15
Juda samrang Abijah
(2 Neng 13:1-14:1)
1 Israela samrang Jeroboam my peang nai saneng holai tajarei khala y, Abijah ly Juda pri samrang y lyn i,
2 Jerusalem mary y saneng thomrei peang bo. Ni i amhm ly Abasalom i chaniu Maakah ne.
3 Abijah ly ampo i kamngo sa nai kamta sa teang; ni ly my i Areng Tameuh ai pajo Davida kamta ly ka-ym by y.
4 Na i py my i Areng Tameuh ly Davida i meimai y dawn i, Abijah by y nai bo y Jerusalem mary ai peang ai nai hawi, Jerusalem mary ai chymme naimy kry ai nai chapo leaungrei ai pei bo. Ref 15.4: 1 Areng 11:36
5 Ati mana nai mo nabaly Davida ly Areng i kangai naini sa khyh nai deaungkho y ne. Samrang Davida ly Uriah i molam y ny y baly, ati takhra mana khala py, mymy i leu pei naichi taphra vai y. Ref 15.5: 2 Sam 11:1-27
6 Rehoboam hawi Jeroboam nini tavai atiu nai ly Abijah i deung tem pa-rei atiu bo.
7 Naibaly Abijah i sa nai cheaungkhangchi ly Juda samrangchi i razavang cha-iu theung y tajiu typ nai ne.
8 Abijah dei nai khala y ni ai ly Davida i mary y up bo. Naibaly chapo Asa ly ampo i meingtym amtym i, samrang y lyn nai ne.
Juda samrang Asa
(2 Neng 15:16-16:6)
9 Israela samrang Jeroboam i peang nai saneng apomrei awm nai khala y, Asa ly Juda pri y samrang lyn i,
10 Jerusalem mary y saneng 41 rei peang nai ne. Ni i amsichy ly Abasalom i chaniu Maakah ne.
11 Asa ly my i amsi pajo Davida kamta Areng i kangaichi sa.
12 Ni ly myn chiu nai meingtymra y kamthu kamleaung sa nai neampacho neampachychi ai, pri i dengdairei patheu pawn iy, my i amsi pajo samrangchi i sa nai mynchi ai py, taphra pawn nai ne.
13 Mymy i amsichy Maakah ai py samrangnura i nai pala vui bo. Ati mana nai mo nabaly amti amjang thawn ai nai molam Aserah tameuhnu ai chiu ai nai i vui y, amso ngai nai mynchi sa nai deaungkho y ne. Asa ly huni mynchi taphra piu iy Kidron leaunghawi y mai leang pawn nai ne.
14 Asa ly myn chiu nai meingtymchi ai taphra bawi y teu i py, mymy deungrei Areng ai ka-ym awm nai ne.
15 Ni ly Areng teng y ampo i talam nai vawnsai bawibawichi hawi, my i talam nai muku, tangka, ateaung alangchi ai Achura Yhm theung y khai bo.
16 Juda samrang Asa hawi Israela samrang Baasa nini ly myni i samrang deungrei tavai atiu nai ne.
17 Baasa ly Juda pri theung y kun iy, huni pri theung y kun theu nai lam paka hai ai nai Ramah mary y lengseaung apai tapang bo.
18 Hunai deaungkho y samrang Asa ly Achura Yhm hawi samrang yhm theung y awm rai nai muku, tangka ngierei la iy, my i bangtang phyreichi dengdairei Damaska mary y awm nai, Suria samrang Benhadad teng y syn hai bo. Benhadad ly Hezion i katu, Tabrimmon i chapo ne.
19 Asa ly ni teng y, “Ani ly ani i ampochi kamta amnai aso hawi sina; huni muku, tangkachi ly nang i vui langseaung ne. Israela samrang Baasa ly my i tavaimichi ai kai i khu ka-peang theung i dengdairei anaw pawn ai nai, nang ly ni hawi amnai asa nai taphra veng ba,” nanai leu taviu bo.
20 Samrang Benhadad ly Asa i tau pei nai kamta sa ai nai ngai nai deaungkho y, my i tavai luchi hawi tavaimichi ai pato iy, Israela marychi ai tiu hai bo. Nichi ly Naphtali khu ka-peang verei bo y Ijon mary, Dan mary, Abel Beth Maaka mary hawi Kalili khuchi ai nga vui bo.
21 Samrang Baasa ly hini satang thai nai khala y, Ramah mary lengseaung apai sa nai ly anawn vui iy, Tirzah mary y vawi u teang bo.
22 Naibaly samrang Asa my Juda pri verei y leu pei nai ly mipui bawibawichi ai leaungrei py takhawi y naimy Baasa i Ramah mary apai sa naira teaung nai lengseaung hawi dengkeaungchi ai tawn hai bo. Samrang ly hunichi hawi Mizapa mary, Keba maryra y apai sa nai ne.
23 Samrang Asa i sa nai sai ngiereichi hawi ni i vam nai saichi, marychi ai apai sa nai satangchi ai Juda razavang cha-iu theung y tajiu pi typ bo. Na i py ni ly miteaung cheang nai khala sengleang man i,
24 dei nai khala Davida i mary samrangchi i tapreaung y up bo. Naibaly chapo Jehoshapha ly ampo i meingtym samrang y lyn nai ne.
Israela samrang Nadab
25 Juda samrang Asa i peang nai pa-nyh saneng y Jeroboam i chapo Nadab ly Israela samrang y lyn i, saneng nyhrei peang.
26 Ni ly ampo kamta atawm teang nai ne i, Areng i tlang tleaung y kamngo sa bo. Israela mipuichi ai py kamngo lam mang y pahawi nai ne.
27 Nadab hawi ni i tavaimichi ly Philistin pri Kibethon ai katanmeuh nai thym khala y, Isakhah nupai theung i Ahijah i chapo Baasa ly kangviu y Nadab ai tleh vui nai ne.
28 Hina nai sa nai ly Juda samrang Asa my peang nai pa-thom saneng y ne. Naibaly Baasa ly Israela samrang Nadab i meingtym samrang y lyn bo.
29 Huni bo y Baasa ly Jeroboam i yhm dengtheung bawibawichi ai tleh pawn nai ne. Siloh mary i awm nai amo Ahijah dengdairei Areng i leu pei nai kamta ly Jeroboam i dengtheungchi ai leaungrei py tleaung y pa-rei, tleh chauchau bo.Ref 15.29: 1 Areng 14:10
30 Hina nai kamta tym nai ly Jeroboam ly kamngo neangneang sa iy Israela chengchi ai kamngo lam mang y pahawi naimy, Israela chengchi i Areng Tameuh ai kado theu hai nai deaungkho y ne.
31 Nadab i sa nai cheaungkhangchi ai Israela razavang cha-iu theung y tajiu pi typ bo.
32 Juda samrang Asa hawi Israela samrang Baasa ly myni samrang sa nai deungrei tavai atiu hawi nai ne.
Israela samrang Baasa
33 Juda samrang Asa i peang nai pa-thom saneng y, Ahijah i chapo Baasa ly Israela samrang y lyn i, Tirzah mary y saneng apomphai palyhrei peang.
34 Samrang Jeroboam kamta ly ni py Areng i tlang tleaung y kamngo sa iy, Israela mipuichi ai kamngo lam mang y pahawi nai ne.