2
Solomon teng y Davida my kangkhym i leu taviu nai
1 Davida ly mymy dei ai nai kasa nai khala y chapo Solomon ai palau i, kangkhym i taviu nai leuchi thui pi bo.
2 Samrang my, “Kai ly dei ai nai neng tym bo; nang ly nangmy ai a-ym iy ham parai naimy,
3 nang i Areng Tameuh my leu pei nai kamta so; Mosi i reita cha-iura y tajiu nai kamta, mymy i reitachi hawi leu pei nai ngiereichi tangai ba. Hunaibaly nang i sa naira tleirei y hawi, chei naira tleirei y eaung ai.
4 Nang ly Areng i kangai sa baly, mymy ly kai teng y ang pei nai leu ka-deu ly khaw hai ai. Mymy ly ‘nang i katu chanauchi ly kai i leu pei naichi ai, paleung hawi phailo verei, takhawi y pa-rei tangai iy dawn patyp nai ryrei ly kaimy nichi ai Israela pri peang ai nai pei ai,” nanai leu ang pei.
5 “Huni bo y kang taviu ai nai harei awm rai; Juaba ly Israela tavailu areng leaung nyhrei ne nai, Nera i chapo Abana hawi Jetha i chapo Amasa nini ai padei nai molam y, kai ai mana ang sa mo, nanai nang pany ai. Tavai keung y tleh naichi molam y vawitheung tha nai kamta, nini awmnem nai thym khala, ni ly mana tleh mo, nanai py nang pany ai. Ni ly kamngo by y nai khumichi ai padei bo. Ni i sa nai sai molam y kai teng y tym i, ni i hawi y nai ly kai i tlang tleaung y tym bo. Ref 2.5: 2 Sam 3.27, 20:10
6 Nang ly nangmy i sa ai nai kalop pany; ni ai ly dei kari dei hai moh sy.
7 “Na i py Kilead pri y awm nai Bazilai i chapochi ai ly pahen ly kry ba. Ati mana nai mo nabaly ngamjo Abasalom teng i nai kapreang nai thym khala y, nichi ly kai ai ang pahen u nai deaungkho y ne.Ref 2.7: 2 Sam 17:27-29
8 “Benjamin pri Bahurim mary y awm nai Kera i chapo Shimei py awm rai; kai Mahanaim mary y chei nai khala y, ni ly kai ai ang pasawi kheih bo. Na i py ni ly Jordan tavo y ang jeu iy, kai ai lamchung nai khala, kai ly ni ai padei y ai nai Areng i amyn y vaineng abeu kheih bo.Ref 2.8: 2 Sam 16:5-13, 19:16-23
9 Na i py nang ly ni ai pajeng y naimy awm moh; sa ai nai kalop ai nangmy pany nai kamta, ni ai padei ai nai tla,” nanai leu taviu bo.
Davida dei nai
10 Davida dei nai khala, ni ai Davida i mary y up bo.
11 Ni ly Hebron mary y saneng saryhrei, Jerusalem mary y saneng phai palyh thomrei peang; ni ly saneng vui palyhrei Israela samrang lawm nai ne.Ref 2.11: 2 Sam 5:4-5; 1 Neng 3:4
12 Solomon ly ampo i meingtym amtym i, samrang lyn bo; ni i sa thai naira ly khaw tleaung y khawra nai ne.Ref 2.12: 1 Neng 29:23
Adonijah dei nai
13 Naibaly Hakith i chapo Adonijah ly Solomon i amhm Bathaseba teng y chei; Bathaseba my, “Vai, nang jeu nai ly ahawi ka-dawi kamta jeu nai a?” nanai deng.
Adonijah my, “Ne na a,” nanai pathang.
14 Huni bo y ni ly “Kai ly nang teng y sairei takeng ai nai ngai,” napi.
Bathaseba my, “Ati mo?” napi.
