4
Pany jo ai nai leungchengchi pado nai
1 Israela cheng theaung vereichi Jordan tavo angpeang u chum nai khala, Areng ly Josua teng y,
2 “Israela cheng theung ha harei y leaungrei, khumi leaung holai nyhrei vawi takhra iy,
3 Jordan tavo umtang, pathyp pi nai keungchi angdo nai Jordan tavo umtang i, lengseaung holai nyhrei akhui u; nangchi vaini Tai sa ai nai meingtymra y huni lengseaungchi khai u,” nanai leu pei bo.
4 Naibaly Josua ly my i vawi yb nai khumi leaung holai nyhreichi ai palau i,
5 nichi teng y, “Nangchi ly Areng Tameuh i Leu Maikawm Pawm mo i, Jordan tavo theung y satlo u; Israela cheng theaung ha harei i vui, leaungrei y lengseaung ha harei syn kryh ai nai tla.
6 Hini lengseaungchi ly Areng i sa pi nai leaungsai khumichi pany jo ai nai ka-ma-ra ne. Vai mo mang y nangchi i cho chanauchi my, ‘hini lengseaungchi ly ati mana nai sai mo?’ nanai angdeang lawh baly,
7 nangchi my Areng i Leu Maikawm Pawm Jordan tavo angpeang hai nai thym khala y, tavo tui leaung nai anawn vui nai sai thui pi ai nai tla; hini lengseaungchi hini meingtym y awm lawh nai sai ly Israela chengchi ai avawrei pany hai jo ai,” napi.
8 Huni khumichi ly Josua i leu pei nai kamta sa u bo. Areng my Josua teng y leu pei nai kamta, nichi ly Israela cheng theaung harei y lengseaung ha harei, lengseaung holai nyhrei Jordan tavo umtang i la iy Tai naira y khai u bo.
9 Josua ly pathyp pi nai keungchi Leu Maikawm Pawm angjeaung naimy angdo nai Jordan tavo umtangra y py, lengseaung holai nyhrei leng bo. (Huni lengseaungchi ly huni meingtym y, vaini khrairei awm jo nai ne.)
10 Josua i dengdairei Areng my leu pei nai ngierei, khumi bawibawichi sa pajau nai ryrei, pathyp pi nai keungchi ly Jordan tavo umtang y angdo u jo. Hina nai sa ai nai ly Mosi my leu pei yb nai ne.
Naibaly khumi mipuichi py, tavo angpeang u kaliki bo.
11 Nichi bawibawi tavo vai mang y tym u angym nai khala, pathyp pi nai keungchi ly Areng i Leu Maikawm Pawm angjeaung iy, khumichi i mo mang tako u nai ne.
12 Ruben theaung, Kad theaung hawi Manase theaung ka-hyhreichi ly Mosi my leu pei yb nai kamta, takhra Israela chengchi i mo mang tavai ateaung syn naimy amsa u bo.
13 Nichi ly khumi kanghu leaung meaungkateaung palyhrei tahm awm i, tavai thau ai nai Areng i mo y tavo angpeang naimy, Jeriko mary sahawi i angdym mang y tapai u.
14 Huni kani y Areng i atiti sa pi nai molam y Israela chengchi ly Josua ai lu sa pi nai keung kalen keh, nanai tahm khai u bo. Nichi ly Mosi ai tahm khai nai kamta, Josua ai py mymy heng nai ryrei tahm khai u nai ne.
15-16 Naibaly Areng ly Leu Maikawm Pawm angjeaung nai pathyp pi nai keungchi Jordan tavo theung i dengdairei, lyn kalau ai nai Josua ai leu pei hai bo.
17 Areng my leu pei nai kamta Josua ly thui pi bo.
18 Pathyp pi nai keungchi tavo peang y tym phai thym u baly tavo tui ly leaung ali teang i, tavo jeungrei tui kawi teang.
19 Khumi bawibawichi ly angchei lo kani horei kani y, Jordan tavo angpeang u chum baly, Jeriko mary nisi mang i Kilakala meingtym y Tai u nai ne.
20 Josua ly Jordan tavo theung i la nai lengseaung holai nyhrei ai, huni meingtym y leng bo.
21 Naibaly ni ly Israela chengchi teng y, “Vai mo mang y nangchi i cho chanauchi my, hini lengseaungchi ly ati mana nai sai mo, nanai angdeang u lawh baly,
22 nangchi my nichi teng y, Israela chengchi ly Jordan tavo khaileaung kaphui tleaung mang angpeang nai satangchi amti pi u.
23 Nangchi i Areng Tameuh ly pangli kamsen ai tui kang hai vui nai kamta, Jordan tavo nangchi angpeang u nai sala ryrei ly tui kang hai vui nai satang amti pi u.
24 Hini lyh ai hawi nai ka-ma-ra molam y, khaileaung pri y awm nai khumi bawibawichi ly Areng i nang parai nai sai pany u ai. Nangchi py nangmychi i Areng Tameuh ai jei kaji naimy tahm khai u jojo ai,” napi nai ne.