14
Jeroboam i chapo dei nai
1 Huni neng khala y samrang Jeroboam i chapo Abijah ly no nai ne.
2 Jeroboam ly mymy i aju teng y, “Nang ly samrangnu, nanai apany y pa-rei mo ataphra iy, kai ai Israela samrang lawm ai, nanai ang thui pi nai keung, Siloh mary y awm nai amo Ahijah teng y chei.
3 Ni i vui tako tlip horei, tako phi phyrei hawi khawihang palangrei syn iy ani i chapo ly ati mana lawm ai mo, nanai deng cham; ni my ang thui pi ai mang,” napi.
4 Naibaly samrangnu ly Siloh mary y awm nai amo Ahijah i yhm y chei bo. Ahijah ly miteaung cheang nai deaungkho y mei niu y.
5 Areng my, “Jeroboam i aju ly chapo no nai molam y deng ai nai nang teng y ang jeu ai. Naibaly ni teng y hina nai kamta thui pi,” napi.
Jeroboam i aju ly Ahijah teng y tym nai khala, takhra khumi amlawn iy jeu nai ne.
6 Na i py Ahijah ly katheu pa-khora y ni i kheutyn thai baly, “Kun ba. Nang ly Jeroboam i aju ne, nanai kai pany; ati mana nai nang ly nangmy ai takhra khumi amlawn lawh mo? Kai teng y nang i vui satang hawi y nai awm.
7 Jeroboam teng y Israela chengchi i Areng Tameuh my leu pei nai ly hini ne he: ‘kai ly nang ai khumi mipuichi theung i vawi takhra iy, kai i khumi Israela chengchi ai peang nai keung y kang khai bo.
8 Kaimy Davida kangpreangchi teng i pri la vui iy, nang teng y kang pei nai ne. Na i py nang ly kai i tlang tleaung y ka-ym awm iy leu pei naichi tangai nai keung, kai i miseaung Davida kamta ny y lawh; kai i mei kangai py so y lawh ly.
9 Nang ly nangmy ny rai khala i peang nai samrangchi tleaung y py, khri pa-rei kamngo len naichi sa bo. Nang ly kai ai hi vui iy tameuh takhra ai chiu naimy mynchi sa nai molam y, kai ai kado patheu lawh ly.
10 Hini molam y kai ly nang i samrang kangpreang phra hai ai; katheang kalen patleh takhra y naimy, nang i katu chanauchi i neampacho ka-so ngierei ai ly katamyh vui ai. Nang i yhm dengtheungchi ai py kaimy pasyn vui ai; nichi ai siei kamta pasyn pan vui ai.Ref 14.10: 1 Areng 15:29
11 Nang i yhm dengtheungchi theung i ami py mary theung y dei baly ui teicha, mary angam mang y dei baly langna teicha lawm ai; hini ly kai, Areng i leu pei nai ne,’ ” napi.
12 Huni bo y Ahijah ly Jeroboam i aju teng y thui pi bi nai ly “Vai ly yhm mang y vawi teang ba. Nang ly mary theung y kun phai kun baly, nang i chapo dei ai.
13 Israela mipui bawibawichi ly ni i vui y paleung si vo tangam nai ka-ma-ra sa iy, ni i veu ai ly up ai. Jeroboam i yhm dengtheungchi theung y, huni deaungdi leaungrei ai naini hawihai palai up ai. Ati mana nai mo nabaly Israela chengchi i Areng Tameuh ly huni deaungdi leaungrei ai naini khrei khyh nai deaungkho y ne.
14 Areng ly Jeroboam i samrang kangpreang myh hai ai nai, samrang leaungrei ai Israela pri peang hai ai.
15 Areng my pajeng nai deaungkho y, Israela pri ly tuiry y samji keung ahyn nai kamta anghyn u ai. Amsi pajochi teng y mymy i pei nai tlamsa nai, hini pri kahawira i nai Israela chengchi ai tangjyn raurei akyn vui iy, Euphrat tavo vai mang y tym pa-rei ahei hai ai. Ati mana nai mo nabaly nichi ly Aserah tameuhnu mynchi sa iy, mymy ai kado patheu lawh nai deaungkho y ne.
