ai; Jehu kiu i tleaung nai khumi ai ly Elisa my padei ai.
18 Na i py kai ai ka-ym awm iy bala ai lu meung y nai, ni i myn y pachawm y nai khumi leaung 7000 reichi ai Israela pri y daw pi ai,” napi.Ref 19.18: Rom 11:4
Elisa ai vawi takhra nai
19 Elija ly hu i nai theu nai khala y, si katai nyhrei hawi li thawn nai Elisa ai avum; ni i mo y si katai bom holai nyhrei awm i, ni ly kangkhym mang si bomrei hawi li thawn nai ne. Elija ly my i ateaung aleng iy, Elisa i tlang tleaung y chang bo.
20 Huna nai khala Elisa ly my i si kataichi ai khai su iy, Elija nithun angpreng naimy, “Kaimy i nei ngaai teng y vawi iy chibai so rai si; hunaibaly nang hawi vanrei abang ai,” napi.
Elija my, “Hawi mang, chei ba; kai ly nang ai kam y leang,” napi
21 Hunaibaly Elisa ly my i si nyhrei tleh iy li thawnra kateang ai theng palawn i theaung bo. Naibaly mawi an ly khumichi ai pacho; huni chum baly Elija nithun abang jo nai ne.