12
Tosyh mang i chengchi my tiu nai
(2 Neng 10:1-19)
1 Rehoboam ly mymy ai samrang palyn ai nai Israela pri tosyh mang y awm nai khumichi akachu nai Sekhem mary y chei bo.
2 Samrang Solomon teng i dengdairei Aikupta pri y preang nai Neba i chapo Jeroboam ly huni satang thai nai khala y, Aikupta pri i dengdairei vawi ali teang.
3 Israela pri tosyh mang i khumichi ly ni ai palau iy, ni hawi vanrei samrang Rehoboam teng y chei u. Nichi my,
4 “Nang i ampo Solomon ly kaichi i tlang tleaung y ji parai nai myn angtleang pi bo; nang ly ji parai nai myn hawi akawm parai nai kalopchi jang hai iy kaichi ai tlamsa hai ai nabaly, kaichi ly nang i kalop ai ka-ym awm naimy kasa u ai,” napi u.
5 Rehoboam my, “Kani thomrei bo y jeu u teang; huna nai khala y kaimy kang pathang pi ai,” napi i, nichi ly vawi u teang bo.
6 Naibaly samrang Rehoboam ly ampo Solomon ai tau pei nai miteaung kehchi teng y, “Huni khumichi ai kai, mana pathang ai mo? Nangchi ati mana tau pei u ai mo?” nanai deng.
7 Nichi my, “Huni khumichi ai nangmy teng y kalop sa hai ai nai ngai nabaly, nichi i hnei takeng nai kamta so pi; nichi ly nang i kalopra y ka-ym awm parai naimy ang sa pi jojo ai,” nanai pathang.
8 Na i py Rehoboam ly miteaungchi i tau pei nai dawndan y i, mymy teng y awm reng nai, mymy hawi tleaungri acheang nai thawndeangchi teng y chei i nichi teng y,
9 “Nangchi ly kai ai ati mana tau pei u ai mo? nichi i myn kaji jang ai nai ang takeng nai khumichi teng y kai, mana pathang pi ai mo?” nanai deng.
10 Nichi my, “Nang ly nichi teng y, ‘kai i kiuchy ly ngaai i akeng tleaung y py len keh;
11 kai i ampo my ang tleang nai myn ly ji parai; ne, kaimy pho hai ai nai myn ly huni tleaung y ji keh ai. Ni ly nangchi ai thengbeang hawi ang pakhau; kai ly vuiha cheaungvawi hawi kang pajeaung ai,’ thui pi,” napi u.
12 Kani thomrei kani y Jeroboam hawi Israela chengchi ly samrang Rehoboam my taviu nai kamta tym u bi bo.
13 Naibaly samrang ly miteaungchi i tau pei nai ly dawndan y naimy,
14 thawndeangchi i tau pei nai kamta nichi teng y, “Ngaai ly nangchi ai myn ji parai naichi pho hai bo; ne, kai ly hunichi tleaung y ji nai kang pho hai ai. Ni ly nangchi ai thengbeang hawi ang pakhau; kai ly vuiha cheaungvawi hawi kang pajeaung ai,” nanai amangrang naimy pathang pi bo.
15 Samrang ly hina nai mipuichi ai tahm khai y naimy awm nai ly amo Ahijah dengdairei Neba i chapo Jeroboam teng y Areng i leu pei nai angym ai nai mymy i kangai ne. Hunai deaungkho y samrang ly khumichi i leu tangai pi y nai ne.
16 Mymychi i takeng nai leu ai samrang ly tangai pi y leang bo, nanai pany u nai khala y, khumichi my, “Davida teng y achi i cheng by y! Jese i chapo teng y achi yhmtheaung by y! Aw Israela khumichi awi, amychi saleaung y vawi u sina! Aw Davida, nangmy i yhm ai khen teang cham! Rehoboam ly my i vui phai dawn khyh sy!” nanai aeu u. Ref 12.16: 2 Sam 20:1
Hunai deaungkho y Israela khumichi ly tiu u nai ne.