16 Jeroboam ly kamngo sa i, Israela chengchi ai py kamngo lam mang y pahawi nai deaungkho y, Areng ly Israela pri khai su ai,” napi.
17 Jeroboam i aju ly Tirzah mary y vawi teang. Ni ly yhm y kun phai kun baly chapo ly dei ryp bo.
18 Areng ly mymy i miseaung amo Ahijah my thui pi nai kamta khyp, Israela mipuichi ly deaungdi i vui paleung si nai ka-ma-ra sa iy, ni i veu ai ly up nai ne.
Jeroboam dei nai
19 Samrang Jeroboam i sa nai cheaungkhangchi, tavai atiu naichi hawi pri peang nai saichi py, Israela samrangchi i razavang cha-iu theung y tajiu typ nai ne.
20 Jeroboam ly saneng apom phai nyhrei samrang sa iy dei i up bo. Naibaly chapo Nadab ly ampo i meingtym samrang y lyn bo.
Juda samrang Rehoboam
(2 Neng 11:5-12:15)
21 Solomon i chapo Rehoboam ly Juda samrang lawm nai khala y, saneng vui palyh pa-ngo harei awm; ni ly Tameuh ai chiu naira meingtym Israelachi i khu ka-peang verei theung i, Areng my vawi takhra nai Jerusalem mary y, saneng holai saryhrei peang. Rehoboam i amhm ly Ammon cheng neampachy Naamah ne.
22 Juda mipuichi ly Areng i tlang tleaung kamngo sa u bo. Nichi ly amsi pajochi tleaung y malawn py, Areng kado theu ai nai kamngo sa tleaung sa ra nai ne.
23 Nichi ly teng y nai tameuhchi ai chiu ai nai meingtymchi sa u; mawi saleungchi hawi ka-khui hawi nai dengkeaung keungchi anui y chiu ai nai leungchengchi, Aserah myn leungchengchi py leng u bo.Ref 14.23: 2 Areng 17:9-10
24 Hawi y keh nai sa nai ly myn y chiu nai meingtymra y neampacho hawi neampachychi ly kamthu kamleaungchi sa u nai ne. Hini pri theung y Israela chengchi kun u nai thym khala y, Areng my patheu pi pawn nai khumichi i sa nai amso ngai nai cheaungkhangchi ai Juda khumichi ly sa u nai ne.Ref 14.24: Tara 23:17
25 Rehoboam my peang nai saneng pangrei awm nai thym khala, Aikupta samrang Shishak ly Jerusalem mary y tiu i,
26 Solomon i sa nai muku khopuichi, Achura yhm hawi samrang yhm i yhmtheaung katui bawibawichi ai py la pi pawn.Ref 14.26: 1 Areng 10:16-17; 2 Neng 9:15-16
27 Samrang Rehoboam ly muku khopuichi i jeng y kheupaja khopuichi sa iy, samrang yhm katheu pa-kho typ nai keungchi teng y au.
28 Achura Yhm mang y samrang chei nai tleirei, tamcheaungchi ly huni khopuichi syn u. Huni bo y khai nai meingtymra khai u teang nai ne.
29 Samrang Rehoboam i sa nai saichi ly Juda samrangchi i razavang cha-iu theung y tajiu pi typ nai ne.
30 Huni neng khala y Rehoboam hawi Jeroboam ly avawrei atiu hawi nai ne.
31 Rehoboam dei nai khala y ni ai ly Davida i mary, samrangchi i tapreaung y up bo. (Ni i amhm ly Ammon pri neampachy Nimah ne.) Ni i chapo Abijah ly ampo i meingtym amtym i, samrang lyn nai ne.