16
1 Hanani i chapo amo Jehu teng y Baasa i vui Areng teng i leu tym hai nai ly:
2 “Nang ly ati sai py ny y nai khumi ne i py, kai ly nang ai kai i khumi Israela chengchi i lu y khai nai ne. Na i py nang ly Jeroboam kamta kamngo sa iy, kai i khumichi ai py kamngo lam mang y pahawi bo. Nichi i kamngochi ly kai ai kado patheu nai ne i,
3 kai ly Jeroboam ai sa nai kamta, nang hawi nang i yhm dengtheungchi ai tamyh vui ai.
4 Mary theung y dei nai nang i dengtheungchi ly ui teicha, mary angam mang y dei naichi ly langna teicha lawm u ai,” napi.
5 Baasa i sa nai cheaungkhangchi hawi ni i vam nai saichi ai Israela razavang cha-iu theung y tajiu pi typ nai ne.
6 Baasa dei nai khala ni ai Tirzah mary y up; naibaly chapo Elah ly ampo i meingtym samrang y lyn nai ne.
7 Baasa ly Areng i tlang tleaung y kamngo sa nai deaungkho y, amo Jehu my, Baasa hawi yhm dengtheungchi i vui y leu pei. Baasa ly mymy ny y rai khala i peang nai samrang Jeroboam kamta, kamngo sa nai khyh chang y i, Jeroboam hawi yhm dengtheung bawibawichi ai padei nai deaungkho y, Areng ly ni i tlang tleaung y kado theu nai ne.
Israela samrang Elah
8 Juda samrang Asa i peang nai saneng 26 rei khala, Baasa i chapo Elah ly Israela pri y samrang lyn i, Tirzah mary y saneng nyhrei peang nai ne.
9 Samrang i tavai ka-ri lu sa nai keung Zimari ly samrang ai kangviu y padei ai nai dawn. Kanirei nai khala y samrang ly Tirzah mary samrang i yhm typ pi nai keung Azah i yhm y nei cha pavui nai thym khala,
10 Zimari ly huni yhm theung y kun iy Elah ai tleh vui i, samrang y atheng bo. Huni ly Juda samrang Asa i peang nai saneng 27 rei khala y Elah ai tleh nai ne.
11 Zimari ly samrangra y lyn phai lyn baly, Baasa i dengtheung bawibawichi ai tleh chauchau nai ne. Baasa i amjo amnau, misochi theung i neampacho ngierei ai py tleh bo.
12 Hunai deaungkho y amo Jehu dengdairei Baasa teng y Areng my leu pei nai kamta, Zimari ly Baasa hawi yhm dengtheung bawibawichi ai padei pawn nai ne.
13 Ati mana nai mo nabaly Baasa hawi my i chapo Elah ly mynchi chiu nai hawi Israela mipuichi ai kamngo lam mang y pahawi nai py, Israela chengchi i Areng Tameuh ai kado patheu nai deaungkho y ne.
14 Samrang Elah i sa nai cheaungkhangchi ly Israela razavang cha-iu theung y tajiu typ bo.
Israela samrang Zimari
15 Juda samrang Asa i peang nai saneng 27 rei saneng y, Zimari ly Israela samrang lawm nai, Tirzah mary y kani saryhrei peang khyh nai ne. Hunaibaly Israela tavaimichi ly Philistin pri Kibethon ai katan u meuh bo.
16 Nichi ly samrang ai Zimari my kangviu y tleh vui bo, nanai satang thai nai khala y, vaimy huni meingtym y mychi i tavailu areng Omari ai Israela samrangra y palyn u.
17 Omari hawi my i tavaimichi ly Kibethon mary i dengdairei theu i, Tirzah mary mang y chei iy katan u meuh bo.
18 Zimari ly mary sum ai bo, nanai pany nai khala y, samrang yhm theung i lengseaung yhm takun theung y kun iy, samrang i yhm raurei mai leang vui i, huni mai kangveaung theung y dei rau bo.
19 Hina nai kamta tym nai ly Areng i tlang tleaung y kamngo sa nai deaungkho y ne. Ni ly samrang Jeroboam kamta, mymy py kamngo sa i Israela mipuichi ai kamngo lam mang y pahawi iy, Areng i ngai y nai kalopchi sa nai molam y ne.
20 Kangviu y sa nai hawi vanrei, Zimari i sa nai cheaungkhangchi ai Israela razavang cha-iu theung y tajiu pi typ bo.
Israela samrang Omari
21 Israela mipuichi ly paleung aleng u akyhkyh nai ne. Phyreichi ly Kinath i chapo Tibni ai samrang palyn ai nai ngai; phyreichi ly Omari ai palyn ai nai ngai.
22 Kangkhym y ly Omari ai ngai naichi my eaung bo. Tibni ly dei i, Omari samrang lawm bo.
23 Hunaibaly ni ly Juda samrang Asa peang nai saneng 31 rei saneng y Israela samrang y lyn i, saneng holai nyhrei peang ai nai nga bo. Ni ly Tirzarah mary y angchei saneng tariurei peang chum baly,
24 Samari mawi ai Shemer napi nai khumi teng i tangkacho sang tariurei hawi van. Omari ly huni mawi y lengseaung apai tapang nai mary kakhaw sa i, huni mawi ai peang nai keung Shemer i amyn la iy Samari mary, nanai amyn pathi nai ne.
25 Omari ly mymy ny y rai khala i peang nai samrangchi tleaung y py, Areng i tlang tleaung y hawi y kehkeh nai kamngo sa bo.
26 Ni ly mymy ny y rai khala i samrang Jeroboam kamta, my i sa nai kamngochi hawi, mipuichi ai kamngo sa hai ai nai hawi, myn chiu ai nai py, kamngo mang y lam patei nai deaungkho y, Areng ai kado theu hai nai ne.
27 Omari i sa nai cheaungkhangchi hawi, ni i vam nai saichi ai Israela razavang cha-iu theung y tajiu pi typ bo.
28 Omari dei nai khala, Samari mary y up. Naibaly chapo Ahad ly ampo i meingtym samrang y lyn nai ne.
Israela samrang Ahad
29 Juda samrang Asa i peang nai saneng phai palyh tajarei saneng y, Omari i chapo Ahad ly Israela samrang y lyn bo. Ni ly Samari mary y saneng apom phai nyhrei peang nai ne.
30 Ni ly mymy ny y rai khala i peang nai samrangchi tleaung y malawn py, Areng i tlang tleaung y hawi y keh nai kamngo sa bo.
31 Ni ly samrang Jeroboam kamta kamngo sa nai anyp y i, huni tleaung y typ keh nai ly Siloh samrang Ethabala i chaniu Jezabela ai pom iy, Bala tameuh ai chiu nai ne.
32 Ni ly Samari mary theung y Bala tameuh i vui achura yhm sa pi iy, maicham py sa i, huni achura yhm theung y maicham sa bo.
33 Huni khyh chang y rai, ni ly Aserah tameuhnu ai chiu ai nai leungcheng py pado; ni ny y rai khala i Israela samrang bawibawichi tleaung y malawn py, Israela chengchi i Areng Tameuh ai kado theu hai bo.
34 Samrang Ahad peang nai thym y Bethela mary y awm nai Hiela ly Jeriko mary palum teang nai ne. Areng my Nun i chapo Josua dengdairei leu pei nai kamta, Hiela ly Jeriko mary langdeng pala nai thym khala y, mymy i chapo chalu Abiram hawi mary apai katheu pa-khochi sa nai thym khala chapo sawi Sekub nini dei nai ne.