15 Adonijah my, “Kai ly samrang lawm ai nai avo nai ne; lawm ai, nanai py Israela chengchi my athang khai nai ly nang pany. Na i py Areng i kangai ly kai, samrang lawm y naimy, kai i amnau naini samrang lawm nai ne.
16 Vai, kai ly nang teng y sairei takeng ai nai ngai; pahen parai naimy akhi vui moh kyh ba,” napi.
Bathaseba my, “Ati amjy mo?” nanai deng.
17 Adonijah my, “Shunem mary i neampachy Abisha ai kai hawi apom hai ai nai, pahen parai naimy samrang Solomon teng y takeng pi kyh; ni ly nang i leu akhi ai ny y, nanai kai pany,” napi.Ref 2.17: 1 Areng 1:3-4
18 Bathaseba my py, “Hawi mang, nang i vui kaimy samrang teng y thui pi ai,” napi.
19 Hunai deaungkho y Bathaseba ly Adonijah i vui takeng pi ai nai, samrang teng y chei bo. Samrang py amhm ai lamchung ai nai ang thau i, lu meung chum baly samrang atehra y ateh teang bo. Naibaly takhra atehra harei la hai iy, amhm ai mymy i lamtang mang y ateh haibo.
20 Amhm my, “Kai ly theangchichy nai amtheaungra harei, nang teng y hnei ai nai ngai; akhi vui moh ba,” napi.
Samrang my, “Ati ngai mo nei awi, kai akhi y leang mang,” napi.
21 Naibaly amhm my, “Abisa ai ngamjo Adonijah teng y deaung paseng pi kyh ba,” napi.
22 Samrang my, “Ati mana nai y Abisha ai naini hnei lawh khyh mo? Samrang atehra phai hnei sy bei; ni ly kai i amjo ne. Pathyp pi nai keung Abijatha hawi Juaba py, ni teng y abang nai ne! " napi.
23 Naibaly Solomon my, “Hinai kamta hnei lawh nai y, Adonijah ai kai padei y lawh baly, Tameuh my kai ai padei sy!
24 Areng ly kai ai ngaai Davida i atehra salo y, khaw parai naimy ang khai bo. Mymy ly mymy i leu adeu nai kamta, kai hawi kai i katu chanauchi teng y pri pei nai ne. Adonijah ly vaini my dei ai nai tla ai, nanai heng nai Areng i amyn y kai, vaineng abeu bo!,” nanai hawihai adeu kheng bo.
25 Naibaly samrang Solomon my leu pei nai deaungkho y, Benaja ly chei iy Adonijah ai tleh vui bo.
Abijatha ai mary pala nai hawi Juaba dei nai
26 Naibaly samrang Solomon ly pathyp pi nai keung Abiatha teng y, Anatho mary nangmy i awm nai avang saleaung y chei; nang ly dei ai ataing nai khumi ne. Na i ly nang ly kai i ampo Davida deung y, Areng i Leu Maikawm Pawm kry nai khumi, Davida hawi vanrei patang ahawi nai khumi ne nai deaungkho y vai, kai ly nang ai kang padei y leang bo,” napi. Ref 2.26: 1 Sam 22:20-23; 2 Sam 15:24
27 Naibaly Solomon ly Abiatha ai Areng i kalop, pathyp pi nai keungra i nai anawn hai vui bo. Hina nai kamta samrang ly Siloh mary i pathyp pi nai keung Eli hawi katu chanauchi molam y, Areng i leu pei naichi angym hai nai ne.Ref 2.27: 1 Sam 2:27-36
28 Hini satang ai Juaba thai nai khala, ni ly Areng i taichy yhm mang y preang iy, maicham takichi amkhaw cheng bo. (Ni ly Adonijah ai asa hai teu i py, Abasalom ai ly aso hai y leang.)
