13
1 Juda pri i amo leaungrei ly Areng i leu pei nai kamta Bethela mary y chei i, apathyp ai nai maichamra y Jeroboam angdo nai neng khala tym nai ne.
2 Areng i leu pei nai kamta amo ly “Aw maicham, maicham, Areng my, Josia amyn pathi ai nai deaungdi ly Davida i yhm dengtheungra y tapen ai. Kapathyprachi nang i tlang tleaung y khai iy, tapawp nai maichamra kalop sa nai pathyp pi nai keungchi ai, ni ly nang i salo y padei iy apathyp ai. Khumi i hiuchi py nang tleaung y khai iy leng patlum ai,’ nanai leu pei bo,” napi.Ref 13.2: 2 Areng23:15-16
3 Naibaly amo my thui bi nai ly “Hini maicham ly anawi vui ai i, maicham salo i maiphuchi py ahei phro ai; hunaibaly kai i molam y hini leu ai Areng my pei nai ne, nanai nang pany ai,” napi.
4 Samrang Jeroboam ly huni leu thai nai khala, amo ai kiu takhi iy, “Huni khumi ai patiu u!” nanai leu pei bo. Naibaly ni i kiuban ly vaimy dei vui i, pakhym ali teang thai y bo.
5 Amo my Areng i leu pei nai thui yb nai kamta, maicham py vaimy anawi seaungkhrang iy, maiphuchi py khaileaung y ahei phro bo.
6 Samrang Jeroboam ly amo teng y, “Pahen parai naimy kai i kiuban hawi teang ai nai, nang i Areng Tameuh teng y chiu so pi ba!” nanai takeng.
Amo ly Areng teng y chiu sa pi i, samrang i kiuban ly hawi ali teang bo.
7 Naibaly samrang my amo teng y, “Kai hawi vanrei samrang yhm mang y abang iy teicha teinei cho rai; nang i sa nai sai molam y langseaung kang pei ai,” napi.
8 Amo my ly “Samrang nang i nang chawn nai yhmtheaung ka-hyhrei pei i py, kai abang y leang; ati sai py cha nei ai nai kangai y.
9 Areng my kai ai ati sai py cho nei y ai nai hawi, kang jeu nai lam mang vawi ali teang y ai nai py leu ang pei bo,” napi.
10 Hunai deaungkho y ni ly jeu nai lam mang vawi teang y naimy, takhra lam mang vawi nai ne.
Bethela mary i amo miteaung pui
11 Huni neng khala Bethela mary y amo miteaung pui leaungrei awm; ni i chapochi ly huni kani Bethela mary y Juda amo i sa nai sai hawi, samrang teng y thui pi nai leuchi ampo teng y amti pi bo.
12 Amo miteaung pui my nichi teng y, “Huni khumi ly mani lam mang vawi mo?” nanai deng i, chapochi my Juda amo i vawi nai lam thui pi bo.
13 Amo miteaung pui my, “Kai i keaungngo kano kasau salo y atangra khai pi u, nanai leu pei i, chapochi my sa pi.
14 Naibaly ni ly keaungngo kano kasau atang iy, Juda amo nithun hui jo bo. Huni amo ai ly ngopraibiu keung anui y ateh nai niu i, amo miteaung pui my, “Nang ly Juda pri i jeu nai amo ne a?” nanai deng.
Huni khumi my, “Ne na a,” napi.
15 Amo miteaung pui my, “Kai hawi vanrei abang ly teicha teinei cho nei hawi sina,” nanai palau bo.
16 Na i py Juda amo my, “Kai ly nang hawi vanrei abang pajau y, nang i angvyn ai kawn nai py kai ngai y; Nang hawi vanrei hini meingtym y ati teicha teinei py, cho nei pajau y leang.
17 Ati mana nai mo nabaly Areng my kai ai, ‘ati teicha teinei py cho nei moh,’ nanai leu pei nai deaungkho y ne,” napi.
18 Hunaibaly Bethela mary i amo miteaung pui ly ka-chawi naimy ni teng y, “Kai py nang kamta amo ne teang chybo; Areng i kani pri amtaw thau leaungrei my, nang ai yhm y palau iy pacho panei ai nai kai teng y ang thui pi,” napi.
19 Naibaly Juda pri i amo ly amo miteaung pui hawi vanrei, yhm mang y abang iy cha nei bo.
20 Nini ly sabawi y ateh hawi nai thym khala, amo miteaung pui teng y Areng i leu tym i,
21 Juda amo teng y, “Areng my nang ly kai i leu tangai y, kai i leu pei nai kamta so y.
22 Naibaly teicha teinei cho y ai nai leu pei i py, hini meingtym y jeu iy cha nei nai deaungkho y, nang ly dei ai. Nang i veu ai ly ngamsi pajochi i tapreaung y up ai ny y,” nanai amti pi bo.
23 Nini cha nei pajau hawi nai khala, amo miteaung pui ly Juda pri i amo atang ai nai keaungngo kano kasau pei pi i,
24 Juda amo ly keaungngo kano kasau tleaung y atang iy, vawi nai lam y khrangsi my kei i dei bo.
25 Ni i veu ly lam y atlym su i, keaungngo kano kasau hawi khrangsi ly veu sahawi y angdo nai ne. Huna nai lam y atlym nai veu hawi, sahawi y angdo nai keaungngo kano kasau hawi khrangsi ai py, khuleaung chei nai khumi phyreichi my niu u. Nichi ly Bethela mary y chei iy, nichi i niu naichi amti pi bo.
26 Amo miteaung pui ly huni satang thai nai khala y, “Huni ly Areng i leu pei nai tangai y nai amo teu bo tu ly! Areng ly mymy i leu pei nai kamta, khrangsi pato iy kei hai nai bo,” napi.
27 Naibaly ni ly chapochi teng y, “Kai i vui keaungngo kano kasau salo y atangra so pi u,” napi i, nichi my sa pi bo.
28 Naibaly amo miteaung pui ly keaungngo kano kasau atang iy theu i, lam y dei nai amo hawi, sahawi y angdo naimy awm rai nai keaungngo kano kasau hawi khrangsi ai py niu bo. Khrangsi ly khumi veu ai py cho y, keaungngo kano kasau ai py kei y.
29 Amo miteaung pui ly veu ai kalawm iy keaungngo kano kasau tleaung y tang i, paleung si nai ka-ma-ra amteng hai ai nai hawi, veu up ai nai Bethela mary y syn bo.
30 Ni ly huni veu ai my i yhm dengtheung tapreaung y up chum baly, my i chapochi hawi vanrei, “Aw kai i bechy, kai i bechy!” nanai thui iy vo u bo.
31 Hunaibaly amo miteaung pui ly my i chapochi teng y, “Kai dei nai khala y hini tapreaung, ni i angawm sahawi y up teang ba.
32 Bethela mary i maicham molam y hawi, Samari marychi theung y awm nai chiu sa nai meingtymchi molam y py, Areng i leu pei naichi ly meitang khyp tym angym ai,” napi.
Jeroboam i kamngo len parai nai
33 Israela samrang Jeroboam ly vai khrairei kamngo uikheih y naimy, my i sa nai maichamra y kalop sa ai nai pathyp pi nai keung kalop sa ai avo naichi theung i ny y nai, khumi humchi theung i vawi takhra reng nai ne. Ni ly pathyp pi nai kalop sa ai ngai nai amimi py ne sy, ngai baly khai takhra pi bo.
34 Ni ly hina nai kamta kamngo sa nai deaungkho y, ni i samrang kangpreang ly myh kang vui nai ne.