11
Solomon ly Tameuh ai nithun thun vui nai
1 Solomon i khrei nai cheng takhra neampachy neangneang awm. Ni ly Aikupta samrang i chaniu khyh chang y i, Hiti neampachy, Moba neampachy, Ammon neampachy, Edom neampachy hawi Sidon neampachychi ai py aju palawn.Ref 11.1: Tara 17:17
2 Areng ly Israela chengchi teng y, “Nangchi ly cheng takhrachi hawi apom ngau y; nichi ly nangchi i paleung ai mychi i tameuhchi mang y paleung apei hai ai,” napi. Na i py Solomon ly huni cheng takhra neampachychi ai pom bo. Ref 11.2: Theu 34.16; Tara 7:3-4
3 Solomon ly aju leaung 700 reichi ai pom nai khyh chang y i, samrangnuchi ai kry nai neampachy leaung 300 rei py awm nai ne. Nichi my samrang ai Tameuh teng i nai nithun thun hai vui iy,
4 miteaung acheang nai khala y, cheng takhrachi i tameuhchi ai chiu hai u. Samrang ly ampo Davida kamta my i Areng Tameuh tlang tleaung y ka-ym by y bo.
5 Ni ly Sidon tameuh nu Asatare hawi, amso ngai hawi nai Ammon chengchi i tameuh Milekon ai chiu bo.
6 Ni ly Areng i mo y kamngo sa naimy, ampo Davida kamta ly Tameuh teng y ahihawi y bo.
7 Moba chengchi i amso ngai nai tameuh khemosa hawi Ammon chengchi i amso ngai nai tameuh Mole ai chiu ai nai meingtym ly Jerusalem mary nisi mang i mawi saleung y sa pi.
8 Huni bo y ni ly cheng takhra ajuchi, nichi i vui tameuhchi teng y rimui patawi ai nai hawi, nichi i tameuh teng y kapathypra talam ai nai meingtym py sa pi bo.
9-10 Israela chengchi i Areng Tameuh ly tlen nyhrei amteng hai iy, cheng takhra khumichi i tameuhchi ai chiu y ai nai leu pei teu i py, Solomon ly Areng i leu tangai y i, nithun thun vui nai deaungkho y Areng ly Solomon i tlang tleaung y kado theu i,
11 “Nang ly kai hawi asa nai Leu Maikawm ai taphra iy, kai i leu pei nai akhi vui bo; huna nai y kai ly hini pri ai nang teng i nai la vui iy, nang i bangtang leaungrei teng y au ai.
12 Na i py kai ly ngampo Davida i meimai deaungkho y, nang i deung y hini ly kangso pi y naimy, nang i chapo deung y sa ai.
13 Naibaly kai ly kai i miseaung Davida saho y py, kai i mary pui lawm ai nai vawi takhra nai Jerusalem mary molam py, Davida i pri verei lo pi y ai; ni i cheng theaung harei khai pi ai,” nanai Solomon teng y thui pi bo.
Solomon i paleung ka-echi
14 Hunai deaungkho y Areng ly Edom samrang kangpreang leaungrei Hadad napi nai ai, Solomon ai tiu hai bo.
15-16 Hina nai ny y rai nai vaichi khala Edom pri ai Davida my tiu nai pajau i, tavailu areng Juaba ly tavai keung y dei naichi ai up ai nai, huni pri y chei bo. Naibaly ni ly my i tavaimichi hawi vanrei, lo tariurei awm iy Edom neampacho ngiereichi ai tleh chau chau nai ne.
17 Hadad hawi ni i ampo i miseaung phyreichi naini tleaung u i, Aikupta pri mang y preang u. (Huni thym khala Hadad ly deaungdi chy khyh rai.)
18 Nichi ly Midian pri i nai theu iy Paran mary y tym u nai khala, hu i khumi phyreichi ly nichi mang y amkawm u . Naibaly nichi ly Aikupta pri mang y chei u i, Aikupta samrang teng y tym u nai khala, samrang ly Hadad ai khaileaung meingtym, yhm hawi teicha teineichi pei pi bo.
19 Hadad ly samrang i ahawi hawi keh nai lawm i, samrang my Hadad ai samrangnu Taphena i amnau, my i amnau hawi apom hai bo.
20 Huni neampachy ly chapo Kenubath ai tapen i, huni deaungdi ai samrang yhm theung y samrangnu my kry nai deaungkho y, samrang i chapo hawi vanrei awm ahawi ai nai nga nai ne.
21 Samrang Davida dei bo i, tavailu areng Juaba py dei bo, nanai Aikupta pri y satang tym nai khala, Hadad ly Aikupta samrang teng y, “Kai ai kaimy i pri y vawi teang ai nai pei ba,” nanai takeng.
22 Samrang my, “Ati mana nai mo? Ati aly ngo y nai deaungkho y nangmy i pri y vawi ai ngai nai mo?” nanai deng.
Hadad my, “Ny y leang; na i py vawi ai nai pei ba,” nanai takeng i, my i pri y vawi bo.
Hadad ly Edom pri y samrang sa i, Israela chengchi ai paso nai deaungkho y ka-jo hau nai ne.