17 Rehoboam ly Juda khu ka-peang y awm nai khumi ngiereichi ai naini peang khyh bo.
18 Naibaly samrang Rehoboam ly kalop ram sa nai khumichi i lu Adoniram ai Israela chengchi teng y pato. Na i py Israela chengchi my ni ai lengseaung hawi aphika nai deaungkho y, Rehoboam ly keaungngo ka-ri tleaung y atang kaliki iy, Jerusalem mary y preang bo.
19 Huni neng khala i dengdairei, Israela pri tosyh mang y awm nai mipuichi ly Davida i kangpreang samrang ai tiu u nai ne.
20 Israela chengchi ly Aikupta pri i dengdairei Jeroboam vawi ali teang bo, nanai satang thai nai khala y, ni ai mipui leu ka-rumra y palau i, Israela samrang y palyn u bo. Juda cheng naini Davida i kangpreangchi tlang tleaung y ka-ym awm u nai ne.
Amo Semajah i pany hai nai leu
(2 Neng 11:1-4)
21 Rehoboam ly Jerusalem mary y tym nai khala, Juda hawi Benjamin cheng theaungchi theung i vawi patyp nai tavaimi leaung 180,000 reichi ai pangym bo. Ni ly tosyh mang y awm nai Israela chengchi ai peang ali teang ai nai tau.
22 Na i py Tameuh my amo Semajah teng y thui pi nai ly
23 samrang Rehoboam hawi vanrei, Juda hawi Benjamin cheng theaung bawibawichi teng y,
24 “Nangchi ly nangmychi i amjo amnau Israela khumichi ai tiu u moh; hina nai tym nai ly kai i kangai ne nai deaungkho y, nangchi bawibawi ly yhm mang y phai vawi u,” nanai Areng i leu pei nai thui hai bo. Nichi bawibawi py Areng i leu pei nai tangai u i, mymychi i yhm mang y vawi u teang bo.
Areng ai Jeroboam nithun thun nai
25 Israela samrang Jeroboam ly mawi nawi parai nai Ephraim pri Sekhem mary y lengseaung apai tapang iy, kani tanarei samrang sa. Naibaly hu i dengdairei theu iy, Penuel mary y lengseaung apai tapang bo.
26-27 Naibaly mymy ai mymy naimy, “Kai i khumichi ly vai i kamta Jerusalem mary i Achura yhm y chei iy, kapathypra talam u lawh baly, Juda samrang Rehoboam teng y nichi paleung apei u ai i, kai ai ang padei u ai,” nanai adawn pasym nai ne.
28 Huna adawn nai bo y Jeroboam ly muku hawi si kataicho myn sa iy mipuichi teng y, “Nangchi ly Jerusalem mary y chei iy Tameuh ai chiu nai neng kra parai bo. Israela khumichi awi, Aikupta pri i dengdairei ang pahawi nai tameuhchi ly hini tameuhchi ne!” napi. Ref 12.28: Theu 32:4
29 Naibaly muku sikataichi myn harei ly Bethela mary y khai, harei nai ly Dan mary y khai pi.
30 Naibaly khumi mipuichi ly Bethela mary hawi Dan mary y chei iy chiu u i, kamngo sa u bo.
31 Jeroboam ly mawi saleungchira py chiu sa nai meingtymchi sa pi. Levi theaung ny y naichi ai vawi takhra iy pathyp pi nai keung palawn bo.
Bethela mary y myn ai chiu nai molam thui tamawn nai
32 Jeroboam ly Juda pri y sa nai pawi kamta, tajarei lo kani holai pangrei kani y reita pawi sa pi ai nai ka-vo sa. Bethela mary y mymy i sa nai muku sikatai mynchi ai maicham tleaung y apathyp u bo. Bethela mary y my i sa nai chiu sa naira yhm y kalop sa nai pathyp pi nai keungchi ai huni maryra kalop sa ai nai khai bo. Ref 12.32-33: Lev 23:33-34
33 Samrang ly mymy i khai takhra pi nai tajarei lo, kani holai pangrei kani y, Bethela mary i maichamra y chei iy apathyp i, Israela mipuichi i vui mymy sa pateaung pi nai pawi sa nai ne.