29 Ni ly Adonijah awm nai taichy mang y preang iy, maicham sahawi y angdo naimy awm, nanai satang nga nai khala, samrang ly Juaba teng y, ati mana nai maicham mang y preang lawh mo, nanai khumi pato iy deng hai bo. Naibaly Juaba my, kai ly Solomon ai jei nai deaungkho y, Areng teng y preang nai ne, nanai pathang bo. Hunai deaungkho y samrang Solomon ly Benaja ai pato iy, Juaba ai padei hai bo.
30 Benaja ly Areng i taichy yhm mang y chei iy Juaba teng y, “Angam mang y theu, samrang i leu pei nai awm,” napi.
Juaba my, “Kangjeu pajau y; kai ly hi y my kadei ai,” nanai pathang.
Benaja ly samrang teng y vawi teang iy, Juaba i thui nai leu amti pi.
31 Samrang Solomon my py, “Juaba i thui nai kamta so; ni ai padei iy up veng ryp. Huna nai khala kamngo by y nai khumichi ai Juaba my padei nai i kamngo ly kai teng y py, Davida i takhra katu chanauchi teng y py tym hai ai ny y.
32 Kai i ampo Davida pany y naimy sa nai, khumi ai padei nai molam y, Areng ly Juaba y pajeng ai. Juaba ly mymy tleaung y hawi keh nai Israela tavailu areng Abana hawi, Juda tavailu areng Amasa napi nai, kamngo by y nai khumi leaung nyhrei ai padei nai ne.
33 Hini pajeng naira ly khumi ai padei nai keung Juaba hawi, ni i katu chanauchi teng y tym jojo ai. Na i py Davida i meingtym y amtym nai katu chanauchi teng y ly Areng my eaung naira nga hai jojo ai,” napi.
34 Hunai deaungkho y Benaja ly Areng i taichy yhm mang chei iy, Juaba ai tleh vui chum baly, avang y awm nai mymy i yhm y up bo.
35 Naibaly samrang ly Benaja ai Juaba i meingtym, tavailu areng ra y khai iy, pathyp pi nai keung Zadok ai py, Abiatha i meingtym y khai nai ne.
Shimei dei nai
36 Naibaly samrang ly Shimei ai palau i ni teng y, “Nang ly Jerusalem mary y yhm harei sa iy awm ba; hini mary i nai theu moh.
37 Nang ly theu vui iy Kidron tavo kan vui lawh baly dei takengkei ai. Huna nai khala amymy ai tamang bo, nanai adawn vau ai,” napi.
38 Shimei my py, “Hawi mang, samrang awi, nang i leu pei nai kamta tangai ai,” nanai pathang chum baly, Jerusalem mary y neng kra parai pa-rei awm bo.
39 Na i py saneng thomrei bo y Shimei i miseaung leaung nyhrei ly Maaka i chapo kath samrang Akhi teng y preang hawi bo. Shimei ly kath mary y nini awm, nanai satang thai nai khala,
40 keaungngo kano kasau tleaung y atang iy, miseaung ni ai hau ai nai samrang Akhi teng y chei. Ni ly my i miseaung ni ai avum baly, yhm mang y hawi teang bo.
41 Solomon ly Shimei i sa nai saichi thai nai khala,
42 ni ai palau teang i ni teng y, “Kai ly nang ai Jerusalem mary i dengdairei theu y ai nai, Areng i amyn y vaineng adeu hai bo. Theu vui lawh baly dei takengkei ai nai tla, nanai kang pany hai chum bo. Nangmy py kai i leu tangai ai, nanai adeu nai ny y a?
43 Na i py ati mana nai y amy i adeu nai leu taphra iy, kai i leu pei nai tangai y lawh mo?
44 Nang ly kai i ampo tlang tleaung y sa tamang nai bawibawi ly pany nai ne. Hunichi molam y Areng my nang ai pajeng ai.
45 Na i py kai ai ly amtheaung hai ai i, Davida i pri deungtasa khaw hai ai,” napi.
46 Naibaly Benaja ly samrang my leu pei nai kamta, Shimei ai tleh vui bo. Vai ly samrang Solomon ly mymy i pri ai, hawihai palai peang nai ne.