23 Tameuh ly Eliada i chapo Rezon ai py, Solomon ai tiu hai bo. Rezon ly my i yhmkeung Zobah samrang Hadadeza teng i dengdairei preang iy, paleung ka-e kamkawm lu sa.
24 (Hina nai tym nai ly Davida my Hadadeza ai tiu pajau iy, huni samrang i ahawi ka-dawi Suriachi ai tamyh chum nai neng ne.) Rezon ly my i kamkawmchi hawi vanrei Damaska mary y chei u iy, hu y awm. Hu y ni i khumichi my ni ai Suria samrang y palyn u bo.
25 Rezon py Solomon heng nai ryrei ly Israela chengchi ai ka-jo hau jojo nai ne.
Jeroboam teng y Tameuh my leu adeu nai
26 Samrang Solomon ai tiu nai keung takhra leaungrei ly Ephraim pri Zeredah avang y awm nai Neba i chapo Jeroboam ne. Ni ly samrang Solomon yhm i miteaung keh leaungrei ne i, ni i amhm ly Zeruah, napi nai neampachy lumai ne.
27 Hini ly samrang Solomon ai tiu nai satang ne.
Solomon ly Jerusalem mary nisi ngan mang y, khaileaung taphum iy mary apai sa nai ne.
28 Jeroboam ly kalop angjeng i sa thai naira awm, nanai Solomon my niu nai khala, ni ai Manase hawi Ephraim khu ka-peangchira y, kalop ram sa nai khumichi i lu y khai bo.
29 Kanirei nai khala y Jeroboam ly Jerusalem mary i dengdairei, khuleaung chei nai lam sala y Siloh mary i amo Ahijah ai, my ni tlairei avum hawi bo.
30 Amo Ahijah ly mymy i ateaung kangtha aleng iy seih holai nyhrei sei i,
31 Jeroboam teng y, “Nangmy i vui ateaung sei horei lo; ati mana nai mo nabaly Israela chengchi i Areng Tameuh my nang ai, ‘kai ly Solomon teng i pri kala vui iy Israela cheng theaung horeichi ai peang ai nai kang pei ai.
32 Kai i miseaung Davida i meimai y hawi, Israela pri verei i vui y kaimy vawi takhra nai Jerusalem mary saho y py, kai ly Solomon ai cheng harei peang ai nai pei ai.
33 Kaimy hina nai kamta sa nai ly Solomon ly kai ai khai su iy cheng takhrachi i tameuh, Sidon tameuh nu Asetare, Moba khumichi i tameuh Khemosa hawi Ammon khumichi i tameuh Mole ai chiu vui lawh nai deaungkho y ne. Solomon ly kai i leu pei naichi akhi vui bo. Ni ly hawi y naichi sa iy kai i reitachi hawi leu pei naichi ai, ni i ampo Davida i leu tangai nai kamta tangai y lawh.
34 Na i py kai ly Solomon teng i, pri verei kalo pi y leang; kaimy vawi takhra iy kai i Reitachi hawi leu pei naichi tangai nai keung kai i miseaung Davida i meimai y, kai ly Solomon ai my deungrei pri peang ai nai pei ai.
35 Ni i chapo deung tym nai khala naini, hini pri ai la vui iy Israela cheng horei ly nang teng y kang pei ai.
36 Na i py Solomon i chapo ai ly cheng harei peang ai nai kapei pi ai. Hina nai kamta pei nai ly kai ai chiu nai meingtym lawm ai nai, kaimy vawi takhra nai Jerusalem mary y, kai i miseaung Davida i katu chanauchi samrang lawm nai avaw hai y ai nai ne.
37 Aw Jeroboam awi, kai ly nang ai Israela samrang ra y kang khai ai; nang ly nangmy i ngai nai khu ka-peangchi peang ai nai nga ai.
38 Nang ly kai i leu pei naichi tangai angchi khyp iy, kai i Reitachi patawm naimy kai i miseaung Davida kamta, kai i leu tangai nai hawi kai khrei pa-rei sa baly, nang hawi vanrei kang awm hai jojo ai. Nang ai Israela samrang y kang palyn ai i, Davida i katu chanauchi vui y sa pi nai kamta ly nang i katu chanauchi ai py, nang bo y meitang khyp naimy samrang lawm hai ai.
39 Ati mana nai mo nabaly Solomon i kamngo nai deaungkho y, Davida i kangpreangchi ai kapajeng ai; na i py deungrei ny y leang,’ napi,” nanai thui pi.
40 Naibaly Solomon ly Jeroboam ai padei ai nai atho sa. Na i py Jeroboam ly Aikupta samrang Shishak teng y preang vui i, Solomon dei y ryrei ly Aikupta pri y awm nai ne.
Solomon dei nai
(2 Neng 9:29-31)
41 Solomon i sa nai cheaungkhangchi, amhi amtlau nai sai hawi cheng nai satangchi Solomon i razavang cha-iu theung y tajiu typ bo.
42 Ni ly saneng vui palyh pa-ngo ha ryrei Jerusalem mary y samrang lawm i, Israela pri verei y peang nai ne.
43 Ni ly dei i, Davida i mary y up bo; chapo Rehoboam ly samrang lyn bo.